ପୁରୀ,୨୫/୦୬ : ରଥଯାତ୍ରାରେ ଶ୍ରଦ୍ଧାଳୁମାନଙ୍କୁ ପୁରୀ ସହର ଭିତରେ ମାଗଣା ପରିବହନ ସେବା ଯୋଗାଇ ଦିଆଯିବ । ବାହାର ରାଜ୍ୟ ତଥା ବାହାର ଜିଲ୍ଲାରୁ ଆସୁଥିବା ଶ୍ରଦ୍ଧାଳୁମାନେ ବସ୍ଷ୍ଟାଣ୍ଡ ଓ ରେଳଷ୍ଟେସନରେ ପହଞ୍ଚି ଯେଉଁଭଳି ସମସ୍ୟା ନ ଭୋଗିବେ ସେଥିପାଇଁ ବିଭିନ୍ନ ପଦକ୍ଷେପ ନିଆଯାଇଛି । ଅଟୋ, ବସ୍ ଯୋଗେ ସେମାନଙ୍କୁ ସହର ନିକଟସ୍ଥ ବିଭିନ୍ନ ସ୍ଥାନକୁ ଅଣାଯିବ । ଏଥିପାଇଁ ପରିବହନ ବିଭାଗ ପକ୍ଷରୁ ୨୦୦ଟି ଅଟୋ ଏବଂ ୩୬ଟି ବସ୍ ଚାଲିବ । ଗୁଣ୍ଡିଚା ଯାତ୍ରା, ବାହୁଡ଼ା ଯାତ୍ରା ଏବଂ ସୁନାବେଶରେ ଏହି ଅଟୋ ଏବଂ ବସ୍ରେ ଶ୍ରଦ୍ଧାଳୁମାନଙ୍କୁ ମାଳତିପାଟପୁର ଏବଂ ତାଳବଣିଆ ବସ୍ଷ୍ଟାଣ୍ଡରୁ ଅଣାଯିବ । ଏହି ସେବା ସମ୍ପୂର୍ଣ୍ଣ ଦେୟମୁକ୍ତ ରହିବ ।
ଏହି ୩ ଦିନରେ ଅନ୍ୟ ବ୍ୟବସାୟିକ ଅଟୋ ନଚଲାଇବାକୁ କୁହାଯାଇଛି । ବ୍ୟବସାୟିକ ଅଟୋ ଚାଲିଲେ ଗଳିକନ୍ଦିରେ ଭିଡ଼ ହେବା ସହ ରାସ୍ତା ଜାମ୍ ହେଉଛି । ଏଣୁ ଏହାକୁ ପ୍ରତିହତ କରିବା ପାଇଁ ପରିବହନ ବିଭାଗ ପକ୍ଷରୁ ଏହି ସେବା ପ୍ରଦାନ କରାଯିବ । ସମସ୍ତ ଟୁରିଷ୍ଟ ବସ୍ ମାଳତିପାଟପୁରରେ ପାର୍କିଂ ହେବ । ସେହିଭଳି ଗୁଣ୍ଡିଚା ଯାତ୍ରା, ବାହୁଡ଼ା ଯାତ୍ରା ଏବଂ ସୁନାବେଶ କଟକ, ଭୁବନେଶ୍ୱର, ନିରାକାରପୁର, ନିମାପଡ଼ା ପଟୁ ଆସୁଥିବା ବସ୍ ମାଲତୀପାଟପୁର ଫ୍ଲାଏ ଓଭର ଦେଇ ତାଳବଣିଆକୁ ଯାଇ ସେଠାରେ ପାର୍କିଂ ହେବ । ଏହି ଦିବସକୁ ଛାଡ଼ି ଅନ୍ୟ ଦିନମାନଙ୍କରେ ବସ୍ ସବୁ ଗୁଣ୍ଡିଚା ମନ୍ଦିର ନିକଟ ପୌରପାଳିକା ବସ୍ଷ୍ଟାଣ୍ଡରେ ରହିବ । ଏସବୁର ସୁପରିଚାଳନା ପାଇଁ ପୁରୀ ଆର୍ଟିଓ ଅଫିସରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯିବ । ତାଳବଣିଆରେ ଯାତ୍ରୀଙ୍କ ପାଇଁ ଏକ ବୃହତ ଅସ୍ଥାୟୀ ବିଶ୍ରାମ କକ୍ଷ ନିର୍ମାଣ କରାଯିବ । ଏଥିରେ ୫୦୦୦ରୁ ଊର୍ଦ୍ଧ୍ୱ ଶ୍ରଦ୍ଧାଳୁଙ୍କ ପାଇଁ ରହିବା ବ୍ୟବସ୍ଥା ହେବ । ଏମାନଙ୍କ ପାଇଁ ଖାଦ୍ୟ, ପାନୀୟ ଏବଂ ଶୌଚାଳୟର ବ୍ୟବସ୍ଥା ମଧ୍ୟ କରାଯିବ ।
ନୀଳାଦ୍ରି ବିଜେ ପର୍ଯ୍ୟନ୍ତ ପରିବହନ ବିଭାଗର ସ୍ୱତନ୍ତ୍ର ୪ଟି ସ୍କ୍ୱାଡ୍ ସହରରେ ବୁଲିବେ । ଏମାନେ ନିୟମିତ ଭାବେ ଗାଡ଼ି ମୋଟରର ଯାଞ୍ଚ କରିବେ । ମଦ୍ୟପ ଚାଳକ, ଓଭର ସ୍ପିଡ୍, ଓଭର ଲୋଡିଂ ଗାଡ଼ିଗୁଡିକ ପ୍ରାଥମିକତାର ସହ ଯାଞ୍ଚ ହେବ । ଏନ୍ଏଚ୍ରେ କୌଣସି ଦୁର୍ଘଟଣା ହେଲେ ତତ୍କ୍ଷଣାତ ରାସ୍ତା ଖାଲି କରିବା ପାଇଁ ଏନ୍ଏଚ୍ର ବିଭିନ୍ନ ସ୍ଥାନରେ ସ୍ୱତନ୍ତ୍ର କ୍ରେନ୍ ସହ ଅଧିକାରୀମାନେ ନିୟୋଜିତ ରହିବେ ।
