ଛତ୍ରପୁର ,୧।୭ (ଆପ୍ର): ଗଞ୍ଜାମ ପୁଲିସ ଜ଼ିଲ୍ଲାରେ ୫ଘଣ୍ଟା ମଧ୍ୟରେ ଗଡିଛି ୨ଟି ମୁଣ୍ଡ l ବେଗୁନିଆପଡା ବି, ନୁଆଁ ପଲ୍ଲୀରେ ସଂଘବଦ୍ଧ ଆକ୍ରମଣରେ ଜଣଙ୍କର ମୃତ୍ୟୁ ହୋଇଛି। ସେହିପରି ଛତ୍ରପୁର ଥାନା ଅନ୍ତର୍ଗତ ଗୋବା ଗ୍ରାମରେ ପୂର୍ବ ଶତ୍ରୁତ୍ରାକୁ ନେଇ ସଂଘବଦ୍ଧ ଆକ୍ରମଣରେ ଜଣଙ୍କର ମୃତ୍ୟୁ ଘଟିଥିବା ବେଳେ ୪ ଜଣ ଆହତ ହୋଇଛନ୍ତି। ମୃତକ ଜଣକ ହେଲେ ତୋଫାନ ସ୍ବାଇଁ (୨୫)। ଆହତମାନେ ହେଲେ ସୁଧୀର କୁମାର ସ୍ଵାଇଁ, ନନ୍ଦ ବାରିକ, କାଳିଆ ସାହୁ ଓ ରାହୁଲ୍ ସ୍ଵାଇଁ। ସୁଧୀରଙ୍କ ଅବସ୍ଥା ଗୁରୁତର ରହିଛି।  ଘଟଣା ସ୍ଥଳରେ ଛତ୍ରପୁର ପୋଲିସ ପହଂଚି ତଦନ୍ତ ଜାରି ରଖିଛି l

ତୋଫାନ ସ୍ଵାଇଁ ତାରାତାରିଣୀ ମନ୍ଦିରରୁ ଫେରୁଥିବା ସମୟରେ ଗୋବା ଗାଁ ଛକରେ ପୂର୍ବରୁ ପ୍ରସ୍ତୁତ ହୋଇ ରହିଥିବା ୧୫ରୁ ୧୭ ଜଣ ଦୁର୍ବୃତ୍ତ ସଂଘବଦ୍ଧ ଭାବେ ଖଣ୍ଡା, କାତି, ଡେଙ୍ଗା, ହକି ଷ୍ଟିକ୍, ଲୁହା ରଡ଼ ଆଦିରେ ତାଙ୍କୁ ଅତର୍କିତ ଆକ୍ରମଣ କରିଥିଲେ l ଫଳରେ ଖବର ପାଇଁ ତୋଫାନ ସ୍ଵାଇଁର କକା ପୁଅ ଭାଈ ସୁଧୀର ସ୍ୱାଇଁ ଓ ତାଙ୍କର ସମ୍ପର୍କୀୟ ଭାଇମାନେ ଘଟଣା ସ୍ଥଳରେ ପହଞ୍ଚିଥିଲେ l କିନ୍ତୁ ସେମାନଙ୍କୁ ମଧ୍ୟ ଛାଡ଼ି ନଥିଲେ ଦୁର୍ବୃତ୍ତ ମାନେ। ଆକ୍ରମଣରେ  ସେମାନେ ମଧ୍ୟ ଆହାତ ହୋଇଥିଲେ l ଗ୍ରାମବାସୀଙ୍କ ସହାୟତାରେ ସଙ୍ଗେ ସଙ୍ଗେ ୧୦୮ ଆମ୍ବୁଲାନ୍ସ ଯୋଗେ ଛତ୍ରପୁର ଉପଖଣ୍ଡ ଚିକିତ୍ସାଳୟକୁ ସମସ୍ତଙ୍କୁ  ଅଣାଯାଇଥିଲା l ସେଠାରେ ସମସ୍ତଙ୍କୁ ପ୍ରାଥମିକ ଚିକିତ୍ସା ପରେ ତୋଫାନ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ଏମକେସିଜି ମେଡିକାଲକୁ ସ୍ଥାନାନ୍ତରିତ କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ  ତାଙ୍କର ମୃତ୍ୟୁ ଘଟିଛି l ଅନ୍ୟ ପକ୍ଷେ ଛତ୍ରପୁର ପୋଲିସ ମେଡ଼ିକାଲ ଆସି ଆହତ ଙ୍କୁ ଭେଟି ପଚରାଉଚରା କରିଥିଲେ।  ଛତ୍ରପୁର ଉପଖଣ୍ଡ ପୋଲିସ ଅଧିକାରୀ ଚନ୍ଦନ ଘଢେଇଙ୍କ ନେତୃତ୍ୱରେ ଛତ୍ରପୁର ଥାନାଧିକାରୀ ଓ ତାଙ୍କ ଟିମ୍ ଗୋବା ଗ୍ରାମରେ ପହଞ୍ଚି ଜୋରଦାର ଛାନଭିନ ଆରମ୍ଭ କରିଛନ୍ତ।