ନୂଆଦିଲ୍ଲୀ,୦୧/୦୯: କେନ୍ଦ୍ର ସରକାର ଘରୋଇ ଗ୍ୟାସ ସିଲିଣ୍ଡର ଦରରେ ୨୦୦ ଟଙ୍କା ହ୍ରାସ କରି ଉପଭୋକ୍ତାଙ୍କୁ ଆଶ୍ୱସ୍ତି ଦେଇଛନ୍ତି । ତେବେ ସାଧାରଣ ଜନତାଙ୍କ ଅନ୍ୟତମ ପ୍ରମୁଖ ଆବଶ୍ୟକତା ପେଟ୍ରୋଲ, ଡିଜେଲ ଦର କିନ୍ତୁ ସ୍ଥିର ରହିଛି । ୧୫ ମାସରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ୩୧% ଶସ୍ତା ହୋଇଛି । ତଥାପି ଉଭୟ ଇନ୍ଧନ ଦରରେ କୌଣସି ପରିବର୍ତ୍ତନ କରିନାହାନ୍ତି ତୈଳ ବିପଣନ କମ୍ପାନି ।
କେନ୍ଦ୍ର ସରକାର ଅନ୍ତିମ ଥର ପାଇଁ ୨୦୨୨ ମେ’ ୨୧ରେ ଲିଟର ପିଛା ପେଟ୍ରୋଲରେ ୮ ଟଙ୍କା ଏବଂ ଡିଜେଲରେ ୬ ଟଙ୍କାର ଉତ୍ପାଦ ଶୁଳ୍କ ହ୍ରାସ କରିଥିଲେ । ଫଳରେ ପେଟ୍ରୋଲ ଏବଂ ଡିଜେଲ ଦାମ ଯଥାକ୍ରମେ ୯.୫ ଟଙ୍କା ଏବଂ ୭ ଟଙ୍କା କମ୍ ହୋଇଥିଲା। ସେତେବେଳେ ଅଶୋଧିତ ତୈଳ ଦର ବ୍ୟାରେଲ ପିଛା ୧୦୯.୫୧ ଡଲାର ଥିଲା । ଏହା ପରେ ୨୦୨୩ ଜୁନ୍ରେ ଅଶୋଧିତ ତୈଳ ଦର ୩୧.୫୭% ହ୍ରାସ ପାଇ ୭୫ ଡଲାର ତଳକୁ ଆସିଯାଇଥିଲା । ଏହା ସତ୍ତେ୍ୱ ପେଟ୍ରୋଲ ଏବଂ ଡିଜେଲ ଦର କମି ନ ଥିଲା ।
କମ୍ପାନିଗୁଡ଼ିକ ଯୁକ୍ତି ବାଢ଼ିଥିଲେ ଯେ, ୨୦୨୨ରେ ମହଙ୍ଗା ଅଶୋଧିତ ତୈଳ କ୍ରୟ କରି ପେଟ୍ରୋଲ ଡିଜେଲ ପ୍ରସ୍ତୁତ କରିବାରେ ସେମାନେ ଅତ୍ୟଧିକ କ୍ଷତି ସହିଛନ୍ତି । ଏବେ ତାହାର ଭରଣା ଚାଲିଛି । ବର୍ତ୍ତମାନ ଛବି ଅଲଗା । ୨୦୨୩- ୨୪ ଏପ୍ରିଲ-ଜୁନ୍ ତ୍ରୟମାସରେ ଏହି ତେଲ କମ୍ପାନିଗୁଡ଼ିକ ୩୧,୧୫୯ କୋଟି ଟଙ୍କାର ଲାଭ କରିଛନ୍ତି ।
ବିଶେଷଜ୍ଞଙ୍କ ମତରେ, ତେଲ କମ୍ପାନିଗୁଡ଼ିକ ପାଖରେ ପେଟ୍ରୋଲ ଏବଂ ଡିଜେଲରେ ୫ରୁ ୬ ଟଙ୍କା କମାଇବାର ସମ୍ଭାବନା ଅଛି । ତତ୍କାଳ ଉଭୟ ଇନ୍ଧନ ଦରରେ ୫ ଟଙ୍କା ହ୍ରାସ କରାଯାଇପାରିବ । ନିଜେ ତୈଳ ମନ୍ତ୍ରୀ ହରଦୀପ ସିଂ ପୁରୀ କମ୍ପାନିଗୁଡ଼ିକୁ ଦର ହ୍ରାସ କରିବା ପାଇଁ କହିଛନ୍ତି ।
