ନୂଆଦିଲ୍ଲୀ: ଆମେରିକୀୟ ପୋଡକାଷ୍ଟର ଲେକ୍ସ ଫ୍ରିଡମ୍ୟାନଙ୍କ ସହିତ ଏକ ପୋଡକାଷ୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପାକିସ୍ତାନ ସହିତ ଭାରତର ତିକ୍ତ ସମ୍ପର୍କ ବିଷୟରେ ଖୋଲାଖୋଲି କଥା ହୋଇଛନ୍ତି । ସେ ପାକିସ୍ତାନ ଉପରେ ଆତଙ୍କବାଦକୁ ପ୍ରୋତ୍ସାହିତ କରିବା ଏବଂ ଶାନ୍ତି ପ୍ରୟାସକୁ ବାଧା ଦେବାର ଅଭିଯୋଗ ଆଣିଛନ୍ତି । ରବିବାର ପ୍ରକାଶିତ ୩ ଘଣ୍ଟାର ଏହି ପୋଡକାଷ୍ଟରେ ଭାରତ-ପାକିସ୍ତାନ ସମ୍ପର୍କ, ଅତୀତର ପ୍ରୟାସ ଏବଂ ଦ୍ୱିପାକ୍ଷିକ ସମ୍ପର୍କର ଭବିଷ୍ୟତ ବିଷୟରେ ମଧ୍ୟ ଆଲୋଚନା ହୋଇଛି ।
ଲେକ୍ସ ଫ୍ରିଡମ୍ୟାନ୍ ପ୍ରଧାନମନ୍ତ୍ରୀ ମୋଦୀଙ୍କୁ ଦୁଇ ପରମାଣୁ ଶକ୍ତିସମ୍ପନ୍ନ ଦେଶ ମଧ୍ୟରେ ଉତ୍ତେଜନାପୂର୍ଣ୍ଣ ସଂଘର୍ଷ ବିଷୟରେ ଏକ ପ୍ରଶ୍ନ ପଚାରିଥିଲେ। ସେ ପଚାରିଥିଲେ ଯେ, ବନ୍ଧୁତା ଏବଂ ଶାନ୍ତିର କୌଣସି ରାସ୍ତା ବାହାର କରିଛନ୍ତି କି ? ପ୍ରଧାନମନ୍ତ୍ରୀ ମୋଦୀ ୧୯୪୭ ମସିହାରେ ଭାରତ-ପାକିସ୍ତାନ ବିଭାଜନକୁ ମନେ ପକାଇ ଏହାକୁ ଇତିହାସର ଏକ ଯନ୍ତ୍ରଣାଦାୟକ ଏବଂ ରକ୍ତାକ୍ତ ଅଧ୍ୟାୟ ବୋଲି କହିଛନ୍ତି । ସେ କହିଛନ୍ତି ଯେ, ବିଭାଜନକୁ ଗ୍ରହଣ କରିବା ସତ୍ତ୍ୱେ, ପାକିସ୍ତାନ ଶାନ୍ତିପୂର୍ଣ୍ଣ ସହାବସ୍ଥାନର ପଥ ବାଛି ନଥିଲା । ପ୍ରଧାନମନ୍ତ୍ରୀ ମୋଦୀ ପୋଡକାଷ୍ଟରେ କହିଛନ୍ତି, ‘ସେମାନେ ବାଟ ପାଇଲେ ପରେ, ଆମେ ଆଶା କରିଥିଲୁ ଯେ ସେମାନେ ବଞ୍ଚିବେ ଏବଂ ବଞ୍ଚିବାକୁ ଦେବେ । କିନ୍ତୁ ସେମାନେ ଶାନ୍ତିପୂର୍ଣ୍ଣ ଜୀବନଯାପନକୁ ପ୍ରୋତ୍ସାହିତ କରିନଥିଲେ।' ବାରମ୍ବାର ସେ ଭାରତ ସହି ବିବାଦ କରିବାକୁ ନିଷ୍ପତ୍ତି ନେଇଥିଲେ। ସେମାନେ ଆମ ବିରୁଦ୍ଧରେ ଏକ ଛାୟା ଯୁଦ୍ଧ ରଚନା କରିଛନ୍ତି ।’
ପ୍ରଧାନମନ୍ତ୍ରୀ ମୋଦୀ ପାକିସ୍ତାନ ଉପରେ ଆତଙ୍କବାଦ ପ୍ରସାର କରିବାର ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ଭାରତ ଏକମାତ୍ର ପୀଡିତ ନୁହେଁ, ପାକିସ୍ତାନ ସହ ଜଡିତ ଆତଙ୍କବାଦୀ କାର୍ଯ୍ୟକଳାପ ସମଗ୍ର ବିଶ୍ୱକୁ ପ୍ରଭାବିତ କରିଛି। ବିଶ୍ୱର ଯେକୌଣସି ସ୍ଥାନରେ ଆତଙ୍କବାଦୀ ଆକ୍ରମଣ ହୁଏ, ଏହାର ରାସ୍ତା କୌଣସି ପ୍ରକାର ପାକିସ୍ତାନକୁ ଯାଏ। ଉଦାହରଣ ସ୍ୱରୂପ, ସେପ୍ଟେମ୍ବର ୧୧ ଆକ୍ରମଣକୁ ନିଆଯାଉ। ଏହାର ପଛର ମାଷ୍ଟରମାଇଣ୍ଡ ଓସାମା ବିନ୍ ଲାଡେନ୍ କେଉଁଠାରୁ ଆସିଥିଲା ? ସେ ପାକିସ୍ତାନରେ ଆଶ୍ରୟ ନେଇଥିଲା ବୋଲି ମୋଦୀ କହିଛନ୍ତି।
ସେ କହିଛନ୍ତି, ‘ବିଶ୍ୱ ସ୍ୱୀକାର କରିଛି ପାକିସ୍ତାନରେ ଆତଙ୍କବାଦ ଏବଂ ଆତଙ୍କବାଦୀ ମାନସିକତା ଦୃଢ଼ ଉପସ୍ଥିତି ଜାହିର କରିଛି । ପାକିସ୍ତାନ ଅଶାନ୍ତିର କେନ୍ଦ୍ର ପାଲଟିଛି ।’ ସେ ପାକିସ୍ତାନ ନେତୃତ୍ୱକୁ 'ଆତଙ୍କବାଦର ପଥ ପରିତ୍ୟାଗ' କରି ଶାନ୍ତି ଦିଗରେ କାମ କରିବାକୁ ପରାମର୍ଶ ଦେଇଛନ୍ତି । ସେ ଏହା ମଧ୍ୟ କହିଛନ୍ତି ଯେ, ପାକିସ୍ତାନର ଲୋକମାନେ ନିଜେ ଶାନ୍ତି ଚାହାଁନ୍ତି, କାରଣ ସେମାନେ ବର୍ଷ ବର୍ଷ ଧରି ଆଭ୍ୟନ୍ତରୀଣ ଅଶାନ୍ତି ଏବଂ ଆତଙ୍କବାଦର ଶିକାର ହୋଇଆସୁଛନ୍ତି ।
ଫ୍ରିଡମ୍ୟାନ୍ ପ୍ରଧାନମନ୍ତ୍ରୀ ମୋଦୀଙ୍କୁ ଭାରତ-ପାକିସ୍ତାନ ସମ୍ପର୍କକୁ ଉନ୍ନତ କରିବା ପାଇଁ ଅତୀତର ପ୍ରୟାସ ବିଷୟରେ ପଚାରିଥିଲେ । ଏହାର ଜବାବରେ ପ୍ରଧାନମନ୍ତ୍ରୀ ମୋଦୀ ୨୦୧୪ ମସିହାରେ ତାଙ୍କ ଶପଥ ଗ୍ରହଣ ସମାରୋହକୁ ତତ୍କାଳୀନ ପାକିସ୍ତାନ ପ୍ରଧାନମନ୍ତ୍ରୀ ନୱାଜ ସରିଫଙ୍କୁ ଦିଆଯାଇଥିବା ଐତିହାସିକ ନିମନ୍ତ୍ରଣକୁ ମନେ ପକାଇଛନ୍ତି । ସେ କହିଛନ୍ତି, ‘ଦ୍ୱିପାକ୍ଷିକ ସମ୍ପର୍କରେ ଉନ୍ନତି ଆଣିବା ପାଇଁ ମୋର ପ୍ରଥମ ପ୍ରୟାସ ଥିଲା ଯେତେବେଳେ ମୁଁ ମୋର ଶପଥ ଗ୍ରହଣ ସମାରୋହକୁ ମୋର ପାକିସ୍ତାନୀ ପ୍ରତିପକ୍ଷଙ୍କୁ ନିମନ୍ତ୍ରଣ କରିଥିଲି। ଏହା ସଦ୍ଭାବନାର ଏକ ନିଦର୍ଶନ ଥିଲା।’
