ନୀଳଗିରି,୧୭/୪ : କିଛି ଦିନ ହେବ ଓଡ଼ିଶା ଯାତ୍ରା ଅପେରା ଖାଲି ଉଠୁଛି ପଡ଼ୁଛି। ଯାତ୍ରା ମାଲିକ ସଙ୍ଘ ଏବଂ କଳାକାରଙ୍କ ଭିତରେ ଆରୋପ ପ୍ରତ୍ୟାରୋପ ଚାଲିଛି। କିଏ ସାମାଜିକ ଗଣମାଧ୍ୟମରେ କାହାକୁ କ’ଣ କହିଲାଣି ତ କିଏ ବୟକଟ୍, ବ୍ୟାନ୍ କଲାଣି । ପୁଣି କିଏ ରହିଲେ ନାଟକ କରିବେନି ବୋଲି ନାଟ୍ୟଗୁରୁ କହିଲେଣି। ପୀୟୁସ, ନରି ପଣ୍ଡାଙ୍କ ପରେ ଏବେ ଅଭିନେତ୍ରୀ ସୋନାଲିଙ୍କୁ ନେଇ ବିବାଦ ମୁଣ୍ଡ ଟେକିଲାଣି। ଏହାରି ଭିତରେ ଯାତ୍ରା ମାଲିକ ସଙ୍ଘ ଏକଜୁଟ ହୋଇଥିବା ବେଳେ କଳାକାର ସଙ୍ଗ ସେମାନଙ୍କ ଏକତା ଦେଖାଇଲେଣି। ଉଭୟଙ୍କ ତୁ ତୁ ମେଁ ମେଁ ଭିତରେ ଚଳିତ ବର୍ଷ ଯାତ୍ରା କିଭଳି ହେବ ଏନେଇ ଚିନ୍ତାରେ ଯାତ୍ରା କମିଟି।
ଯାତ୍ରାରେ ଏଭଳି ଘଟଣାକୁ ନେଇ ଏବେ ଦର୍ଶକ ବି ମୁହଁ ମୋଡିଲେଣି। ଏନେଇ ଗୁରୁବାର ସକାଳେ ନୀଳଗିରି ସ୍ଵର୍ଣ୍ଣଚୁଡ଼ ଯାତ୍ରା କମିଟି ଏକ ଗୁରୁତ୍ଵପୂର୍ଣ୍ଣ ବୈଠକ କରିଛି। ଯଦି ଯାତ୍ରାକୁ ନେଇ ଏଭଳି ବିବାଦ ଚାଲେ ତେବେ ଚଳିତ ବର୍ଷ ଯାତ୍ରା କମିଟି ନିହାତି କ୍ଷତି ସହିବେ ବୋଲି ଆଶଙ୍କା ପ୍ରକଟ କରିଛନ୍ତି। ତେଣୁ କମିଟିର ସଦସ୍ୟମାନେ ଏହା ବିରୋଧରେ ପ୍ରତିବାଦର ସ୍ଵର ଉଠାଇଛନ୍ତି। ମାଲିକ ଓ କଳାକାର ସଙ୍ଘ ବସି ନିଷ୍ପତ୍ତି ନେଇ ବିବାଦର ଅବସନ ନ ଘଟାଇଲେ ଚଳିତବର୍ଷ ଯାତ୍ରା ଆଣିବେ ନାହିଁ ବୋଲି ନୀଳଗିରି ଯାତ୍ରା କମିଟି ନିଷ୍ପତ୍ତି ନେଇଛି।
