ଭୁବନେଶ୍ୱର,୧୩/୦୬: ଶୁକ୍ରବାର ପହିଲି ରଜ । ଏଥିପାଇଁ ସଜ ହେଲାଣି ସାରା ଭୁବନେଶ୍ୱର । କେଉଁଠି ଦୋଳି ଲାଗିଲାଣି ତ ଆଉ କେଉଁଠି ରଜପାନ ବିକ୍ରି ହେବା ଲାଗି ଅସ୍ଥାୟୀ ଟେଣ୍ଟ ବନ୍ଧା ହେଲାଣି । କିଛି ଜାଗାରେ ବିଭିନ୍ନ ପ୍ରକାରର ପିଠା ବି ବିକ୍ରି ହେଲାଣି । ସାରା ଭୁବନେଶ୍ୱର ପିଠା, ମିଠା ଓ ପାନର ସୁଗନ୍ଧରେ ସୁଗନ୍ଧିତ ହେଲାଣି ।
ଖାଲି ସେତିକି ନୁହେଁ ରଜ ପାଇଁ ମାର୍କେଟ ବିଲଡିଂ ଓ ସପିଙ୍ଗ ମଲ୍ ମାନଙ୍କରେ ବି ଭିଡ଼ ଦେଖିବାକୁ ମିଳିଛି । କିଣାକିଣି ସରିବାର ନାଁ ଧରୁନି। କିଏ ତିନି ଦିନ ରଜ ପାଇ ୩ଟି ନୂଆ ପୋଷାକ କିଣୁଛନ୍ତି ତ ଆଉ କିଏ ମ୍ୟାଚିଂ ଚପଲ ସାଙ୍ଗକୁ କାନ ଝୁମୁକା କିଣିବାକୁ ଭିଡ଼ କରୁଛନ୍ତି । ଚୁଡ଼ି, କସମେଟିକ ଦୋକାନ ମାନଙ୍କରେ ଭିଡ଼ ପ୍ରବଳ । କେହି କେହି ବୁଲାବୁଲି କରିବା ଲାଗି ବି ପ୍ଲାନିଂ କରି ସାରିଲେଣି । ଭୁବନେଶ୍ୱରରେ ରଜ ଉତ୍ସବ ବଡ଼ ଆକାରରେ ହେଉଥିବାରୁ ସାଙ୍ଗସାଥୀ, ବନ୍ଧୁବାନ୍ଧବ ଏଠି ୩ ଦିନ କାଟିବେ ବୋଲି ପ୍ଳାନିଂ ବି ସାରିଛନ୍ତି । ସାଙ୍ଗସାଥୀ ହୋଇ ପୁରୀ ଯିବା ଲାଗି ବି ମନସ୍ଥ କରି ସାରିଲେଣି । ଶୁକ୍ରବାର ପ୍ରଥମ ରଜ ଓ ରବିବାର ଶେଷ ରଜ ପଡ଼ୁଥିବାରୁ ଘରେ ଘରେ ଚିକେନ୍ ଓ ମଟନରେ ଭାସିବ । ଏଥର ରଜ ଖୁବ୍ ଧୁମ୍ଧମାରେ ପାଳିବା ଲାଗି ସମସ୍ତେ ସବୁ ପ୍ରକାରର ପ୍ରସ୍ତୁତି ସାରିଛନ୍ତି ।
ରାଜଧାନୀର ବିଭିନ୍ନ ସ୍ଥାନରେ ରଜ ଉତ୍ସବ ଭୁବନେଶ୍ୱରର ବିଭିନ୍ନ ସ୍ଥାନରେ ରଜ ମହୋତ୍ସବ ବଡ଼ ଧୁମ୍ଧାମରେ ପାଳନ ହେବ । ଦୁର୍ଗାପୂଜା ପଡ଼ିଆ ହାଉସିଂ ବୋର୍ଡ କଲୋନୀ, ଚନ୍ଦ୍ରଶେଖରପୁରରେ ସକାଳ ୭ଟାରୁ ରାତି ୧୦ଟା ଯାଏ ଚାଲିବ । ସକାଳୁ ପୁଚି ଖେଳ,ବାସ୍କେଟ୍ ବଲ୍, ବେଲୁନ୍ ଫୁଟା ଖେଳ ସହ ଅପରାହ୍ଣରେ ରଙ୍ଗୋଲି, ମ୍ୟୁଜିକ୍ ଚେୟାର, ପିଠା ପ୍ରତିଯୋଗିତା, ରଜ କୁଇଜ୍ ପରି ବିଭିନ୍ନ ପ୍ରତିଯୋଗିତା ହେବ । ଯାହାର ଆୟୋଜନ ଲେଡି ପ୍ରୋଟେକ୍ଟ ଟିମ୍ ଟ୍ରଷ୍ଟ କରୁଛି ।
ସେହିଭଳି ମହାରାଜା କ୍ରିକେଟ୍ ଆସୋସିଏସନ୍ ଓ ପାତ୍ରପଡ଼ା-ଭଗବାନପୁର ଯୁବଯୁବା ବାହିନୀ ଆନୁକୂଲ୍ୟରେ ୧୪ତମ ବାର୍ଷିକ ରଜ ମହୋତ୍ସବ ପାତ୍ରପଡା ମେଲଣ ପଡ଼ିଆରେ ଅନୁଷ୍ଠିତ ହେବ । ଯେଉଁଥିରେ ପୁଚି, ମେହେନ୍ଦି, ଦଉଡ଼ି ଡିଆଁ, ମ୍ୟୁଜିକ୍ ଚେୟାର, ବେଲୁନ ଡ୍ୟାନ୍ସ, ପେପର୍ ଡ୍ୟାନ୍ସ, ପୋଡ଼ପିଠା, ଝୋଟି, ପଶା ଖେଳ, ଗୀତ ଓ ନୃତ୍ୟ ପରି ବିଭିନ୍ନ କାର୍ଯ୍ୟକ୍ରମ କରାଯିବ । ଆସନ୍ତା ୧୪ତାରିଖ ଶୁକ୍ରବାରଠାରୁ ଆରମ୍ଭ ହୋଇ ସୋମବାର ୧୭ତାରିଖ ପର୍ଯ୍ୟନ୍ତ ମହୋତ୍ସବ ଚାଲିବ । ପାତ୍ରପଡ଼ା-ଉଦୟଗିରି ବିହାର ଲେଡିଜ କ୍ଲବ ପକ୍ଷରୁ ୧୪ ତାରିଖରେ ରଜ ମହୋତ୍ସବ ପାଳନ ହେବ । ସେଦିନ ରଜ କବିତା ଗାନ, ରଜ ଗୀତର ତାଳେ ତାଳେ କୁନିକୁନି ପିଲାଙ୍କ ନୃତ୍ୟ ଆଦି କାର୍ଯ୍ୟକ୍ରମ ହେବ । ପୋଡ଼ ପିଠା କାଟି ହେବ ଉଦ୍ଘାଟନ । ପ୍ରଥମ ଥର ଲାଗି ଓଡ଼ିଶା ବାର୍ଡ ମନିଟରିଂ ନେଟୱାର୍କ ପକ୍ଷରୁ ରଜ ପକ୍ଷୀ ପର୍ବ ଆୟୋଜନ କରାଯାଉଛି । ଯାହା ପ୍ରଥମ ଜାତୀୟ ମନସୁନ୍ ବାର୍ଡ କାଉଣ୍ଟ ।
ୱଣ୍ଡର ୱାର୍ଲ୍ଡରେ ଗ୍ରାଣ୍ଡ କାର୍ଣ୍ଣିଭାଲ୍ ରଜରେ ୱଣ୍ଡର ୱାର୍ଲ୍ଡରେ ଗ୍ରାଣ୍ଡ କାରନିଭାଲ୍ ଉତ୍ସବ ୧୪ରୁ ୧୬ ତାରିଖ ଯାଏ ଚାଲିବ । ରଜ ତିନି ଦିନରେ ଲାଇଭ୍ ସିଙ୍ଗ, ଲାଇଭ୍ ଡିଜେ, ୱେଭ ପାର୍ଟି, ୱାଟର ସ୍ଲାଇଡ୍, ଅନ୍ଲିମିଟେଡ୍ ପିଠା, ମ୍ୟାଜିସିଆନ୍, ଟାଟୋ ଆର୍ଟିଷ୍ଟ, ବବଲ୍ ଆର୍ଟିଷ୍ଟ, ମାଙ୍କଡ଼ ମଣିଷ, ମୁଣ୍ଡ ନଥିବା ମଣିଷ, ଚାର୍ଲି ଚାପ୍ଲିନ୍ଙ୍କୁ ଦେଖିବାର ସୁଯୋଗ ମିଳିବ । ସକାଳୁ ସନ୍ଧ୍ୟା ଯାଏ ଖାଦ୍ୟ ପାନୀୟ ସହ ଦିନ ସାରା ଏଇଠି ସମୟ ଯେମିତି କାଟି ପାରିବ ସେହି ବ୍ୟବସ୍ଥା ରହିଛି ।
ଜମୁଛି କିଣାକିଣି ପ୍ରତିଦିନ ଦୋକାନ ବଜାରରେ ଝିଅମାନଙ୍କ ଗହଳି ଜମି ଯାଉଛି । କିଣାବିକା ଜୋର୍ସୋର୍ରେ ଚାଲିଛି । ଏଥିପାଇଁ ଛୋଟ ଦୋକାନରୁ ସପିଂ ମଲ୍ ଆଉ ଅନ୍ଲାଇନ୍ରେ ମିଳୁଛି ଧମାକାଦାର୍ ଅଫର୍ । ଗ୍ରାହକଙ୍କୁ ଆକୃଷ୍ଟ କରିବା ଲାଗି ରିହାତି ଦିଆଯାଉଛି । କେଉଁଠି ବାଏ ୱାନ୍ ଗେଟ୍ ୱାନ୍ ଅଫର୍ ଲାଗିଛି । ଏପଟେ ଅନ୍ଲାଇନ୍ରେ ବି ରଜ ବଜାର ସରଗରମ ହୋଇଛି । ବଜାରକୁ ବିଭିନ୍ନ ନୂଆ ନୂଆ ଡିଜାଇନ୍ର ଡ୍ରେସ୍ ଓ ଶାଢ଼ି ଆସିଛି । ଛୋଟ ପିଲାଙ୍କର ବିଭିନ୍ନ ପାରମ୍ପରିକ ପୋଷାକ ସାଙ୍ଗକୁ ୱେଷ୍ଟର୍ଣ୍ଣ ଡ୍ରେସ୍ ରହିଛି । ସେହିଭଳି ଝିଅଙ୍କ ପାଇଁ ବିଭିନ୍ନ ଡିଜାଇନ୍ର ଜିନ୍ସ୍, ଟି-ସାର୍ଟ, ୱାନ୍ ପିସ୍, ସ୍କଟ୍, ଟପ୍ସ୍, ଅନାର୍କଲି, ପ୍ଲାଜୋ ସହ କୁର୍ତ୍ତି, ପଟିଆଲା, ସାରାରା ଆଦି ଡ୍ରେସ୍ ରହିଛି । ଆଉ ପାରମ୍ପରିକ ଶାଢ଼ି ଭିତରେ ସମ୍ବଲପୁରୀ, କାଞ୍ଜିବରମ୍, ଚନ୍ଦେରୀ, ମୁଗା ସିଲ୍କ, ସାଉଥ୍ସିଲ୍କ, ହ୍ୟାଣ୍ଡଲୁମ୍, ଧାନେଖାଲି, ଢାକେଇ ଜାମଦାନୀ, ବାଲୁଚେରୀ ଓ ମଡର୍ଣ୍ଣରେ ରହିଛି ଷ୍ଟୋନ୍ରେ ସିଲ୍କ ଶାଢ଼ି, ପ୍ଲେନ୍ ସ୍ଲିକ୍, ନେଟ୍ ଶାଢ଼ି ।