ଇସ୍ଲାମାବାଦ: ଆର୍ଥିକ ଦୂରାବସ୍ଥା ଦେଇ ଗତି କୁରୁଥିବା ପାକିସ୍ତାନ ଏବେ ଋଣ କରିବାକୁ ଯାଉଛି । ବିଶ୍ବ ବ୍ୟାଙ୍କ ପାଖରୁ ୨୦ ବିଲିୟନ୍ ଡଲାର ଋଣ ଆଣିବ ପାକିସ୍ତାନ । ଗତ କିଛି ବର୍ଷ ହେଲା ପାକିସ୍ତାନର ଅର୍ଥନୀତି ବେହାଲ ହୋଇପଡ଼ିଛି । ପାକିସ୍ତାନର ଲୋକମାନେ ପେଟପୂରା ଖାଇବାକୁ ଅସମର୍ଥ ବୋଲି ରିପୋର୍ଟ ପ୍ରକାଶ ପାଉଛି । ଏଭଳି ସ୍ଥିତିରେ ଚୀନ୍, ସାଉଦି ଆରବ, ଋଷ ଏବଂ ଆମେରିକା ଭଳି ଦେଶ ପାଖରୁ ଋଣ କରିସାରିଛି ପାକିସ୍ତାନ।
ପରିସ୍ଥିତି ଏମିତି ହୋଇଛି ଯେ, ପାକିସ୍ତାନର ଶେହବାଜ ଶରିଫ ସରକାର ଋଣ କରି ଘିଅ ପିଇବା ନୀତି ଆପଣାଇଛନ୍ତି । ପୂର୍ବରୁ ଋଣ ଭାରରେ ବୁଡ଼ି ରହିଥିବା ପାକିସ୍ତାନ ପୁଣି ଥରେ ୨୦ ବିଲିୟନ୍ ଡଲାର ଋଣ କରିବ । ବିଶ୍ବ ବ୍ୟାଙ୍କ ପାକିସ୍ତାନକୁ ଋଣ ଦେବାକୁ ପ୍ରକ୍ରିୟା ଆରମ୍ଭ କରିଥିବା କୁହାଯାଉଛି ।
ପାକିସ୍ତାନୀ ଦେଶ ଭାଗିଦାରୀ ୨୦୨୫-୩୫ ନାମକ କାର୍ଯ୍ୟକ୍ରମ ଆଧାରରେ ଉପେକ୍ଷିତ ତଥା ମହତ୍ବପୂର୍ଣ୍ଣ କ୍ଷେତ୍ରରେ ସୁଧାର ଆଣିବାକୁ ଚେଷ୍ଟା କରିବେ ଶେହବାଜ ସରାକର । ଏହାକୁ ନଜରରେ ରଖି ବିଶ୍ବ ବ୍ୟାଙ୍କର ବୋର୍ଡ ଜାନୁଆରୀ ୧୪ରେ ପାକିସ୍ତାନକୁ ଋଣ ମଞ୍ଜୁର ଦିଗରେ ଗୁରୁତ୍ବପୂର୍ଣ୍ଣ ପଦକ୍ଷେପ ନେବ । ବିଶ୍ବ ବ୍ୟାଙ୍କର ଦକ୍ଷିଣ ଏସିଆ ଉପାଧ୍ୟକ୍ଷ ମାର୍ଟିନ ରେଜର ଇସ୍ଲାମାବାଦ ଆସିବାର ମଧ୍ୟ କାର୍ଯ୍ୟକ୍ରମ ଥିବା କୁହାଯାଉଛି ।
