ନୂଆଦିଲ୍ଲୀ : ପଶ୍ଚିମବଙ୍ଗର ହିଂସା ପ୍ରଭାବିତ ମୁର୍ଶିଦାବାଦ ଜିଲ୍ଲାରେ ଜଣେ ବ୍ୟକ୍ତି ଓ ତାଙ୍କ ପୁଅର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତଙ୍କ ମଧ୍ୟରୁ ଜଣେ ଅଭିଯୁକ୍ତକୁ ଗିରଫ କରାଯାଇଛି। ପୁଲିସ ରବିବାର ଏହି ସୂଚନା ଦେଇଛି। ପୁଲିସର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ,ଶମଶେରଗଞ୍ଜର ଜାଫରାବାଦରେ ଦୁଇ ଜଣ ଲୋକଙ୍କ ହତ୍ୟା ମାମଲାରେ ଏହା ୪ର୍ଥ ଗିରଫଦାରୀ।
ଗିରଫ ହୋଇଥିବା ବ୍ୟକ୍ତି ଜଣକ ଜାଫରାବାଦର ପଡୋଶୀ ଗାଁ ସୁଲିତାଲା ପୁରବାପାରା ନିବାସୀ ଜିୟାଉଲ ଶେଖ୍। ସେ ୧୨ଅପ୍ରେଲରେ କରାଯାଇ ଥିବା ଏହି ଘଟଣା ପରେ ଫେରାର ଥିଲେ। ସେ କହିଛନ୍ତି ଯେ, ପଶ୍ଚିମବଙ୍ଗ ପୁଲିସର ସ୍ପେଶାଲ ଟାସ୍କ ଫୋର୍ସ (ଏସଟିଏଫ୍) ଓ ସ୍ପେଶାଲ ଇନଭିଷ୍ଟିଗେସନ ଟିମ୍ ( ଏସଆଇଟି) ଶେଖ୍ଙ୍କୁ ଉତ୍ତର ଦିନାଜପୁର ଜିଲ୍ଲାର ଚୋପ୍ରା ସ୍ଥିତ ତାଙ୍କର ଠିକଣାରେ ଶନିବାର ଗିରଫ କରିଛି।
ଅଧିକାରୀ କହିଛନ୍ତି , ଏହି ବ୍ୟକ୍ତି ସେହି ମୁଖ୍ୟ ଅଭିଯୁକ୍ତଙ୍କ ମଧ୍ୟରେ ଜଣେ , ଯିଏକି ଷଡ଼ଯନ୍ତ୍ର ରଚି ୧୨ ଅପ୍ରେଲରେ ହରଗୋବିନ୍ଦୋ ଦାସ ଓ ତାର ପୁଅ ଚନ୍ଦନ ଦାସର ଘରେ ଭଙ୍ଗାରୁଜା କରିବା ସହ ତାଙ୍କୁ ହତ୍ୟା କରିବା ପାଇଁ ଲୋକଙ୍କୁ ଉସୁକାଇ ଥିଲେ। ସେ କହିଛନ୍ତି , ପୁଲିସ ପାଖରେ ୧୨ଅପ୍ରେଲରେ ଅପରାଧ ସ୍ଥଳରେ ତାର ଉପସ୍ଥିତିକୁ ସାବ୍ୟସ୍ତ କରିବା ପାଇଁ ସିସିଟିଭି ଫୁଟେଜ୍ ଓ ତାର ମୋବାଇଲ ଫୋନ୍ ସମ୍ୱନ୍ଧୀୟ ସୂଚନା ସମେତ ଅନେକ ପ୍ରମାଣ ରହିଛି।
ଏହା ପୂର୍ବରୁ, ପୁଲିସ ଦୁଇ ଭାଇ କାଲୁ ନାଦର ଏବଂ ଦିଲଦାରଙ୍କ ବ୍ୟତୀତ ଇଞ୍ଜମାମ୍ ଉଲ୍ ହକ୍ ନାମକ ବ୍ୟକ୍ତିଙ୍କୁ ବାପା-ପୁଅଙ୍କ ହତ୍ୟାରେ ସାମିଲ ହେବାର ଅଭିଯୋଗରେ ଗିରଫ କରି ଥିଲେ। କାଲୁଙ୍କୁ ବୀରଭୂମି ଜିଲ୍ଲାର ମୁରାରାଇରୁ ଗିରଫ କରାଯାଇ ଥିଲା ଏବଂ ତାଙ୍କର ଭାଇ ଦିଲଦାରଙ୍କୁ ବାଂଲାଦେଶ ସୀମା ଅଞ୍ଚଳରୁ ସୁତି ପୁଲିସ ଥାନାର ଅଧିକାରୀ କ୍ଷେତ୍ରରେ ଧରାଯାଇ ଥିଲା। ୩ୟ ଅଭିଯୁକ୍ତଙ୍କୁ ଜାଫରାବାଦର ପଡୋଶୀ ଗାଁ ସୁରିପାରାରୁ ଧରାଯାଇ ଥିଲା।
ଅଧିକାରୀ କହିଛନ୍ତି, ଆମେ ମୁର୍ଶିଦାବାଦ ହିଂସା ମାମଲାରେ ୧୦୦ରୁ ଅଧିକ ଏଫଆଇଆର୍ ରୁଜୁ କରିଛୁ। ଏହି ମାମଲାରେ ଏବେସୁଦ୍ଧା ୨୭୬ ଜଣ ଲୋକଙ୍କୁ ଗିରଫ କରାଯାଇଛି। ୱାକଫ ଆଇନରେ ସଂଶୋଧନକୁ ନେଇ ବିରୋଧ ପ୍ରଦର୍ଶନ ବେଳେ ହୋଇଥିବା ହିଂସାରେ ଅତି କମ୍ରେ ୩ଜଣ ଲୋକଙ୍କ ମୃତ୍ୟୁ ହୋଇଥିଲା।
