ଭୁବନେଶ୍ୱର,୦୧/୦୬: ନିର୍ବାଚନ ସରିଲା। ପ୍ରଚାରରୁ ବିରତି ମିଳିଲା । ଏବେ ପୂରା ରିଲାକ୍ସ । ତେଣୁ ଅବସର ସମୟ କାଟିବା ପାଇଁ ବହି ପଢ଼ିବାର ବେଳ । ସେଥିଲାଗି ଦୁଇଟି ବହି କିଣିଛି । ‘ଆର୍ଯ୍ୟନ୍ସ’ ଓ ‘ସିକ୍ରେଟ୍ସ ଅଫ୍ ଶିମିଳିପାଳ’ । ଦୋକାନ ଆସି ବହି କିଣି ଫେରିବା ବେଳେ ହାତରେ ବହି ଧରି ବେଶ୍ ଖୁସି ଏବଂ ଫୂର୍ତ୍ତି ଦିଶୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହା ଥିଲା ଗଣମାଧ୍ୟମ ଆଗରେ ବକ୍ତବ୍ୟ ।
ଶୁକ୍ରବାର ସନ୍ଧ୍ୟା ୭ଟା ୪୫ । ମୁଖ୍ୟମନ୍ତ୍ରୀଙ୍କ ଗାଡ଼ି ଲାଗିଲା ମାଷ୍ଟର୍କ୍ୟାଣ୍ଟିନ୍ ସ୍ଥିତ ଏକ ପୁରୁଣା ବହି ଦୋକାନ ମଡର୍ଣ୍ଣ ବୁକ୍ ଡିପୋ ଆଗରେ। ଆଶ୍ଚର୍ଯ୍ୟ ହୋଇ ବାହାରକୁ ଦୌଡ଼ିଲେ ଦୋକାନରେ ଥିବା ମାଲିକ ଓମ୍ ପ୍ରକାଶଜୀ । ବୁଝୁବୁଝୁ ଜଣାପଡ଼ିଲା ମୁଖ୍ୟମନ୍ତ୍ରୀ କିଛି ବହି କିଣିବାକୁ ଚାହୁଁଛନ୍ତି। ସେ କିଛି କହିବା ପୂର୍ବରୁ ଦୋକାନ ଭିତରକୁ ନବୀନଙ୍କୁ ପାଛୋଟି ନେଲେ । ସାଙ୍ଗରେ ଥିଲେ ବିଜେଡି ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ଓ ସୁରକ୍ଷା କର୍ମୀ ।
ନବୀନ ଦୋକାନକୁ ଆସି ବିଭିନ୍ନ ବହି ଦେଖିଲେ ଓ ବାଛିଲେ । ଶେଷରେ ଦୁଇଟି ବହି ତାଙ୍କ ମନୋନୀତ ହେଲା । ଗୋଟିଏ ହେଲା, ଚାର୍ଲସ୍ ଆଲେନ୍ଙ୍କ ରଚିତ ‘ଆର୍ଯ୍ୟାନ୍ସ- ଦ ସର୍ଚ୍ଚ ଫର୍ ଏ ପିପୁଲ୍, ଏ ପ୍ଲେସ୍ ଆଣ୍ଡ୍ ଏ ମିଥ୍’ । ଅନ୍ୟ ପୁସ୍ତକଟି ଓଡ଼ିଶାର ଶିମିଳିପାଳ ଉପରେ ଆଧାରିତ ଡ. ଦେବବ୍ରତ ସ୍ୱାଇଁଙ୍କ ରଚିତ ‘ସିକ୍ରେଟ୍ସ ଅଫ୍ ଶିମିଳିପାଳ-ଏ ୱଣ୍ଡରଲ୍ୟାଣ୍ଡ୍ ଅଫ୍ ଏଲିଫାଣ୍ଟସ୍ ଆଣ୍ଡ୍ ମେଲାନିଷ୍ଟିକ୍ ଟାଇଗର୍ସ’ । ନବୀନ ଜଣେ ସ୍ୱନାମଧନ୍ୟ ଲେଖକ ଏବଂ ବହି ପ୍ରତି ତାଙ୍କର ଅହେତୁକ ଦୁର୍ବଳତା ରହିଛି । ଏଣୁ ଅଢ଼େଇ ହଜାର ଟଙ୍କା ଦେଇ ସେ ଦୁଇଟି ବହି କିଣିଥିଲେ ।
ଏଥିସହିତ ସେ ଭାରତ ଏବଂ ବିଶ୍ୱ ଇତିହାସ ସମ୍ବଳିତ ପୁସ୍ତକ ସମ୍ପର୍କରେ ପଚାରି ବୁଝିଥିଲେ । ପରେ ଆସି ଆଉ କିଛି ବହି କିଣିବେ ବୋଲି କହିଥିଲେ କିନ୍ତୁ ବିଶେଷ କିଛି କଥା ହୋଇନଥିଲେ । ମାତ୍ର ୧୦ରୁ ୧୫ ମିନିଟ୍, ଅର୍ଥାତ୍ ସନ୍ଧ୍ୟା ୭ଟା ୪୫ରୁ ୮ଟା ମଧ୍ୟରେ ନବୀନ ବହି ନେଇ ଫେରିଥିଲେ । ଗଲାବେଳକୁ ଫଟୋ ଉଠାଇଲେ, କୁନି ପିଲାଙ୍କ ସହ ସେଲ୍ଫି ନେଇ ସାବାସି ଜଣାଇଥିଲେଫ ବାହାରେ ଉତ୍ସାହିତ ଲୋକଙ୍କୁ ହାତ ହଲାଇ ଅଭିବାଦନ ଜଣାଇ ନବୀନ ଫେରିଯାଇଥିଲେ ବୋଲି ଦୋକାନ ମାଲିକ କହିଛନ୍ତି ।
ହଠାତ୍ ମୁଖ୍ୟମନ୍ତ୍ରୀଙ୍କୁ ଦୋକାନରେ ପାଇ ଖୁସି ହୋଇପଡ଼ିଥିବା ଓମ୍ ପ୍ରକାଶଜୀ କହିଛନ୍ତି, ଏ ଖୁସିର ସୀମା ନଥିଲା । ପୂର୍ବରୁ ଦୋକାନକୁ ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ, ଜାନକୀ ବଲ୍ଲଭ ପଟ୍ଟନାୟକଙ୍କ ସହ ବହୁ ବିଶିଷ୍ଟ ବ୍ୟକ୍ତି ଆସିଛନ୍ତି, କିନ୍ତୁ ନବୀନ ପଟ୍ଟନାୟକ ଆସି ନ ଥିଲେ । ସେ ଆସିବେ ବୋଲି ଆଗୁଆ କିଛି ଖବର ବି ନ ଥିଲା ।
ବହି କିଣି ଫେରିବା ପରେ ନବୀନ ନିବାସରେ ନବୀନ ପ୍ରସନ୍ନ ମନରେ ବସି ଟିଭି ଦେଖୁଥିଲେ । ସୌଭାଗ୍ୟକୁ ସେହି ସମୟରେ ଏକ ଓଡ଼ିଆ ଟିଭି ଚ୍ୟାନେଲ୍ରେ ତାଙ୍କ ବହି କିଣା ଖବର ହିଁ ପ୍ରସାରିତ ହେଉଥିଲା, ଯାହାର ଭିଡିଓ ଭାଇରାଲ୍ ହୋଇଛି । ବହି କିଣା ସମ୍ପର୍କରେ ସୋସିଆଲ୍ ମିଡିଆ ‘ଏକ୍ସ’ରେ ନବୀନ ଉଲ୍ଲେଖ କରିଛନ୍ତି କି, ‘ପୁସ୍ତକଗୁଡ଼ିକ ଆମର ଚିନ୍ତାଧାରାକୁ ଆକୃଷ୍ଟ କରେ । ଆମର ଜ୍ଞାନକୁ ବିସ୍ତାର କରେ । ଶୁକ୍ରବାର ମାଷ୍ଟର୍ କ୍ୟାଣ୍ଟିନ୍ରେ ଥିବା ଏକ ଦୋକାନରେ ଭଲ ପୁସ୍ତକ ସଂଗ୍ରହ ଦେଖି ଆନନ୍ଦିତ ହୋଇ କିଛି ପ୍ରିୟ ବହି କିଣିଲି । ଏଥିସହ ଯୁବକଙ୍କ ମଧ୍ୟରେ ପୁସ୍ତକ ପ୍ରତି ପ୍ରେମ ଦେଖି ଅତି ଆନନ୍ଦିତ । ଏହି ବହି କିଣା ମାଧ୍ୟମରେ ସେମାନଙ୍କ ପଢ଼ିବାର ଅଭ୍ୟାସକୁ ଆଉ ଟିକେ ଉତ୍ସାହିତ କଲି’ ।