ଭୁବନେଶ୍ଵର, ୨୭/୦୭ : ଆଳୁ ଦର ନେଇ ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ରଙ୍କ ପ୍ରତିକ୍ରିୟା। ପଶ୍ଚିମବଙ୍ଗରୁ ଆଳୁ ଟ୍ରକ୍ ଆସି ପାରୁନଥିଲା। ସେଥିପାଇଁ ଆଳୁ ଦର ଚଢା ଥିଲା। ବର୍ତ୍ତମାନ ପଶ୍ଚିମବଙ୍ଗ ସରକାରଙ୍କ ସହ କଥାବର୍ତ୍ତା ହେବା ପରେ ଆଳୁ ଟ୍ରକ୍ ଆସିବା ଆରମ୍ଭ ହୋଇଯାଇଛି। ବଜାରରେ ଦର ସ୍ଵାଭାବିକ ହେବା ଆରମ୍ଭ ହୋଇଗଲାଣି। ବର୍ତ୍ତମାନ ୩୨ରୁ ୩୪ ଟଙ୍କାରେ ଆଳୁ ମିଳିବା ଆରମ୍ଭ ହୋଇଯାଇଛି। ଆଗକୁ ଦର ପୁରା ନିୟନ୍ତ୍ରଣକୁ ଆସିଯିବ।
ସେହିପରି ଶୀତଳ ଭଣ୍ଡାର ପ୍ରସଙ୍ଗରେ ମନ୍ତ୍ରୀ କହିଛନ୍ତି ଯେ, ରାଜ୍ୟରେ ଯେଉଁ ସବୁ ଶୀତଳ ଭଣ୍ଡାର ଅଛି ତାହା ଚାଲୁନାହିଁ। ପୂର୍ବ ସରକାର ଶୀତଳ ଭଣ୍ଡାର କରିନାହାଁନ୍ତି। ରାଜ୍ୟରେ ୮ରୁ ୯ଟି ଶୀତଳ ଭଣ୍ଡାର ସଚଳ ଅଛି, ବାକି ସବୁ ବନ୍ଦ ଅଛି।
ସୂଚନା ଥାଉକି, ପଶ୍ଚିମବଙ୍ଗରୁ ଆଳୁ ଟ୍ରକ୍ ଆସୁନଥିବାରୁ ଓଡ଼ିଶାରେ ଆଳୁ ସଙ୍କଟ ଦେଖା ଦେଇଥିଲା। ବଜାରରେ ଆଳୁ କଳାବଜାର ହେବା ସହ ୪୦ ରୁ ୫୦ ଟଙ୍କାରେ ବିକ୍ରି ହେଉଥିଲା। ଏପରିକି ଗତକାଲି ମନ୍ତ୍ରୀ ଖୋଦ ଆଇଗିଣିଆ ଆଳୁ ଗଦିରେ ଚଢାଉ କରିଥିଲେ। ଆଳୁ କେଜି ୩୨ ଟଙ୍କାରେ ବିକ୍ରି କରିବାକୁ ତାଗିଦ୍ କରିଥିଲେ। ଚଢା ଦରରେ ବିକ୍ରି କଲେ ଅସାଧୁ ବ୍ୟବସାୟୀଙ୍କ ଉପରେ କାର୍ଯ୍ୟାନୁଷ୍ଠାନ ହେବ ବୋଲି ଚେତାବନୀ ଦେଇଥିଲେ।