ନଆଦିଲ୍ଲୀ: ଏୟାର ଇଣ୍ଡିଆ ଏକ୍ସପ୍ରେସ୍ରେ ଉଡ଼ାଣ ଭରିବାକୁ ଥିବା ଜଣେ ଯାତ୍ରୀଙ୍କ କାରନାମାକୁ ନେଇ ଚାଞ୍ଚଲ୍ୟ ଖେଳିଯାଇଛି । ବ୍ୟାଗରେ ବୋମା ଅଛି ବୋଲି ଯାତ୍ରୀଜଣଙ୍କ ଘୋଷଣା କରିବା ପରେ ବାକି ଯାତ୍ରୀ ଏବଂ ବିମାନର କର୍ମଚାରୀ ଭୟରେ ଥରି ଉଠିଥିଲେ । ଟ୍ରାଞ୍ଜିଟ୍ ଚେକିଂ ବେଳେ ସେ ବିମାନ ଷ୍ଟାଫଙ୍କୁ କହିଥିଲେ ଯେ, ମୋ ବ୍ୟାଗରେ ବୋମା ଅଛି । ଏହା ପରେ ବିମାନ କର୍ମଚାରୀ ତୁରନ୍ତ ବମ୍ ଥ୍ରେଟ୍ ଆସେସମେଣ୍ଟ କମିଟି (ବିଟିଏସସି)କୁ ସୂଚନା ଦେଇଥିଲେ । ଟିମ୍ ଘଟଣାସ୍ଥଳରେ ପହଞ୍ଚିଥିଲା ଏବଂ ଯାତ୍ରୀଙ୍କ ବ୍ୟାଗ ଯାଞ୍ଚ କରିଥିଲା ।
ସେପଟେ ଯାତ୍ରୀଙ୍କ ବ୍ୟାଗରେ ବୋମା ଥିଲା କି ନାହିଁ ସେନେଇ ସୂଚନା ମିଳିନାହିଁ । କିନ୍ତୁ ଅତୀତରେ ଏଭଳି ବୋମା ଥିବା ନେଇ ସୂଚନାରେ କୌଣସି ସତ୍ୟତା ନଥିବା ଜଣାପଡ଼ିଥିଲା । ପୂର୍ବରୁ ଅନେକ ଯାତ୍ରୀ ଚେକିଂ ସମୟରେ ଏଭଳି ମିଥ୍ୟା ଧମକ ଦେଇ ଚର୍ଚ୍ଚାକୁ ଆସିଥିଲେ । ଯଦିଓ ଏଭଳି ଘଟଣାରେ ସତ୍ୟତା ନଥିବା ମନେ ହୁଏ କିନ୍ତୁ ବିମାନ କର୍ମଚାରୀ ନିୟମ ପାଳନ କରିବାରେ ଅବହେଳା କରନ୍ତି ନାହିଁ । ସୂଚନା ମିଳିବା କ୍ଷଣି ଏସଓପି ଆଧାରରେ ଯାତ୍ରୀ ଏବଂ ସେମାନଙ୍କ ବ୍ୟାଗ୍ ଯାଞ୍ଚ କରାଯାଏ ।
ଏହା ପୂର୍ବରୁ ଜୁନ୍ ୨୫ (ମଙ୍ଗଳବାର)ରେ ଏୟାର ଇଣ୍ଡିଆ ଫ୍ଲାଇଟ୍ରେ ବୋମା ଥିବା ନେଇ ସୂଚନା ମିଳିଥିଲା । ଯାଞ୍ଚ ପରେ ଜଣାପଡ଼ିଲା ଯେ, ଧମକର କୌଣସି ସତ୍ୟତା ନାହିଁ । ଯେଉଁ ବ୍ୟକ୍ତି ବିମାନରେ ବୋମା ଥିବା ନେଇ ଫୋନ୍ କରି ପୋଲିସକୁ ସୂଚନା ଦେଇଥିଲେ ତାଙ୍କୁ ଗିରଫ କରାଯାଇଛି । କଲ କରିଥିବା ବ୍ୟକ୍ତିଜଣଙ୍କ ପରିବାର ସହ କୋଚି ଏୟାରପୋର୍ଟରୁ ଉଡ଼ାଣ ଭରିବାକୁ ଥିବା ବେଳେ ତାଙ୍କୁ ପୋଲିସ ଗିରଫ କରିଛି ।
ମିଳିଥିବା ସୂଚନା ଅନୁସାରେ, ଗିରଫ ହୋଇଥିବା ଅଭିଯୁକ୍ତ ୩୦ ବର୍ଷୀୟ ସୁହୈବ । ଯିଏକି ଏୟାର ଇଣ୍ଡିଆ ଷ୍ଟାଫଙ୍କ ସେବାରେ ଅସନ୍ତୁଷ୍ଟ ଥିଲେ । ସେ ଲଣ୍ଡନରୁ କୋଚି ଆସିଥିଲେ । ଏହି ସମୟରେ ତାଙ୍କୁ ବିମାନରେ ମିଳିଥିବା ସେବାରେ ସେ ଖୁସି ନଥିଲେ । ଏହା ପରେ ସେ ପୋଲିସକୁ ଫୋନ୍ କରି ବିମାନରେ ବୋମା ଅଛି ବୋଲି କହିଥିଲେ । ସୁହୈବ ଲଣ୍ଡନରେ ଜଣେ ମାର୍କେଟିଂ ଏକଜିକ୍ୟୁଟିଭ୍ ଭାବେ କାର୍ଯ୍ୟ କରୁଥିବା ବେଳେ ପରିବାର ସହ କେରଳ ବୁଲିବାକୁ ଆସିଥିଲେ ।