ଖଲ୍ଲିକୋଟ,୨୩/୧୨: ରୋଜଗାର ଆଶା ୬ ମାସ ତଳେ ମାଳଦ୍ୱୀପ ଯାଇଥିଲେ ୫୫ରୁ ଉର୍ଦ୍ଧ୍ୱ ଓଡିଆ ଶ୍ରମିକ । ଗୋଟିଏ ମାସ ପରେ ଠିକ୍ ସମୟରେ ଦରମା ଦେଉନି କମ୍ପାନୀ । ସେଠାରୁ ଉଦ୍ଧାର ପାଇଁ ଏକ ଭିଡ଼ିଓ ମାଧ୍ୟମରେ ସରକାରଙ୍କୁ ଅନୁରୋଧ କରିଛନ୍ତି ଶ୍ରମିକ ଦଳ । ଗଞ୍ଜାମ ଜିଲ୍ଲା ଖଲ୍ଲିକୋଟ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମାଳଦ୍ୱୀପରେ ଚାଲିଥିବା ଏୟାରପୋର୍ଟ କାମ ପାଇଁ ୬ ମାସ ତଳେ ଖଲ୍ଲିକୋଟର ୧୫ ଜଣ ଯୁବକଙ୍କ ସମେତ ଓଡ଼ିଶାର ୪୦ ଜଣ ଯୁବକ ମାଳଦ୍ୱୀପ ଯାଇଥିଲେ । ସେଠାରେ ଗୋଟିଏ ମାସ କାମ କରିବା ପରେ ତାର ପରବର୍ତ୍ତୀ ମାସ ଠାରୁ ଠିକ୍ ଭାବରେ ଦରମା ଦେଉନି କମ୍ପାନୀ । ଶ୍ରମିକମାନଙ୍କୁ ଖାଇବା ଏବଂ ରହିବା ସୁବିଧା କମ୍ପାନୀ ଯୋଗାଇ ଦେବ ବୋଲି କୁହାଯାଇଥିବା ବେଳେ ବର୍ତ୍ତମାନ ଖାଇବା ପାଇଁ ଟଙ୍କା ମାଗୁଛି କମ୍ପାନୀ । ଏପରିକି ରହୁଥିବା ରୁମ୍ର ବିଦ୍ୟୁତ ବିଚ୍ଛିନ୍ନ କରି ଦେଉଛନ୍ତି କମ୍ପାନୀ କତୃପକ୍ଷ । ଏଭଳି ସ୍ଥିତିରେ ସେଠାରେ ଫସି ରହିଛନ୍ତି ସମସ୍ତ ଓଡ଼ିଆ ଶ୍ରମିକ । ତେଣୁ ଏକ ଭିଡିଓ ମାଧ୍ୟମରେ ସେମାନଙ୍କୁ ଉଦ୍ଧାର କରିବା ପାଇଁ ସରକାରଙ୍କୁ ଅନୁରୋଧ କରିଛନ୍ତି ଶ୍ରମିକ ଦଳ ।
