ଭୁବନେଶ୍ୱର,୨୩/୧୨: ‘ପ୍ରମେୟ’ ପକ୍ଷରୁ ‘ଗୃହଲକ୍ଷ୍ମୀ-୨୦୨୪’ ପ୍ରତିଯୋଗିତା ରବିବାର ସନ୍ଧ୍ୟାରେ ଆଇଟିଇଆର୍ କ୍ୟାମ୍ପସ୍ସ୍ଥିତ ବାଂଶୁରୀ ଗୁରୁ ପ୍ରେକ୍ଷାଳୟରେ ଅନୁଷ୍ଠିତ ହୋଇଥିଲା । ଭୁବନେଶ୍ୱର ଖବରକାଗଜ ବିତରକଙ୍କ ସହଧର୍ମିଣୀମାନଙ୍କ ପାଇଁ ଏହି କାର୍ଯ୍ୟକ୍ରମରେ ଆୟୋଜିତ ହୋଇଥିଲା ଶଙ୍ଖ ଫୁଙ୍କା ଓ ମୁରୁଜ ପ୍ରତିଯୋଗିତା । ସେଥିମଧ୍ୟରୁ ଦୁଇଟି ବିଭାଗରେ ୬ ଜଣଙ୍କୁ ପ୍ରଥମ, ଦ୍ୱିତୀୟ ଓ ତୃତୀୟ ଭାବେ ଚୟନ କରାଯାଇଥିଲା । ପରେ ସମସ୍ତ କୃତୀ ପ୍ରତିଯୋଗୀଙ୍କ ମଧ୍ୟରେ ଏକ ଲିଖିତ କୁଇଜ୍ ପ୍ରତିଯୋଗିତା କରାଯାଇଥିଲା ।
ସେଥିରେ ଶ୍ରେଷ୍ଠ ବିବେଚିତ ପ୍ରଥମ ପ୍ରତିଯୋଗୀଙ୍କୁ ‘ଗୃହଲକ୍ଷ୍ମୀ-୨୦୨୪’ ଘୋଷଣା କରାଯାଇଥିଲା । ନବମ ବର୍ଷରେ ବିଜୟିନୀ ହୋଇଛନ୍ତି ବିତରକ ଧରଣୀ ଜେନାଙ୍କ ପତ୍ନୀ ଅନୁସୂୟା ଜେନା । ସୁମା ରିଅଲ୍ ମିଡିଆ ପ୍ରାଇଭେଟ୍ ଲିମିଟେଡ୍ (ଏସ୍ଆର୍ଏମ୍ପିଏଲ୍)ର ନିର୍ଦ୍ଦେଶିକା ଶାଶ୍ୱତୀ ଦାସ ମୁଖ୍ୟ ଅତିଥି ଭାବେ ଯୋଗଦେଇ ଅନୁସୂୟାଙ୍କୁ ‘ଗୃହଲକ୍ଷ୍ମୀ-୨୦୨୪’ର ମୁକୁଟ ପିନ୍ଧାଇଥିଲେ । ତାଙ୍କୁ ଟ୍ରଫି, ଉତ୍ତରୀୟ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା ।
ଏହି ଉପଲକ୍ଷେ ଆୟୋଜିତ ସଭାରେ ନିର୍ଦ୍ଦେଶିକା ଶ୍ରୀମତୀ ଦାସ କହିଥିଲେ, ଆଜି ମୁଁ ଆପଣମାନଙ୍କ ଗହଣରେ ଉପସ୍ଥିତ ରହି ବହୁତ ଆନନ୍ଦ ଅନୁଭବ କରୁଛି । ‘ପ୍ରମେୟ’କୁ ରାଜ୍ୟର ଏକ ନମ୍ବର ଖବରକାଗଜର ମାନ୍ୟତା ଲାଭ କରାଇବାରେ ବିତରକ ବନ୍ଧୁମାନେ ହିଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ।
‘ପ୍ରମେୟ’ ସମ୍ପାଦକ ଗୋପାଳକୃଷ୍ଣ ମହାପାତ୍ର ଅତିଥି ଭାବେ ଯୋଗଦେଇ କହିଥିଲେ, ଆଜି ପ୍ରମେୟ ଏହି ସ୍ଥାନରେ ପହଞ୍ଚିବା ପଛରେ ବିତରକଙ୍କ ସବୁଠାରୁ ଗୁରୁତ୍ୱପୂର୍ଣ୍ଣ ହାତ ରହିଛି । ଆପଣମାନେ ଅଛନ୍ତି ତ ଆମେ ଅଛୁ । ଗ୍ରୁପ୍ ସିଇଓ ସୁନିଲ ଦାସ ନିଜ ଉଦ୍ବୋଧନରେ ଆମ ପାରମ୍ପରିକ ଝୋଟିଚିତା ଓ ଶଙ୍ଖନାଦ କେମିତି ବିଜ୍ଞାନ ସମ୍ମତ ତଥା ଶରୀର ସୁସ୍ଥ ରଖିବା ପାଇଁ ଗୋଟିଏ ଗୋଟିଏ ମୁଦ୍ରା, ତାହା ଖୁବ ସୁନ୍ଦର ଭାବେ ବୁଝାଇଥିଲେ । ସଭା ଆରମ୍ଭରେ ପ୍ରସାର ବିଭାଗ ଡିଜିଏମ୍ ଗଜେନ୍ଦ୍ର ଦାସ କାର୍ଯ୍ୟକ୍ରମ ସମ୍ପର୍କିତ ସୂଚନା ପ୍ରଦାନ କରିବା ସହିତ ଖବରକାଗଜରେ ବିତରକର ଭୂମିକା ଶରୀରର ମେରୁଦଣ୍ଡ ସହିତ ସମାନ ବୋଲି ମତ ଦେଇଥିଲେ ।
ଉତ୍ସବରେ ନ୍ୟୁଜ୍-୭ର କାର୍ଯ୍ୟକାରୀ ସମ୍ପାଦକ ଦେବନାରାୟଣ ସେଠୀ, ‘ପ୍ରମେୟ’ର ବ୍ୟୁରୋ ମୁଖ୍ୟ ଦେବେନ୍ଦ୍ର ସୁଆର ଏବଂ ଆଇଟିଇଆର୍ ନିର୍ଦ୍ଦେଶକ ମାନସ ରଞ୍ଜନ ମଲ୍ଲିକ ପ୍ରମୁଖ ଯୋଗ ଦେଇଥିଲେ । ମୁରୁଜ ପ୍ରତିଯୋଗିତାରେ ପ୍ରଥମ ହୋଇଥିଲେ ବିତରକ ଅଶୋକ କୁମାର ପାଣ୍ଡବଙ୍କ ପତ୍ନୀ ଅର୍ପିତା ପାଣ୍ଡବ, ଦ୍ୱିତୀୟ ସ୍ଥାନରେ ବାବୁଲି ପୃଷ୍ଟିଙ୍କ ପତ୍ନୀ ଉର୍ମିଳା ସାହୁ ଓ ତୃତୀୟ ସ୍ଥାନ ଅଧିକାର କରିଥିଲେ ଦିଲୁ ପୃଷ୍ଟିଙ୍କ ପତ୍ନୀ ସରସ୍ୱତୀ ପୃଷ୍ଟି ।
ଶଙ୍ଖନାଦ ପ୍ରତିଯୋଗିତାରେ ପ୍ରଥମ ହୋଇଥିଲେ ବିତରକ ଶଙ୍କର ମୁଦୁଲିଙ୍କ ପତ୍ନୀ ଝରଣା ମୁଦୁଲି, ଦ୍ୱିତୀୟ ହୋଇଥିଲେ ପିତାମ୍ବର ରାଉତଙ୍କ ପତ୍ନୀ ବନ୍ଦିତା ରାଉତ ଏବଂ ତୃତୀୟ ସ୍ଥାନ ଲାଭ କରିଥିଲେ ଧରଣୀ ଜେନାଙ୍କ ପତ୍ନୀ ଅନୁସୂୟା ଜେନା । ୬ଜଣ କୃତୀ ପ୍ରତିଯୋଗୀଙ୍କୁ ପୁରସ୍କାର ସ୍ୱରୂପ ଉତ୍ତରୀୟ, ପୁଷ୍ପଗୁଚ୍ଛ ଓ ଅର୍ଥରାଶି ପ୍ରଦାନ କରାଯାଇଥିଲା ।
ଏହି ପ୍ରତିଯୋଗିତାରେ କାର୍ଟୁନିଷ୍ଟ୍ ଟି ନନ୍ଦେଶୁ ରାଓ, ଚିତ୍ରଶିଳ୍ପୀ ତଥା ସମାଜସେବୀ କଲ୍ୟାଣୀ କଳ୍ପଲତା ଆଚାର୍ଯ୍ୟ, କଣ୍ଠଶିଳ୍ପୀ ତଥା ସ୍ତମ୍ଭକାର ଛନ୍ଦା ମିଶ୍ର ଏବଂ ରାଜଶ୍ରୀ ଶତପଥୀ ପ୍ରମୁଖ ବିଚାରକ ଭାବେ ଯୋଗଦେଇଥିଲେ । ବିତରକଙ୍କ ସହଧର୍ମିଣୀମାନେ ଉତ୍ସାହର ସହିତ ବହୁସଂଖ୍ୟାରେ ପ୍ରତିଯୋଗିତାରେ ଭାଗ ନେଇଥିଲେ । ଅଂଶ ଗ୍ରହଣ କରିଥିବା ସବୁ ଗୃହିଣୀଙ୍କୁ ଉପହାର ସ୍ୱରୂପ ଶାଢ଼ି ପ୍ରଦାନ କରାଯାଇଥିଲା । ଉତ୍ସବରେ କଣ୍ଠଶିଳ୍ପୀ ଛନ୍ଦା ମିଶ୍ର ସଙ୍ଗୀତ ପରିବେଷଣ କରିଥିଲେ । ଏହି ଅବସରରେ କୁନି ପିଲାଟିଏ ମା’ଙ୍କ ଉପରେ ଚମତ୍କାର ଗୀତ ଗାଇଥିଲେ । ମୁଖ୍ୟ ଅତିଥି ଶ୍ରୀମତୀ ଦାସ ତାଙ୍କୁ ୧ ହଜାର ଟଙ୍କା ପୁରସ୍କାର ପ୍ରଦାନ କରିଥିଲେ ।
ଆଇଟିଇଆର୍ ଶିକ୍ଷାର୍ଥୀ ଆକାଂକ୍ଷା ଆଚାର୍ଯ୍ୟ ଓ କୀର୍ତ୍ତିକା ମହାନ୍ତି ଓଡ଼ିଶୀ ନୃତ୍ୟ ପରିବେଷଣ କରି ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲେ । ପ୍ରସାର ବିଭାଗର ଅଧିକାରୀ ଚନ୍ଦ୍ରକାନ୍ତ ନନ୍ଦ କାର୍ଯ୍ୟକ୍ରମ ସଂଯୋଜନା କରିଥିଲାବେଳେ ଅନ୍ୟ କର୍ମକର୍ତ୍ତା ଓ କର୍ମଚାରୀମାନେ ସହଯୋଗ କରିଥିଲେ। ପ୍ରସାର ବିଭାଗ ଏଜିଏମ୍ ରମାକାନ୍ତ ମଲ୍ଲିକ ଧନ୍ୟବାଦ ପ୍ରଦାନ କରିଥିଲେ ।
