ନୂଆଦିଲ୍ଲୀ: ପାକିସ୍ତାନ ଗୁପ୍ତରେ ଏକ ଆଣବିକ ଅସ୍ତ୍ର ସଂଯୁକ୍ତ ଆନ୍ତଃମହାଦେଶୀୟ ବାଲିଷ୍ଟିକ୍ ମିସାଇଲ୍ (ଆଇସିବିଏମ୍) ବିକଶିତ କରୁଥିବା ନେଇ ଆମେରିକାର ଗୁଇନ୍ଦା ସଂସ୍ଥାମାନେ ରିପୋର୍ଟ ଦେଇଛନ୍ତି। ଏହି ମିସାଇଲ୍ ଆମେରିକା ପର୍ଯ୍ୟନ୍ତ ମାରକ କ୍ଷମତା ରଖିଥିବା ନେଇ ଏହି ରିପୋର୍ଟରେ ଉଲ୍ଲେଖ ରହିଛି। ‘ଫରେନ୍ ଆଫେୟାର୍ସ’ ପତ୍ରିକାରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଭାରତର ଅପରେସନ୍ ସିନ୍ଦୁର ପରେ ଚୀନର ସହାୟତାରେ ପାକିସ୍ତାନ ନିଜର ଆଣବିକ ଅସ୍ତ୍ରାଗାରକୁ ଉନ୍ନତ କରିବାକୁ ଚେଷ୍ଟା ଜାରି ରଖିଛି।
ଆଇସିବିଏମ୍ ମିସାଇଲ୍ ୫,୫୦୦ କିଲୋମିଟରରୁ ଅଧିକ ଦୂରତା ପର୍ଯ୍ୟନ୍ତ ଲକ୍ଷ୍ୟଭେଦ କରିବା ସହିତ ଏବଂ ଏହା ଆଣବିକ ଓ ପାରମ୍ପରିକ ଯୁଦ୍ଧାସ୍ତ୍ର ବହନ କରିବାରେ ସକ୍ଷମ। ବର୍ତ୍ତମାନ ପାକିସ୍ତାନ ପାଖରେ କୌଣସି ଆଇସିବିଏମ୍ ନାହିଁ। ୨୦୨୨ରେ ପାକିସ୍ତାନ ଶାହୀନ୍-୩ ମଧ୍ୟମ ଦୂରଗାମୀ ବାଲିଷ୍ଟିକ୍ ମିସାଇଲ୍ର ପରୀକ୍ଷଣ କରିଥିଲା, ଯାହା ୨,୭୦୦ କିଲୋମିଟର ପର୍ଯ୍ୟନ୍ତ ଲକ୍ଷ୍ୟଭେଦ କରି ଭାରତର ଅନେକ ସହରକୁ ନିଜ ଟାର୍ଗେଟ ଭିତରକୁ ଆଣିଥିଲା।
ରିପୋର୍ଟ ଅନୁସାରେ, ଏହି ଖବର ସାମ୍ନାକୁ ଆସିବା ପରେ ଆମେରିକା ସରକାରଙ୍କ ବରିଷ୍ଠ ଅଧିକାରୀମାନେ ଚେତାବନୀ ଦେଇଛନ୍ତି ଯେ, ଯଦି ପାକିସ୍ତାନ ଏହି ମିସାଇଲ ହାସଲ କରେ, ତେବେ ୱାଶିଂଟନ୍ ପାକିସ୍ତାନକୁ ଏକ ଆଣବିକ ପ୍ରତିଦ୍ୱନ୍ଦୀ ଭାବେ ଘୋଷଣା କରିବ। ବର୍ତ୍ତମାନ ରୁଷିଆ, ଚୀନ୍ ଓ ଉତ୍ତର କୋରିଆକୁ ଆମେରିକା ଆଣବିକ ପ୍ରତିଦ୍ୱନ୍ଦୀ ଭାବେ ଘୋଷଣା କରିଛି।
ଗତ ବର୍ଷ ଆମେରିକା ପାକିସ୍ତାନର ଦୂରଗାମୀ ବାଲିଷ୍ଟିକ୍ ମିସାଇଲ୍ କାର୍ଯ୍ୟକ୍ରମ ସହ ଜଡ଼ିତ ନେସନାଲ୍ ଡେଭେଲପମେଣ୍ଟ କମ୍ପ୍ଲେକ୍ସ ଏବଂ ଅନ୍ୟ ତିନୋଟି ସଂସ୍ଥା ଉପରେ ନିଷେଧାଜ୍ଞା ଲଗାଇଥିଲା। ଏହା ପାକିସ୍ତାନର ମିସାଇଲ୍ କାର୍ଯ୍ୟକ୍ରମ ନେଇ ଆମେରିକାର ଗଭୀର ଚିନ୍ତାକୁ ପ୍ରତିଫଳିତ କରୁଛି।
ପାକିସ୍ତାନର ବୈଦେଶିକ ମନ୍ତ୍ରଣାଳୟ ଏହି ଅଭିଯୋଗକୁ ଖଣ୍ଡନ କରି କହିଛି ଯେ ତା’ର ଆଣବିକ ଓ ମିସାଇଲ୍ କାର୍ଯ୍ୟକ୍ରମ କେବଳ ଆଞ୍ଚଳିକ ସନ୍ତୁଳନ ରକ୍ଷା ପାଇଁ ଏବଂ ଭାରତରୁ ଉତ୍ପନ୍ନ ବିପଦକୁ ପ୍ରତିରୋଧ କରିବା ଉଦ୍ଦେଶ୍ୟରେ ବିକାଶ କରାଯାଉଛି। ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫ ମଧ୍ୟ ଏହି ନିଷେଧାଜ୍ଞାକୁ ‘ଅନ୍ୟାୟ’ ବୋଲି କହି ନିଜ ଦେଶର ପ୍ରତିରକ୍ଷା ନୀତିର ସମର୍ଥନ କରିଛନ୍ତି।
ଏହି ଘଟଣା ଦକ୍ଷିଣ ଏସିଆରେ ଆଞ୍ଚଳିକ ନିରାପତ୍ତା ଓ ଆଣବିକ ସନ୍ତୁଳନ ଉପରେ ଗଭୀର ପ୍ରଭାବ ପକାଇପାରେ। ବିଶେଷଜ୍ଞମାନେ ଏହାକୁ ଭାରତ-ପାକିସ୍ତାନ ସଂଘର୍ଷର ଏକ ନୂଆ ମାନଦଣ୍ଡ ଭାବେ ଦେଖୁଛନ୍ତି। ଯାହା ଆମେରିକା ସମେତ ଅନେକ ବିଶ୍ୱ ଶକ୍ତିମାନଙ୍କୁ ଏକ ଜଟିଳ ଭୂ-ରାଜନୈତିକ ପରିସ୍ଥିତିକୁ ଠେଲି ଦେଇପାରେ।
