ଭୁବନେଶ୍ୱର, ୨୩/୧୨: ଭୁବନେଶ୍ୱରରୁ ପୁଣି ଲୁଟ୍ ଉଦ୍ୟମ। ଦୁଇ ମହଲା ଛାତ ଉପରେ ଚଢି ଚୋରି କରିବା ବେଳେ ଉଠି ପଡ଼ିଲେ ଲୋକେ । ଲୋକମାନେ ଧରି ଦେବାରୁ ଛୁରୀ ଦେଖାଇ ଦୁଇ ମହଲାରୁ ଡେଇଁ ଚମ୍ପଟ ମାରିଲା ଲୁଟେରା। ସିସିଟିଭିରେ କଏଦ ହେଲା ଦୃଶ୍ୟ । ରାଜଧନୀ ଭୁବନେଶ୍ୱରର କଳିଙ୍ଗ ନଗର ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କଳିଙ୍ଗ ନଗର ଅଞ୍ଚଳରେ ଏକ ଲୁଟେରା ଦଳ ଉତ୍ପାତ କରୁଛନ୍ତି । ଏକ ଅଣ୍ଡର କଷ୍ଟ୍ରକ୍ସନ୍ ବିଲ୍ଡିଂ ବାଟ ଦେଇ ଦୁଇ ମହଲା କୋଠାରେ ଚଢିବା ସହ ତାଲା କାଟିବାକୁ ଉଦ୍ୟମ କରିଥିଲା ଚୋର । ସ୍ଥାନୀୟ ଲୋକେ ଶବ୍ଦ ଶୁଣି ଚୋରକୁ ଧରି ପକାଇଥିଲେ । ହେଲେ ଲୋକଙ୍କୁ ଛୁରୀ ଦେଖାଇ ଦୁଇ ମହଲାରୁ ତଳକୁ ଡେଇଁ ତାର ସହଯୋଗୀଙ୍କ ସହ ଫେରାର ହୋଇଯାଇଥିଲା ଚୋର । ଘଟଣା ସ୍ଥଳରେ ଚୋର ନିଜ ଫୋନ୍ ଛାଡ଼ି ଯାଇଛି । ଏନେଇ ଥାନାରେ ଏଭିଯୋଗ କରିଥିଲେ ଲୋକେ । ହେଲେ ଅଭିଯୋଗ ପରେ ମଧ୍ୟ ପୋଲିସ କୌଣସି ପଦକ୍ଷେପ ନେଇ ନଥିବା ଅଭିଯୋଗ ଆଣିଛନ୍ତି ସ୍ଥାନୀୟ ବାସିନ୍ଦା।
