ଛତ୍ରପୁର, ୨୭/୧୨: ଅଦିନିଆ ବର୍ଷା ପାଇଁ ସବୁଠୁ ଅଧିକ କ୍ଷତି ସହୁଛି ଚାଷୀ । ଦୁଇ ଥର ଲଗାଣ ବର୍ଷାରେ ଚାଷୀର ତାର ବର୍ଷକର ଅମଳ ଧାନ ଫସଲ ପାଣି ଜମି ନଷ୍ଟ ହେଉଥିବା ବେଳେ ଆଜି ପାଗରେ ପରିବର୍ତ୍ତନ ଆସିଛି । ଶୁକ୍ରବାର ଖରା ହେବା ପରେ ଚାଷୀ ଖଳାରେ ରଖିଥିବା ଧାନକୁ ଅମଳ କରୁଛି । ତେବେ ସବୁ ଧାନ ଏବେ ଗଜା ହୋଇଯାଇଥିବା ଦେଖିବାକୁ ମିଳିଛି ।
ଛତ୍ରପୁର ବ୍ଲକର ବିଭିନ୍ନ ପଞ୍ଚାୟତରେ ଏବେ ଏହି ଦୃଶ୍ୟ ଦେଖିବାକୁ ମିଳୁଛି । ଗଜା ଧାନକୁ ଚାଷୀ ତରବରିଆ ଭାବେ ଅମଳ କରିଦେଉଛି । ଯଦି ଅମଳ କରିବ ନାହିଁ ସବୁ ଧାନ ଜଗା ହୋଇ ନଷ୍ଟ ହୋଇଯିବ । ସେହିପରି କିଛି ଚାଷୀ ଧାନକୁ ଖରାରେ ଶୁଖାଉଥିବା ଦେଖିବାକୁ ମିଳିଛି । ଚାଷୀ କହିବା ମୁତାବକ ବର୍ଷା ଆବଶ୍ୟକୀୟ ସମୟରେ ହେଉନଥିଲା । ଅମଳ ବେଳେ ହେଲା ଏବେ ସବୁ ଧାନ ଗଜା ହୋଇଗଲା । ସରକାର ସମସ୍ତ ଧାନ ମଣ୍ଡିକୁ ନେବା ପାଇଁ ସେନେଇ ଦାବି କରିଛନ୍ତି । ଛତ୍ରପୁର ବ୍ଲକରେ ଚଳିତ ବର୍ଷ ୬୬୧୩ ଚାଷୀ ମଣ୍ଡିରେ ଧାନ ବିକ୍ରି ପାଇଁ ପଞ୍ଜିକରଣ କରିଛନ୍ତି । ଏହି ଦୁଇ ଥର ଲଗାଣ ବର୍ଷା ସେମାନଙ୍କୁ ମେରୁଦଣ୍ଡ ଭାଙ୍ଗିଯିବା ସହ ବୋଝ ଉପରେ ନଳିତା ବିଡା ସଦୃଶ ହୋଇଯାଇଛି । ଚାଷୀ ତାର ଫସଲ ପାଇଁ ଧାର କରଜ କରି ସୁନାର ଫସଲ କରିଥିଲା । ରୁଆ ସମୟରେ ବର୍ଷ ହେଉନଥିବା ବେଳେ ଏବେ ଅମଳ ବେଳେ ବର୍ଷା ଲାଗି ରହୁଛି । ଯାହାଫଳରେ ବର୍ଷକର ଅମଳ ଏବେ ନଷ୍ଟ ହୋଇଗଲା ବୋଲି ଚାଷୀ କହିବା ସହ ମଣ୍ଡିକୁ ନେବା ପାଇଁ ଆଉ ଧାନ ନଥିବ ବୋଲି କହିଛି ।
