ଭୁବନେଶ୍ୱର,୨୪/୦୬: ରାଜ୍ୟରେ ଆଉଟ୍ସୋର୍ସିଂ ସରକାର ଚାଲିଛି । ନିର୍ବାଚନ ବେଳେ ବିଜେପି ଏଭଳି ଅଭିଯୋଗ ଆଣି ବାରମ୍ବାର ସରକାରଙ୍କୁ ଘେରୁଥିଲା । ଏବେ ରାଜ୍ୟରେ ଖୋଦ୍ ବିଜେପି ସରକାର ଗଢ଼ିଛି । ନୂଆ ସରକାର ଯେଉଁ ବିଭାଗରେ ହାତ ମାରୁଛନ୍ତି ସେଠାରୁ ମାଳ ମାଳ ଥଇଥାନ ନିଯୁକ୍ତି ବାହାରୁଛି । ୪୧ଟି ବିଭାଗରେ ୫୦୦ରୁ ଅଧିକ ଅବସରପ୍ରାପ୍ତ ଅଧିକାରୀଙ୍କୁ ଓଏସ୍ଡି ଭାବେ ପୁନଃ ନିଯୁକ୍ତି ଦିଆଯାଇଛି । ଏମିତି କୌଣସି ସରକାରୀ ବିଭାଗ ନାହିଁ ଯେଉଁଠି ଥଇଥାନ ନିଯୁକ୍ତି ହୋଇନାହିଁ ।
ସବୁଠୁ ଚକିତ କଲା ଭଳି କଥା ହେଉଛି ନଗର ଉନ୍ନୟନ ବିଭାଗ ଭଳି କିଛି ବିଭାଗକୁ ଅବସରପ୍ରାପ୍ତ ଅଧିକାରୀମାନେ କବ୍ଜା କରି ରଖିଛନ୍ତି । କହିବାଗୁ ଗଲେ ସରକାର ଏବେବି ପୂରା ଆଉଟ୍ସୋର୍ସିଂରେ ଚାଲିଛି । ଏହି ଆଉଟ୍ସୋର୍ସିଂ ଯନ୍ତାରୁ ପ୍ରଶାସନ ମୁକୁଳିବ ତ? ନୂଆ ସରକାର ଆଗରେ ଏହା ବିରାଟ ଚାଲେଞ୍ଜ ହୋଇ ଛିଡ଼ା ହୋଇଛି ।
ଅବସର ପରେ ସରକାରୀ ବିଭାଗରେ ପୁନଃନିଯୁକ୍ତି ଦେବାର ପ୍ରଥା ଆମ ରାଜ୍ୟରେ ଧୀରେ ଧୀରେ ପରମ୍ପରା ପାଲଟି ଗଲାଣି । ଯୋଗ୍ୟ ଅଧିକାରୀଙ୍କୁ ଅଣଦେଖା କରି ଅବସରପ୍ରାପ୍ତଙ୍କୁ ଆଣି ତାଙ୍କ ଉପରେ ବସାଯାଉଛି । ଗୃହ ନିର୍ମାଣ ଓ ନଗର ଉନ୍ନୟନ ବିଭାଗରେ ମାଳ ମାଳ ଅବସରପ୍ରାପ୍ତ ଅଧିକାରୀଙ୍କୁ ଥଇଥାନ କରାଯାଇଛି । ଓଏଏସରୁ ଆଇଏଏସ୍ ହୋଇଥିବା ସଂଗ୍ରାମଜିତ ନାୟକଙ୍କୁ ଅବସର ପରେ ବି ପୌର ନିର୍ଦ୍ଦେଶକ ତଥା ଅତିରିକ୍ତ ସଚିବ ଭାବେ ନିଯୁକ୍ତ କରାଯାଇଛି । ସେ ସରକାରୀ ଚାକିରିରୁ ଅବସର କରିବା ସତ୍ତେ୍ୱ ତାଙ୍କୁ ଏହି ପଦବୀରେ ଅବସ୍ଥାପିତ କରି ନ୍ୟାୟିକ କ୍ଷମତା ଦିଆଯାଇଛି ।
ନଗର ଉନ୍ନୟନ ବିଭାଗରେ ଆଉ ଏକ ଗୁରୁତ୍ୱପୂର୍ଣ୍ଣ ପଦବୀରେ ଅଛନ୍ତି ସଞ୍ଜୟ ପରମାଣିକ । ଭାରତୀୟ ରେଳ କାର୍ମିକ ସେବା ଅଧିକାରୀ (ଆଇଆରପିଏସ୍) ଭାବେ ଅବସର କରିବା ପରେ ଶ୍ରୀ ପରମାଣିକଙ୍କୁ ଗତ ଦୁଇ ବର୍ଷ ହେବ ଏହି ବିଭାଗରେ ସ୍ୱତନ୍ତ୍ର ସଚିବ ଭାବେ ନିଯୁକ୍ତି ଦିଆଯାଇଛି । ଏହି ବିଭାଗର ଗୁରୁତ୍ୱପୂର୍ଣ୍ଣ ପଦବୀରେ ଅବସ୍ଥାପିତ ଆଉ ଜଣେ ଅବସରପ୍ରାପ୍ତ ଅଧିକାରୀ ପ୍ରଦୀପ୍ତ ମହାପାତ୍ର । ସେ ନାଲ୍କୋରେ କାର୍ଯ୍ୟ କରୁଥିଲେ । ଅବସର ପରେ ତାଙ୍କୁ ନଗର ଉନ୍ନୟନ ବିଭାଗରେ ମୁଖ୍ୟଯନ୍ତ୍ରୀ ତଥା ଅତିରିକ୍ତ ସଚିବ ଭାବେ ନିଯୁକ୍ତ କରାଯାଇଛି । ଗତ ୧୦ ବର୍ଷ ହେବ ସେ ବିଭାଗର ପ୍ରୋକ୍ୟୁରମେଣ୍ଟ କମିଟିର ମୁଖ୍ୟ ଭାବେ କାର୍ଯ୍ୟ କରୁଛନ୍ତି । ତାଙ୍କ ଅଧୀନରେ ବିଭାଗ ଶହ ଶହ କୋଟି କୋଟି ଟଙ୍କା ସାମଗ୍ରୀ କ୍ରୟ କରୁଛି ।
ନଗର ଉନ୍ନୟନ ବିଭାଗ ଅଧୀନରେ ଥିବା ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ଏବଂ ଭୁବନେଶ୍ୱର ମହାନଗର ନିଗମ(ବିଏମ୍ସି)ରେ ମଧ୍ୟ ମାଳ ମାଳ ଅବସରପ୍ରାପ୍ତ ଅଧିକାରୀଙ୍କୁ ଥଇଥାନ କରାଯାଇଛି । ବିଡିଏର ଓଏସ୍ଡି ଲିଗାଲ, କାର୍ଯ୍ୟନିର୍ବାହୀ ଯନ୍ତ୍ରୀ ଓ ସ୍ୱତନ୍ତ୍ର ଅଡିଟ୍ ଅଫିସର ଭଳି ଅନେକ ପଦବୀରେ ଅବସରପ୍ରାପ୍ତଙ୍କୁ ଥଇଥାନ କରାଯାଇଛି । ବିଏମ୍ସିରେ ମୁଖ୍ୟଯନ୍ତ୍ରୀ ଥିବା ଅରୁଣ ନାୟକଙ୍କୁ ଅବସର ପରେ ପରାମର୍ଶଦାତା ଭାବେ ନିଯୁକ୍ତି ଦିଆଯାଇଛି । ଖାଲି ନଗର ଉନ୍ନୟନ ବିଭାଗ ନୁହେଁ, ପ୍ରତି ବିଭାଗରେ ୪ରୁ ୫ଜଣ ଅବସରପ୍ରାପ୍ତ ଓଏଏସ୍ ଅଫିସର ଓ ଓଡ଼ିଶା ସଚିବାଳୟ ସେବା ପାହ୍ୟାର ଅଧିକାରୀଙ୍କୁ ନିଯୁକ୍ତି ଦିଆଯାଇଛି । କେବଳ ସଚିବାଳୟ ନୁହେଁ, ଜିଲ୍ଲାସ୍ତରକୁ ଏହି ଥଇଥାନର ଚେର ଲମ୍ବିଛି ।
ଆହୁରି ଚମକାଇଲା ଭଳି କଥା ହେଉଛି, ଯେଉଁ ଅଧିକାରୀଙ୍କୁ ଅବସର ପରେ ନିଯୁକ୍ତି ଦିଆଯାଉଛି ତାଙ୍କୁ ମୋଟା ଅଙ୍କର ଦରମା ମିଳୁଛି । ସେ ଚାକିରି ସମୟରେ ଯେତିକି ଦରମା ପାଉଥିଲେ ଓ ଅବସର ପରେ ଯେତିକି ପେନସନ ପାଇଲେ ଉଭୟକୁ ହିସାବକୁ ନେଇ (ପେ’ରୁ ପେନସନକୁ କାଟି) ବାକି ଟଙ୍କା ଧରାଇ ଦିଆଯାଉଛି । ଜଣେ ଓଏଏସ୍ ଅଫିସର ଅବସର ପରେ ନିଯୁକ୍ତି ପାଇଲେ ମାସକୁ ପ୍ରାୟ ୧ଲକ୍ଷ ଟଙ୍କା ଦରମା ଧରୁଛନ୍ତି । ଆଇଏଏସ୍ ଅଫିସରମାନେ ଅବସର ପରେ ଆହୁରି ଅଧିକ ଟଙ୍କା ପାଉଛନ୍ତି ।
ସରକାରୀ ଚାକିରିରେ ନିଯୁକ୍ତି ଦେଉଥିବା ଓଡ଼ିଶା ଲୋକସେବା ଆୟୋଗ(ଓପିଏସ୍ସି) ଏବଂ ଓଡ଼ିଶା କର୍ମଚାରୀ ପ୍ରବରଣ ଆୟୋଗ(ଓଏସ୍ଏସସି)ର ଦୁଇ ମୁଖିଆଙ୍କୁ ଅବସର ପରେ ପୁନଃ ନିଯୁକ୍ତି ଦିଆଯାଇଛି । ଯେଉଁ ସଂସ୍ଥା ରାଜ୍ୟରେ ନିଯୁକ୍ତି ସୃଷ୍ଟି କରି ଯୋଗ୍ୟ ପ୍ରାର୍ଥୀଙ୍କୁ ନିଯୁକ୍ତି ଦେବା ପାଇଁ ଗଢ଼ାଯାଇଛି, ତାର ମୁଖ୍ୟ ପଦରେ ଅବସରପ୍ରାପ୍ତଙ୍କୁ ବସାଯାଇଛି ।
ପୂରା ସରକାରୀ ବ୍ୟବସ୍ଥା ଆଉଟ୍ସୋର୍ସିଂରେ ଚାଲିଛି । ଯେଉଁ କାମକୁ କାହାକୁ ନିଯୁକ୍ତି ଦେଇ ତୁଲାଇବା କଥା, ତାକୁ ସର୍ଭିସ୍ ପ୍ରୋଭାଇଡରଙ୍କୁ ଟେକି ଦିଆଯାଉଛି । ଏଥିପାଇଁ ମନଇଚ୍ଛା ଟଙ୍କା ଖର୍ଚ୍ଚ ହେଉଛି । ବିଭିନ୍ନ ବିଭାଗରେ ସୋସିଆଲ ମିଡିଆ ହ୍ୟାଣ୍ଡେଲ ପାଇଁ ବିଭାଗ କାହାକୁ ନିଯୁକ୍ତି ନ ଦେଇ କିଛି ଘରୋଇ ଏଜେନ୍ସିକୁ କାମ ଟେକି ଦେଉଛି । ଏଥିପାଇଁ ସେମାନେ ମାସିକ ଲକ୍ଷାଧିକ ଟଙ୍କା ନେଉଛନ୍ତି । ଗୋଟିଏ ଗୋଟିଏ ଏଜେନ୍ସି ଅଧୀନରେ କାମ କରୁଥିବା କର୍ମଚାରୀଙ୍କ ଦରମା ଆଇଏଏସ୍ ଏବଂ ଓଏଏସ୍ ଅଫିସରଙ୍କଠାରୁ ଟପିଯାଉଛି । ବିଭାଗକୁ ଏଭଳି ଖର୍ଚ୍ଚ ତାଲିକା ଦେଇ ଏଜେନ୍ସିମାନେ ଟଙ୍କା ଲୁଟୁଛନ୍ତି ।
ସ୍ମରଣଯୋଗ୍ୟ, ଗତ ମାର୍ଚ୍ଚ ମାସରେ ତତ୍କାଳୀନ ସରକାର ଆଉଟସୋର୍ସିଂ କର୍ମଚାରୀମାନଙ୍କ ମାସିକ ଦରମାରେ ୨୫% ବୃଦ୍ଧି ଘୋଷଣା କରିଥିଲେ । ଅଭିଜ୍ଞତା ଅନୁଯାୟୀ ଏହି ପ୍ରାପ୍ୟ ମଧ୍ୟ ଅଧିକ ହେବାର ବ୍ୟବସ୍ଥା ରହିଥିଲା । ମହିଳା ଆଉଟସୋର୍ସିଂ କର୍ମଚାରୀମାନଙ୍କ ପାଇଁ ମଧ୍ୟ ବିଭିନ୍ନ ସୁବିଧା ପ୍ରଦାନର ନିଷ୍ପତ୍ତି ହୋଇଥିଲା ।
