ନୂଆଦିଲ୍ଲୀ,୧୪/୧୨ : ସେ ଆୱାରା, ତ କେତେବେଳେ ଛଲିଆ, କେତେବେଳେ ସେ ଶ୍ରୀ ୪୨୦ ତ ଆଉ କେତେବେଳେ ଅନାଡି଼। ଅନେକ ରୂପରେ ତାଙ୍କୁ ରୂପେଲି ପରଦାରେ ଦେଖିବାକୁ ମିଳିଛି । ବଲିଉଡକୁ ସେ ଦେଇଛନ୍ତି ଅନେକ ହିଟ ଫିଲ୍ମ । ସେ ଏକାଧାରରେ ଥିଲେ ଜଣେ କଳାକାର, ନିର୍ଦ୍ଦେଶକ, ପ୍ରଜୋଜକ । ତେବେ ସେ ଆଉ କେହି ନୁହଁନ୍ତି। ସେ ହେଉଛନ୍ତି ବଲିଉଡ଼ର ଶୋ ମ୍ୟାନ ରାଜ କପୁର । ତାଙ୍କର ଆଜି ୧୦୦ ତମ ଜନ୍ମବାର୍ଷିକୀ । ଜନ୍ମବାର୍ଷିକୀରେ ତାଙ୍କୁ ମନେ ପକାଇଛନ୍ତି ସିନେ ଜଗତର ବହୁ ବଡ଼ ବଡ଼ କଳାକାର । ତେବେ ତାଙ୍କର ୧୦୦ ତମ ଜନ୍ମବାର୍ଷିକୀ ଅବସରରେ ୧୩ ରୁ ୧୫ ଡିସେମ୍ବର ମଧ୍ୟରେ ଭେଟେରାନ ଅଭିନେତା ରାଜ କପୁରଙ୍କ ୧୦୦ ତମ ଜନ୍ମବାର୍ଷିକୀ କାର୍ଯ୍ୟକ୍ରମ ଅନୁଷ୍ଠିତ ହେବ । ଆଉ ଏହି କାର୍ଯ୍ୟକ୍ରମରେ ୟୋଗ ଦେବେ ପ୍ରଧାନମନ୍ତ୍ରୀ ମୋଦି ।
ତେବେ ରାଜ କପୁର ୧୯୨୪ ମସିହା ଆଜିର ଦିନରେ ଅର୍ଥାତ ଡ଼ିସେମ୍ବର ୧୪ ରେ ପେଶୱାରରେ ଜନ୍ମଗ୍ରହଣ କରିଥିଲେ । ଯାହା ବର୍ତ୍ତମାନ ପାକିସ୍ଥାନ ଅଟେ। ତାଙ୍କ ପିତା ଭେଟେରାନ୍ ଅଭିନେତା ପ୍ରୀତିରାଜ କପୁର। ତାଙ୍କ ପିତାଙ୍କ ପରି ରାଜ ମଧ୍ୟ ଜଣେ ଉଜ୍ଜ୍ୱଳ ଅଭିନେତା ଥିଲେ। ସେ ମାତ୍ର ୧୦ ବର୍ଷ ବୟସରେ ନିଜ କ୍ୟାରିଅର୍ ଆରମ୍ଭ କରିଥିଲେ | ଶିଶୁ କଳାକାର ଭାବରେ ସେ ତାଙ୍କ ପିତା ପ୍ରୀତିରାଜ କପୁରଙ୍କ ଫିଲ୍ମ ଇନକିଲାବ ସହିତ ଡେବ୍ୟୁ କରିଥିଲେ। ରାଜ କପୁର କୃଷ୍ଣା କପୁରଙ୍କୁ ବିବାହ କରିଥିଲେ। କିନ୍ତୁ ପରେ ନର୍ଗିସଙ୍କ ପ୍ରେମରେ ପଡ଼ିଥିଲେ ରାଜ | ରାଜ ତାଙ୍କ ସୌନ୍ଦର୍ଯ୍ୟରେ ପ୍ରଭାବିତ ହୋଇ ସେ ନିଜ ପରିବାରକୁ ଭୁଲି ଯାଇଥିଲେ। କିନ୍ତୁ ପରେ ସେମାନଙ୍କ ସମ୍ପର୍କରେ ପୂର୍ଣ୍ଣଚ୍ଛେଦ ପଡ଼ିଥିଲା ସତ କିନ୍ତୁ ରାଜ ତାଙ୍କୁ ଭୁଲି ପାରିନଥିଲେ । ଏକ ସାକ୍ଷାତକାରରେ ତାଙ୍କ ପତ୍ନୀ କହିଥିଲେ ଯେ ରାଜ ସବୁବେଳେ ବାଥ ଟବରେ ବସି ମଦ୍ୟପାନ କରିବା ସହ ସିଗାରେଟ ବି ଟାଣୁଥିଲେ। ତେବେ ରାଜ କପୁର କେବଳ ତାଙ୍କ ଅଭିନୟ ପାଇଁ ନୁହେଁ ବରଂ ନିଜର ସ୍ବତନ୍ତ୍ର ଅନ୍ଦାଜ ପାଇଁ ମଧ୍ୟ ଲାଇମଲାଇଟରେ ରହିଥିଲେ। ରାଜ କପୁରଙ୍କ ହୋଲି ପାର୍ଟି ବଲିଉଡରେ ବହୁତ ଫେମସ୍ ଥିଲା । ଏଥିରେ ପ୍ରାୟ ସବୁ ଅଭିନେତା ଓ ଅଭିନେତ୍ରୀ ସାମିଲ ହେଉଥିଲେ । ଏହି ପାର୍ଟିରେ ଶେଷରେ କିନ୍ନରମାନେ ଆସନ୍ତି । ରାଜ କପୁରଙ୍କୁ ରଙ୍ଗ ଲଗାଇବା ସହ ନାଚ-ଗାନା କରୁଥିଲେ । ଏହି ସମୟରେ ରାଜ କପୁର କିନ୍ନରଙ୍କୁ ସେହି ଗୀତ ଶୁଣାଉଥିଲେ ଓ ତାଙ୍କର ରାୟ ନେଉଥିଲେ ।
