ନୂଆଦିଲ୍ଲୀ: ଭାରତ ସହ କଥା ହେବାକୁ ଚାହୁଁଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ । ଭାରତ ସହିତ କଥା ହୋଇ ଆତଙ୍କବାଦ, ପାକ୍ ଅଧିକୃତ ଜମ୍ମୁ-କାଶ୍ମୀର (POJK) ଏବଂ ବାଣିଜ୍ୟ ସମସ୍ୟାର ସମାଧାନ କରିବାକୁ ଚାହୁଁଛନ୍ତି ସେ । ସେ ସାଉଦି ଆରବର ଯୁବରାଜ ମହମ୍ମଦ ବିନ୍ ସଲମାନ ଅବଦୁଲାଜିଜ୍ ଅଲ୍ ସୌଦଙ୍କୁ କହିଛନ୍ତି ଯେ ସେ ଭାରତ ସହିତ କଥାବାର୍ତ୍ତା କରିବାକୁ ପ୍ରସ୍ତୁତ।

ପାକିସ୍ତାନୀ ନ୍ୟୁଜ୍ ଚ୍ୟାନେଲ୍ ARY ନ୍ୟୁଜ୍ ଅନୁଯାୟୀ, ଶାହବାଜ ସରିଫ ଫୋନ୍ ଯୋଗେ ମହମ୍ମଦ ବିନ୍ ସଲମାନଙ୍କ ସହ କଥା ହୋଇଛନ୍ତି ଏବଂ ଏହି ସମୟରେ ସେ କହିଛନ୍ତି ଯେ, ପାକିସ୍ତାନ POK, ସିନ୍ଧୁ ଜଳ ଚୁକ୍ତି, ବାଣିଜ୍ୟ ଏବଂ ଆତଙ୍କବାଦ ଉପରେ ଭାରତ ସହିତ କଥାବାର୍ତ୍ତା କରିବାକୁ ପ୍ରସ୍ତୁତ।

ଏପ୍ରିଲ୍ ୨୨ରେ ପହଲଗାମ୍ ଆତଙ୍କବାଦୀ ଆକ୍ରମଣ ପରେ, ଭାରତ ପାକିସ୍ତାନ ବିରୁଦ୍ଧରେ କଠୋର ପଦକ୍ଷେପ ନେଇଥିଲା, ଯେଉଁଥିରେ ପାକିସ୍ତାନୀ ନାଗରିକଙ୍କ ପ୍ରତ୍ୟାବର୍ତ୍ତନ, ଅଟାରୀ ୱାଘା ସୀମା ବନ୍ଦ କରିବା, ପାକିସ୍ତାନୀ ମାନଙ୍କୁ SAARC ଭିସା ଛାଡ଼ ବନ୍ଦ କରିବା, ପାକିସ୍ତାନ ହାଇକମିଶନରେ କର୍ମଚାରୀଙ୍କ ସଂଖ୍ୟା ହ୍ରାସ କରିବା ଏବଂ ସବୁଠାରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଥିଲା ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିବା। ଭାରତର ମତ ସ୍ପଷ୍ଟ କରିଥିଲା ଯେ, ଯେପର୍ଯ୍ୟନ୍ତ ପାକିସ୍ତାନ ଆତଙ୍କବାଦ ଏବଂ POK ସମସ୍ୟାର ସମାଧାନ ନକରିଛି, ସେପର୍ଯ୍ୟନ୍ତ ଅନ୍ୟ କୌଣସି ପ୍ରସଙ୍ଗ ଉପରେ ଏହା ସହିତ ଆଲୋଚନା କରାଯିବ ନାହିଁ।