ନୂଆଦିଲ୍ଲୀ,୫।୪: ଶ୍ରୀଲଙ୍କାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ‘ମିତ୍ର ବିଭୂଷଣ’ ସମ୍ମାନ। ଦୁଇ ଦେଶର ଦ୍ବିପାକ୍ଷିକ ସମ୍ପର୍କ ଓ ପରସ୍ପରର ସାଂସ୍କୃତିକ ଐତିହକୁ ମଜବୁତ କରିବା ପାଇଁ ଦିଆଯାଇଛି ଏହି ସମ୍ମାନ। ଏପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦିଙ୍କୁ ବିଦେଶରୁ ମିଳିସାରିଲାଣି ୨୨ଟି ଅନ୍ତର୍ଜାତୀୟ ପୁରସ୍କାର। ଏହି ମେଡାଲ ଧର୍ମଚକ୍ର ବୌଦ୍ଧକୁ ଦର୍ଶାଉଛି। ଭାରତ ଓ ଶ୍ରୀଲଙ୍କା ମଧ୍ୟରେ ଶତାବ୍ଦୀ ପୁରୁଣା ସାଂସ୍କୃତିକ ସମ୍ପର୍କ ରହିଛି। ତେଣୁ ଏହି ପୁରସ୍କାର ଖୁବ୍ ଗୁରୁତ୍ବପୂର୍ଣ୍ଣ।
ଗତ କିଛି ବର୍ଷ ହେବ ଶ୍ରୀଲଙ୍କାରେ ନିଜର ଅଧିକାର ବିସ୍ତାର କରିବାକୁ ଚେଷ୍ଟା କରୁଛି ଚୀନ୍ । ଅନ୍ୟପକ୍ଷେ ପିଏମ୍ ମୋଦିଙ୍କୁ ଶ୍ରୀଲଙ୍କା ଗସ୍ତ ବେଳେ ଏହି ପୁରସ୍କାର ମିଳିଛି। ଏହା ଏହି କଥାର ସଙ୍କେତ ଯେ, ଶ୍ରୀଲଙ୍କା ନିଜର ପୁରୁଣା ନୀତି ଅନୁସାରେ ଭାରତକୁ ଗୁରୁତ୍ବ ଦେବାକୁ ଚାହେଁ। ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାର ଦିସାନାୟକେ ପିଏମ୍ ମୋଦିଙ୍କୁ ‘ମିତ୍ର ବିଭୂଷଣ’ ସମ୍ମାନ ପ୍ରଦାନ କରିଛନ୍ତି। ଏହି ଅବସରରେ ମୋଦି କହିଛନ୍ତି, ଏହି ପୁରସ୍କାର ମୋର ନୁହେଁ ବଂର ୧୪୦ କୋଟି ଦେଶବାସୀଙ୍କ ପାଇଁ ଗୌରବର କଥା। ଏହା ଶ୍ରୀଲଙ୍କା ଓ ଭାରତ ମଧ୍ୟରେ ଗଭୀର ମିତ୍ରତା ଓ ଐତିହାସିକ ସମ୍ପର୍କକୁ ଦର୍ଶାଉଛି। ସେଭଳି ଦିଶାନାୟକେ କହିଛନ୍ତି, ଭାରତ ଓ ଶ୍ରୀଲଙ୍କା ସମ୍ପର୍କ ସବୁବେଳେ ଖୁବ୍ ଘନିଷ୍ଠ ରହିଛି। ଆମ ମଧ୍ୟରେ ବୌଦ୍ଧିକ ଓ ସାଂସ୍କୃତିକ ସମ୍ପର୍କି ରହିଛି। ପିଏମ୍ ମୋଦି ଏହି ସମ୍ମାନର ଅଧିକାରୀ।
‘ମିତ୍ର ବିଭୂଷଣ’ ମେଡାଲରେ ପୂର୍ଣ୍ଣକଳସ ଚିହ୍ନ ରହିଛି। ଏହାଛଡା ଧାନ ଗଛର ପତ୍ର ମଧ୍ୟ ଦେଖାଯାଉଛି। ଯାହାକି ସମୃଦ୍ଧିର ପ୍ରତୀକ। ଏହାଛଡା ତା ଉପରେ ନବରତ୍ନ ମଧ୍ୟ ତିଆରି କରାଯାଇଛି। ମେଡାଲରେ ଚନ୍ଦ ଓ ସୂଯ୍ୟଙ୍କ ଚିହ୍ନ ରହିଛି। ଯାହାକି ଦୁଇ ଦେଶର ସମ୍ପର୍କ ଓ ଇତିହାସକୁ ଦର୍ଶାଉଛି। ଏହାର ଅର୍ଥ ପୁରୁଣା ସମୟରୁ ଆଜି ପର୍ଯ୍ୟନ୍ତ ଓ ଆଜିଠାରୁ ଭବିଷ୍ୟତରେ ଦୀର୍ଘ ସମୟ ପର୍ଯ୍ୟନ୍ତ ଦୁଇ ଦେଶ ମଧ୍ୟରେ ମଧୁର ସମ୍ପର୍କ ରହିବ।
