ନବରାତ୍ରି ମହୋତ୍ସବର ଅଷ୍ଟମ ଦିନର ବିଶେଷ ମହତ୍ତ୍ୱ ରହିଛି । ଏହି ଦିନକୁ ମହାଷ୍ଟମୀ କିମ୍ୱା ଦୁର୍ଗା ଅଷ୍ଟମୀ ମଧ୍ୟ କୁହାଯାଏ । ଚଳିତ ବକ୍ଷ ଦୁର୍ଗଷ୍ଟମୀ ଏପ୍ରିଲ୫ ତାରିଖ ଅର୍ଥାତ ଆଜି ପଡ଼ୁଛି । ନବରାତ୍ରିର ଅଷ୍ଟମ ଦିନରେ ମାଆ ଦୁର୍ଗାଙ୍କୁ ଦେବୀ ମହାଗୌରୀଙ୍କୁ ରୂପରେ ପୂଜା କରାଯାଇଥାଏ । ମାଆ ମହାଗୌରୀ ଅତ୍ୟନ୍ତ ଗୋରା ହେତୁ, ତାଙ୍କୁ ମହାଗୌରୀ କିମ୍ୱା ଶ୍ୱେତାମ୍ୱରଧା ବୋଲି ମଧ୍ୟ କୁହାଯାଇଥାଏ । ତେଣୁ ନବରାତ୍ରିର ଅଷ୍ଟମ ଦିନର ରହିଛି ବିଶେଷ ମହତ୍ତ୍ୱ । ଏହି ଦିନ ଛୋଟ ଛୋଟ ଝିଅ ମାନଙ୍କୁ ମାଆଙ୍କ ସ୍ୱରୂପ ଭାବରେ ପୂଜା କରାଯାଇଥାଏ । ଶାସ୍ତ୍ର ଅନୁଯାୟୀ, ମାଆଙ୍କୁ ଏହିଦିନ ପୂଜା କରିବା ଦ୍ୱାରା ସମସ୍ତ ପାପରୁ ମୁକ୍ତି ମିଳିଥାଏ ।
ବିଶ୍ୱାସ କରାଯାଏ ଯେ, ମାଆ ମହାଗୌରୀ ଅତ୍ୟନ୍ତ ଗୋରା ଏବଂ ତାଙ୍କୁ ପୂଜା କରିବା ଦ୍ୱାରା ଜୀବନରେ ଧନ, ସୁଖ ସମୃଦ୍ଧିର ଆଗମନ ହୋଇଥାଏ । ମାହାଗୌରୀଙ୍କ ରଙ୍ଗ ଗୋରା ଏବଂ ତାଙ୍କ ବସ୍ତ୍ର କଳା ରଙ୍ଗର । ତାଙ୍କ ବୟସ ମାତ୍ର ୮ ବର୍ଷର ବୋଲି ବିଶ୍ୱାସ କରାଯାଏ । ମାଆଙ୍କର ୪ଟି ହାତ ରହିଛି ଏବଂ ସେ ଶଣ୍ଢକୁ ନିଜର ବାହନ କରିଥିବାରୁ ତାଙ୍କୁ ବୃଷରୁଦ୍ଧା ବୋଲି ମଧ୍ୟ କୁହାଯାଇଥାଏ । ତାଙ୍କୁ ଶ୍ୱେତାମ୍ୱର ବୋଲି ମଧ୍ୟ କୁହାଯାଏ । ମାଆ ହେଉଛନ୍ତି ପାର୍ବତୀଙ୍କର ଏକ ରୂପ । ତେଣୁ ମାଆଙ୍କୁ ପୂଜା କରିବା ଦ୍ୱାରା ପୂଜକ ଅଲୌକିକ ଶକ୍ତିର ଅଧିକାରୀ ହୋଇଥାଏ । ମାଆ ତାଙ୍କ ଭକ୍ତଙ୍କ ପ୍ରତ୍ୟେକ ମନୋବାଞ୍ଛା ନିଶ୍ଚୟ ପୁରଣ କରିଥାନ୍ତି । ମହାଗୌରୀଙ୍କ ଆରାଧନା କରିବା ଦ୍ୱାରା ସମସ୍ତ ପାପରୁ ମଧ୍ୟ ମୁକ୍ତି ମିଳିଥାଏ । ମନ ଏବଂ ଶରୀର ପବିତ୍ର ହୋଇଥାଏ । ମାଆଙ୍କୁ ସ୍ୱଚ୍ଛ ମନରେ ପୂଜା କରିବା ଦ୍ୱାରା ଏକାଗ୍ରତା ମଧ୍ୟ ବଢିଥାଏ ।
ପୂଜା ପଦ୍ଧତି-
ଆଜି ସକାଳୁ ଉଠି ଶୀଘ୍ର ସ୍ନାନ କରନ୍ତୁ । ତାପରେ ଘରେ ଥିବା ପୂଜା ସ୍ଥଳୀକୁ ଗଙ୍ଗାଜଳ ସିଞ୍ଚନ କରି ପବିତ୍ର କରନ୍ତୁ । ଗଙ୍ଗା ଜଳରେ ଦେବୀ ଦୁର୍ଗାଙ୍କୁ ଅଭିଷେକ କରନ୍ତୁ । ପରେ ମାଆଙ୍କ ସମ୍ମୁଖରେ ଦୀପ ପ୍ରଜ୍ୱଳନ କରନ୍ତୁ । ମାଆଙ୍କୁ ଚାଉଳ, ସିନ୍ଦୁର ଏବଂ ଲାଲ୍ ଫୁଲ ଅର୍ପଣ କରନ୍ତୁ । ପ୍ରସାଦ ରୂପରେ ଫଳ ଏବଂ ମିଠା ଅର୍ପଣ କରନ୍ତୁ । ଏହା ପରେ ଧୂପ ଏବଂ ଦୀପ ଜଳାଇ ମାଆଙ୍କ ଆଳତୀ କରନ୍ତୁ । ଏହି ସମୟରେ ମାଆଙ୍କୁ କେବଳ ସାତ୍ତ୍ୱିକ ଆହାର ପ୍ରସାଦ ଭାବରେ ଅର୍ପଣ କରନ୍ତୁ । ଆଜି ମାଆଙ୍କୁ ନୈବେଦ୍ୟ ମଧ୍ୟ ଅର୍ପଣ କରିପାରିବେ । ଖାଦ୍ୟ ଅର୍ପଣ କରିବା ପରେ ଏହାକୁ ପ୍ରସାଦ ଭାବରେ ବଣ୍ଟନ କରନ୍ତୁ ।
କନ୍ୟା ପୂଜନ-
ଆଜି ମାଆଙ୍କ ପୂଜା କରିବା ପରେ ଛୋଟଛୋଟ ଝିଅ ମାନଙ୍କୁ ପୂଜା କରନ୍ତୁ । ସେମାନଙ୍କୁ ନିଜ ଘରକୁ ସ୍ୱାଗତ କରି ଆଣନ୍ତୁ ଏବଂ ତାଙ୍କ ପାଦ ଧୋଇ ସେମାନଙ୍କୁ ସ୍ୱଚ୍ଛ ସ୍ଥାନରେ ବସାନ୍ତୁ । ତାଙ୍କୁ ପୂଜା କରନ୍ତୁ ଏବଂ ଏହା ପରେ ସେମାନଙ୍କୁ ସାତ୍ତ୍ୱିତ ଭୋଜନ ଖାଇବାକୁ ଦିଅନ୍ତୁ । ଏହା ପରେ ସେମାନଙ୍କୁ ସେମାନଙ୍କୁ ପୂଣି ଥରେ ପୂଜା କରି କିଛି ଖାଦ୍ୟପଦାର୍ଥ ସହ କିଛି ପ୍ରସାଧାନୀ ସାମଗ୍ରୀ ମଧ୍ୟ ପ୍ରଦାନ କରନ୍ତୁ । ଏପରି କରିବା ଦ୍ୱାରା ମାଆ ଅତ୍ୟନ୍ତ ପ୍ରସନ୍ନ ହୋଇଥାନ୍ତି । କାରଣ ମାଆଙ୍କ ମହାଗୌରୀ ରୂପରେ ମାଆ ଜଣେ ୮ ବର୍ଷର ବାଳିକା । ତେଣୁ ଆଜି ଛୋଟଛୋଟ ବାଳିକାମାନଙ୍କୁ ପୂଜା କରିବା ଦ୍ୱାରା ମାଆ ପ୍ରସନ୍ନ ହୋଇଥାନ୍ତି ।
ମାଆ ମହାଗୌରୀଙ୍କ ମନ୍ତ୍ର-
ଯାଦେବୀ ସର୍ବ ଭୁତେଷୂ ମା ଗୌରୀ ରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ।।
