ବଣାଇଁ,୨୭/୦୭: ଦିନ ଥିଲା ଘରେ ଦୁଇ ଓଳି ଖାଇବାକୁ ନ ଥିଲା । ଏପରିକି ଭଙ୍ଗା ଦଦରା ମାଟିକାନ୍ଥ ଘରେ ରହୁଥିଲେ । କିଏ ଦିନ ମଜୁରିଆ ଭାବେ କାମ କରୁଥିଲା ତ ଆଉ କିଏ ଟେଣ୍ଟ ହାଉସ୍ ଚଳାଉଥିଲା । ମାତ୍ର ସେମାନେ ଆଜି କୋଟିପତି । ଆଉ ନାହିଁ ମାଟି କାନ୍ଥର ଘର । ତିଆରି କରିଛନ୍ତି ତିନି ମହଲା କୋଠା । ଅନ୍ଲାଇନ୍ ଗେମ୍ରୁ ୬ ଜଣ ହୋଇଛନ୍ତି କୋଟିପତି । ବ୍ୟାଙ୍କ ଆକାଉଣ୍ଟ ଜରିଆରେ କୋଟି କୋଟି ଟଙ୍କାର ବେନାମୀ କାରବାର ଜଣାପଡ଼ିବା ପରେ ସମ୍ପୃକ୍ତ ଯୁବକମାନେ ଆସିଛନ୍ତି ସ୍କାନରକୁ । ସୁନ୍ଦରଗଡ଼ ଜିଲ୍ଲା ବଣାଇଁ ଉପଖଣ୍ଡର ବଡ଼ଗୋଗୁଆ ଗ୍ରାମରେ ଶୁକ୍ରବାର ସକାଳେ କୋଲକାତା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ର ୪୦ ଜଣିଆ ଟିମ୍ ଅତର୍କିତ ଚଢ଼ାଉ କରିବା ପରେ ଏହା ସାମ୍ନାକୁ ଆସିଛି । ଏହି ଘଟଣା ସୁନ୍ଦରଗଡ଼ ଜିଲ୍ଲା ସମେତ ରାଜ୍ୟରେ ଚର୍ଚ୍ଚାର ବିଷୟ ହୋଇଛି । ଶନିବାର ସକାଳୁ ମଧ୍ୟ ଇଡି ଟିମ୍ ଚଢ଼ାଉ ଜାରି ରଖିଥିବା ଜଣାପଡିଛି।
ସୂଚନା ମୁତାବିକ,ବଡ଼ଗୋଗୁଆ ଗ୍ରାମରେ ରୁହନ୍ତି ଅରୁଣ କୁମାର ସାହୁ, ଶିଶିର ପ୍ରଧାନ, ବିଜୟ ପ୍ରଧାନ, ଡେଲିନ ପ୍ରଧାନ, ସେବା ସାହୁ ଓ କ୍ଷମାନିଧି ସାହୁ । ଏମାନଙ୍କ ମଧ୍ୟରୁ ଶିଶିର ଟେଣ୍ଟ ହାଉସ୍ ଚଳାଉଥିଲେ । ଅନ୍ୟମାନଙ୍କ ମଧ୍ୟରୁ କିଏ ଦିନ ମଜୁରିଆ କାମ କରୁଥିଲେ ତ ଆଉ କିଏ ବେକାର ହୋଇ ଘରେ ବସିଥିଲେ । ହେଲେ ଗତ ୮ବର୍ଷ ମଧ୍ୟରେ ସେମାନଙ୍କ ଜୀବନଶୈଳୀରେ ଆସିଥିଲା ବଡ଼ ପରିବର୍ତ୍ତନ । ସେମାନଙ୍କ ମାଟି ଘର ଜାଗାରେ ମୁଣ୍ଡ ଟେକିଥିଲା ଆଖି ଚମକାଇ ଦେବା ଭଳି କୋଠା । ଏପରି କି ଘରର ଛାତ ଉପରେ ମଧ୍ୟ ଟାଇଲ୍ ବିଛା ଯାଇଥିଲା । ଏହାକୁ ନେଇ ବଡ଼ଗୋଗୁଆ ଅଞ୍ଚଳବାସୀଙ୍କ ମଧ୍ୟରେ ଆରମ୍ଭ ହୋଇଯାଇଥିଲା ଚର୍ଚ୍ଚା । ହେଲେ ସମ୍ପୃକ୍ତ ଯୁବକଙ୍କ କାରବାର ବିଷୟରେ କେହି ଟେର୍ ପାଇପାରୁ ନ ଥିଲେ । କାରଣ ସେମାନେ ଅଧିକାଂଶ ସମୟ ଗାଁ ବାହାରେ ରହୁଥିଲେ । ତେବେ ଦୁଇବର୍ଷ ହେଲା ସେମାନେ ଅନ୍ଲାଇନ୍ ଗେମ୍ (ଫି-ୱିନ୍) ମାୟାଜାଲରେ ପଡ଼ିଥିଲେ । ଏହି ଗେମ୍ରେ ଟଙ୍କା ଲଗାଇ କୋଟି କୋଟି ଟଙ୍କା ରୋଜଗାର କରୁଥିବା ଜଣାପଡ଼ିବା ପରେ ଶୁକ୍ରବାର ସକାଳେ କୋଲକାତାରୁ ଇଡିର ୪୦ ଜଣିଆ ଟିମ୍ ୮ଟି ଗାଡ଼ିରେ ବଡ଼ଗୋଗୁଆ ଗାଁରେ ପହଞ୍ଚି ଚଢ଼ଉ ଆରମ୍ଭ କରିଥିଲେ । ସୁରକ୍ଷା ଦୃଷ୍ଟିରୁ ଯୁବକଙ୍କ ଘର ବାହାରେ ମୁତୟନ ହୋଇଥିଲେ ସିଆରପିଏଫ୍ ଯବାନ । ଗଣମାଧ୍ୟମ କିମ୍ବା ସାଧାରଣ ଲୋକ କାହାରିକୁ ଛଡ଼ାଯାଇ ନ ଥିଲା ।
ଉଲ୍ଲେଖଯୋଗ୍ୟ, ଫି-ୱିନ୍ ଅନ୍ଲାଇନ୍ ଗେମ୍ ଖେଳିବାକୁ ହେଲେ ୟୁଜର ଆଇଡି ନିମନ୍ତେ ୫ ହଜାରରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଦେବାକୁ ପଡ଼ିଥାଏ । ଜମା ଟଙ୍କା ଅନୁଯାୟୀ ଲାଭ ମିଳିଥାଏ । ଦିନକୁ ୫ରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଟ୍ରାଞ୍ଜେକ୍ସନ ହୋଇଥାଏ । ହେଲେ ସମ୍ପୃକ୍ତ ଯୁବକଙ୍କ ଦିନକୁ କେତେ ଟଙ୍କା ବ୍ୟାଙ୍କ ଟ୍ରାଞ୍ଜେକ୍ସନ ହେଉଥିଲା, ସେମାନେ ଆୟକର ଦେଉଥିଲେ କି ନାହିଁ ସେ ସବୁ ଦିଗକୁ ନେଇ ଖୋଳତାଡ଼ ଚଳାଇଛନ୍ତି ଇଡିର ଅଧିକାରୀମାନେ । ଇଡି ଖୋଳତାଡ଼ ଏବଂ ସ୍ଥାନୀୟ ଲୋକଙ୍କ ଚର୍ଚ୍ଚାରୁ ଅନେକ ତଥ୍ୟ ପଦାକୁ ଆସିଛି । ସମ୍ପୃକ୍ତ ୬ ଯୁବକ ବର୍ଷେ ତଳେ ରାଉରକେଲାର ଏକ ହୋଟେଲରେ ପ୍ରାୟ ଏକ ମାସ ରହି କାରବାର ଚଳାଇଥିଲେ । ଏହା ପରେ ସେମାନେ ଦେବଗଡ଼ ଚାଲି ଯାଇଥିଲେ । ଏବେ ୬ ମାସ ହେଲା ଭୁବନେଶ୍ୱରରେ ଡେରା ପକାଇଛନ୍ତି । କେବଳ ଏହି ୬ଜଣ ନୁହନ୍ତି, ବଣାଇଁ ସମେତ ଏହାର ଆଖପାଖ ଅଞ୍ଚଳର ୧୦୦ରୁ ଊଦ୍ଧ୍ୱର୍ ଯୁବକ କମ୍ ସମୟରେ କୋଟିପତି ହେବା ଲୋଭରେ ଅନ୍ଲାଇନ୍ ଗେମ୍ ମାୟାଜାଲରେ ପଡ଼ିଥିବା ଜଣାପଡ଼ିଛି । ତଦନ୍ତ ପରେ ପ୍ରକୃତ ତଥ୍ୟ ପଦାକୁ ଆସିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି ।
ଅପରପକ୍ଷେ ଇଡିର ଚଢ଼ଉକୁ ନେଇ ଅଡୁଆ ସ୍ଥିତି ସୃଷ୍ଟି ହୋଇଥିଲା । ଇଡି ଅଧିକାରୀମାନେ ବୁଦ୍ଧଦେବ ସାହୁଙ୍କ ଘରେ ପଶିଥିଲେ । ଘରେ କେହି ନ ଥିବାର ସୁଯୋଗ ନେଇ ଆଲମିରା ଖୋଲି ସୁନା ଓ ଟଙ୍କା ନେଇ ଯାଇଥିବା ଅଭିଯୋଗ ହୋଇଛି । ଏ ନେଇ ଶ୍ରୀ ସାହୁ ବଣାଇଁ ଥାନାରେ ଏତଲା ଦେଇଛନ୍ତି ।
