ନୂଆଦିଲ୍ଲୀ,୦୩/୧୨: ସପ୍ତାହେ ଧରି ସଂସଦରେ ଲାଗିରହିଥିବା ଅଚଳାବସ୍ଥାର ଅବସାନ ଘଟିବ । ମଙ୍ଗଳବାର ଠାରୁ ଉଭୟ ଗୃହରେ ସ୍ୱାଭାବିକ ଆଲୋଚନା ହେବା ନେଇ ଆଶା ପ୍ରକାଶ ପାଇଛି । ସୋମବାର ଅନୁଷ୍ଠିତ ସର୍ବଦଳୀୟ ବୈଠକ ପରେ ଶାସକ ଓ ବିରୋଧୀ ପକ୍ଷଙ୍କ ମଧ୍ୟରେ ସ୍ୱାଭାବିକ ଗୃହ ପରିଚାଳନା ନେଇ ସହମତି ହୋଇଛି । ସମ୍ବିଧାନ ଉପରେ ଆଲୋଚନା ପାଇଁ ଲୋକସଭା ବାଚସ୍ପତି ଓମ୍ ବିର୍ଲା ରାଜି ହୋଇଛନ୍ତି ।
ଓମ୍ ବିର୍ଲାଙ୍କ ପକ୍ଷରୁ ସୋମବାର ସର୍ବଦଳୀୟ ବୈଠକ ଡକାଯାଇଥିଲା । ଏଥିରେ ଟିଡିପିର ଲଭୁ କ୍ରିଷ୍ଣା ଦେବରାୟଲୁ, କଂଗ୍ରେସର ଗୌରବ ଗୋଗୋଇ, ଡିଏମ୍କେର ଟି ଆର ବାଲୁ, ଏନ୍ସିପିର ସୁପ୍ରିୟା ସୁଲେ ପ୍ରମୁଖ ସାମିଲ ହୋଇଥିଲେ । ଏହାଛଡ଼ା ସପା, ଆର୍ଜେଡି, ଟିଏମ୍ସି, ଶିବସେନା (ୟୁବିଟି), ସିପିଆଇ (ଏମ୍) ର ପ୍ରତିନିଧିମାନେ ବି ଯୋଗଦେଇଥିଲେ । ଉଭୟ ଗୃହ କିଭଳି ସୁରୁଖୁରୁରେ ଚାଲିବ, ତାହା ନେଇ ଆଲୋଚନା ହୋଇଥିଲା ।
ବୈଠକ ପରେ ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି, ମଙ୍ଗଳବାରଠାରୁ ସମ୍ଭବତଃ ଉଭୟ ଲୋକସଭା ଓ ରାଜ୍ୟସଭା ସ୍ୱାଭାବିକ ଭାବେ ଚାଲିବ । ଅଧିବେଶନ ଆରମ୍ଭରୁ ଲାଗିରହିଥିବା ଅଚଳାବସ୍ଥାକୁ ନେଇ ସମସ୍ତେ ଚିନ୍ତାବ୍ୟକ୍ତ କରିଥିଲେ । ସମ୍ବିଧାନ ଉପରେ ଚର୍ଚ୍ଚା ପାଇଁ ସହମତି ପ୍ରକାଶ ପାଇଛି । ଲୋକସଭାରେ ଡିସେମ୍ବର ୧୩ ଓ ୧୪ରେ ଏହି ପ୍ରସଙ୍ଗ ଉପରେ ଚର୍ଚ୍ଚା ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ମତ ରଖିବେ । ସେହିଭଳି ୧୬ ଓ ୧୭ ତାରିଖରେ ରାଜ୍ୟସଭାରେ ଆଲୋଚନା ହେବ । ସମସ୍ତେ ଏହାକୁ ଗ୍ରହଣ କରିଛନ୍ତି । ଯଦି କେହି କୌଣସି ପ୍ରସଙ୍ଗ ଉଠାଇବାକୁ ଚାହାନ୍ତି, ସେଥିଲାଗି ନିୟମ ରହିଛି । ନିୟମ ଅନୁସାରେ ନୋଟିସ ଦାଖଲ କରିବାକୁ ହେବ । କିନ୍ତୁ ସଂସଦରେ ଅଚଳାବସ୍ଥା ସୃଷ୍ଟି କରାଯିବା ଉଚିତ ନୁହେଁ ।
ରିଜିଜୁ କହିଛନ୍ତି, ମଙ୍ଗଳବାରଠାରୁ ଗୃହକାର୍ଯ୍ୟ ସ୍ୱାଭାବିକ ଚାଲିବା ପରେ ଆମେ ଲୋକସଭାରେ ପ୍ରଥମ ବିଲ୍ ପାରିତ କରାଇବୁ । ରାଜ୍ୟସଭାରେ ମଧ୍ୟ ବିଲ୍ ଗୃହୀତ ହେବ । ଏହି ପରିପ୍ରେକ୍ଷୀରେ ମୁଁ ସମସ୍ତ ବିରୋଧୀ ସାଂସଦ ଏବଂ ନେତାଙ୍କୁ ଗୃହକାର୍ଯ୍ୟରେ ସାମିଲ ହେବାକୁ ଆହ୍ୱାନ ଦେଉଛି । ଟିଏମ୍ସି ସାଂସଦ କଲ୍ୟାଣ ବାନାର୍ଜୀ କହିଛନ୍ତି, ମଙ୍ଗଳବାର ଠାରୁ ଗୃହରେ ସ୍ୱାଭାବିକ ଆଲୋଚନା ହେବା ନେଇ ଆଶା । ଏଥିପାଇଁ ଆଜି ସହମତି ହୋଇଛି । ବାଚସ୍ପତି ମଙ୍ଗଳବାର ସମ୍ଭଲ ଓ ବାଂଲାଦେଶ ପ୍ରସଙ୍ଗ ଉପରେ ଆଲୋଚନା ଲାଗି ଅନୁମତି ଦେବେ ବୋଲି ଆଶା ।
ଉଲ୍ଲେଖଯୋଗ୍ୟ, ନଭେମ୍ବର ୨୫ରୁ ସଂସଦର ଶୀତକାଳୀନ ଅଧିବେଶନ ଆରମ୍ଭ ହୋଇଥିଲା । ଇତିମଧ୍ୟରେ ସପ୍ତାହେ ବିତିଥିଲେ ହେଁ ଆଦାନି, ସମ୍ଭଲ ଓ ମଣିପୁର ଭଳି ପ୍ରସଙ୍ଗକୁ ନେଇ ସଂସଦରେ ହଟ୍ଟଗୋଳ ଲାଗିରହିଥିଲା । ବିରୋଧୀମାନେ ନିଜ ଜିଦ୍ରେ ଅଟଳ ରହି ହଙ୍ଗାମା ଜାରି ରଖିଥିଲେ । ଏମିତି କି ସୋମବାର ମଧ୍ୟ ଆଦାନି, ସମ୍ଭଲ ଓ ମଣିପୁର ହିଂସାକୁ ନେଇ ଉଭୟ ଗୃହରେ ହଙ୍ଗାମା ହୋଇଥିଲା। ଏହାପରେ ଉଭୟ ଗୃହକୁ ଡିସେମ୍ବର ୩ ପର୍ଯ୍ୟନ୍ତ ମୁଲତବୀ ରଖାଯାଇଛି । କିନ୍ତୁ ସର୍ବଦଳୀୟ ବୈଠକ ପରେ ସ୍ୱାଭାବିକ ସଂସଦ ଚାଲିବା ନେଇ ନୂଆ ଆଶା ଦେଖାଦେଇଛି ।
କେନ୍ଦ୍ରମନ୍ତ୍ରୀ ରିଜିଜୁ କହିଛନ୍ତି, ସମ୍ବିଧାନ ଏକ ପୁସ୍ତକ । ନାଗରିକ ଭାବେ ଆମେ ସମସ୍ତେ ଉଚିତ ମାର୍ଗ ଅନୁସରଣ କରିବା ଆବଶ୍ୟକ । ଅନେକ ଲୋକ ସମ୍ବିଧାନ ଉପରେ ବିଭିନ୍ନ ସମୟରେ ନିଜ ମତାମତ ଦେଇଛନ୍ତି । ଆବଶ୍ୟକତା ଅନୁସାରେ ଏହାକୁ ସଂଶୋଧନ ବି କରାଯାଇଛି ।
