ନୂଆଦିଲ୍ଲୀ: ରବିବାର ଭୋର ସମୟରେ ଉତ୍ତର ମୈସୋଡୋନିଆରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ କୋକାନିରେ ଅବସ୍ଥିତ ଏକ ପଲ୍ସ ନାଇଟ୍ କ୍ଲବରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ ୫୧ ଜଣଙ୍କର ମୃତ୍ୟୁ ହୋଇଛି। ଉତ୍ତର ମୈସୋଡୋନିଆର ସରକାରୀ ନ୍ୟୁଜ୍ ଏଜେନ୍ସି ଗୃହ ମନ୍ତ୍ରଣାଳୟକୁ ଉଦ୍ଧୃତ କରି ଏହି ସୂଚନା ଦେଇଛି।
ରବିବାର ଭୋରରୁ ଉତ୍ତର ମୈସୋଡୋନିଆର ରାଜଧାନୀ ସ୍କୋପଜେରୁ ପ୍ରାୟ ୧୦୦ କିଲୋମିଟର ଦୂରରେ ଅବସ୍ଥିତ ଏହି ସହରରେ ଅଗ୍ନିକାଣ୍ଡ ଘଟିଥିଲା। ଏହି ସମୟର କିଛି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏଥିରେ ଦେଖାଯାଉଛି ଯେ ନାଇଟ୍ କ୍ଲବରେ ଏକ ଭୟଙ୍କର ନିଆଁ ଲାଗିଛି ଏବଂ ଆକାଶରେ ଘନ ଧୂଆଁ ଦୃଶ୍ୟମାନ ହେଉଛି। ସ୍ଥାନୀୟ ଗଣମାଧ୍ୟମ ଅନୁଯାୟୀ, ଏହି ଘଟଣାରେ ୫୦ ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ତଥାପି, କର୍ତ୍ତୃପକ୍ଷ ଏପର୍ଯ୍ୟନ୍ତ ମୃତକଙ୍କ ସଂଖ୍ୟା ନିଶ୍ଚିତ କରିନାହାଁନ୍ତି।
ରିପୋର୍ଟ ଅନୁସାରେ, ରାତି ୨ଟାରେ ଅଗ୍ନିକାଣ୍ଡ ଘଟିଥିଲା। ସେହି ସମୟରେ, ନାଇଟ୍ କ୍ଲବରେ ଉତ୍ତର ମୈସୋଡୋନିଆର ପ୍ରସିଦ୍ଧ ହିପ୍-ହପ୍ ଯୋଡ଼ି ADN ଙ୍କର ଏକ କାର୍ଯ୍ୟକ୍ରମ ଚାଲୁଥିଲା। ଏହି କନ୍ସର୍ଟରେ ଯୋଗଦେବା ପାଇଁ ପ୍ରାୟ ୧୫ ଶହ ଲୋକ ଆସିଥିଲେ। କୁହାଯାଉଛି ଯେ ଘଟଣାର କିଛି ଘଣ୍ଟା ପରେ ମଧ୍ୟ ନାଇଟ୍ କ୍ଲବରେ ଲାଗିଥିବା ନିଆଁକୁ ନିୟନ୍ତ୍ରଣ କରାଯାଇ ପାରିନାହିଁ।
ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ଯେ ଶୋ ସମୟରେ ବ୍ୟବହୃତ ପାଇରୋଟେକ୍ନିକ୍ (ଏକ ପ୍ରକାରର ଆତସବାଜି) ଯୋଗୁଁ ଅଗ୍ନିକାଣ୍ଡ ଘଟିଥିଲା। ଅଧିକାରୀ ମାନେ ଘଟଣାର ତଦନ୍ତ ଆରମ୍ଭ କରିଛନ୍ତି।
