ନୂଆଦିଲ୍ଲୀ,୨୩/୧୨: ସେମାନେ ଖରାକୁ ଖାତିର କରନ୍ତି ନାହିଁ । ବର୍ଷା ଶୀତ ସବୁକୁ ସହି ଯାଆନ୍ତି । ତାଙ୍କ ଝାଳବୁହା ପରିଶ୍ରମରେ ସବୁଜ ସୁନ୍ଦର ହୋଇ ଉଠେ କ୍ଷେତ । ସୁନାର ଫସଲ ହସିଉଠେ । ସେମାନ ହେଲେ ଆମ ଅନ୍ନଦାତା ଚଷା ପୁଅ । ଆଜି ସେମାନଙ୍କ ପାଇଁ ଦିନ ଟିଏ । ପ୍ରତିବର୍ଷ ଡିସେମ୍ବର ୨୩ ତାରିଖକୁ ଜାତୀୟ କୃଷକ ଦିବସ ଭାବେ ପାଳନ କରାଯାଏ । ଏହି ଦିନ ପ୍ରଖ୍ୟାତ କୃଷକ ନେତା ତଥା ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂହଙ୍କ ଜନ୍ମଜୟନ୍ତୀ । ତାଙ୍କ ଅବଦାନକୁ ମନେପକାଇବାକୁ ଏହି ଦିବସର ପରିକଳ୍ପନା କରାଯାଇଛି ।
କୃଷକ ଦିବସ ଇତିହାସ-ପ୍ରତିବର୍ଷ ଡିସେମ୍ବର ୨୩ ତାରିଖକୁ ଜାତୀୟ କୃଷକ ଦିବସ ଭାବେ ପାଳନ କରାଯାଏ । ପୂର୍ବତନ ପ୍ରଧାନମନ୍ତ୍ରୀ ତଥା କୃଷକ ନେତା ଚୌଧୁରୀ ଚରଣ ସିଂହଙ୍କ ଜନ୍ମଜୟନ୍ତୀକୁ କୃଷକ ଦିବସ ଭାବେ ପାଳନ କରାଯାଏ । ତାଙ୍କ ଅବଦାନକୁ ମନେପକାଇବାକୁ ଏହି ଦିବସର ମୁଖ୍ୟ ଉଦ୍ଦେଶ୍ୟ । କୃଷକଙ୍କ ସମାଜିକ, ଆର୍ଥିକ ବିକାଶରେ ଯୋଗଦାନକୁ ସମ୍ମାନ ଦେବା ଏବଂ ସେମାନଙ୍କ କଲ୍ୟାଣ ପାଇଁ ସଚେତନ ସୃଷ୍ଟି କରିବା ଦିବସର ଲକ୍ଷ୍ୟ । କୃଷକଙ୍କ ଜୀବନରେ ଉନ୍ନତି ଆଣିବା ପାଇଁ ପ୍ରଖ୍ୟାତ କୃଷକ ନେତା ତଥା ଦେଶର ପଞ୍ଚମ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂହଙ୍କର ଅବଦାନ ରହିଥିଲା । ୧୯୦୨ ମସିହା ଆଜିର ଦିନରେ ଉତ୍ତରପ୍ରଦେଶର ହାପୁର ଜିଲ୍ଲା ବର୍ତ୍ତମାନର ମିରଟର ନୂପୁର ଗ୍ରାମରେ ଜନ୍ମଗ୍ରହଣ କରିଥିଲେ ଚୌଧୁରୀ ଚରଣ ସିଂହ । ସେ କୃଷିକ୍ଷେତ୍ର ଓ କୃଷକମାନଙ୍କର ହିତ ପାଇଁ ଅନେକ ଯୋଜନା ପ୍ରଣୟନ କରିଥିଲେ ।
ଉତ୍ତରପ୍ରଦେଶର ଦୁଇ ଥର ମୁଖ୍ୟମନ୍ତ୍ରୀ ରହିଥିବା ଚୌଧୁରୀ ଚରଣ ସିଂହ ଜମି ସଂସ୍କାରରେ ପ୍ରମୁଖ ଭୂମିକା ଗ୍ରହଣ କରିଥିଲେ । ୧୯୫୨ରେ କେନ୍ଦ୍ର କୃଷି ମନ୍ତ୍ରୀ ଥିବାବେଳେ ଜମିଦାର ପ୍ରଥା ଉଚ୍ଛେଦର ନେତୃତ୍ବ ନେଇଥିଲେ । ୧୯୭୮ରେ କୃଷକମାନଙ୍କ ମଧ୍ୟରେ ଏକତା ସ୍ଥାପନ ପାଇଁ କିଷାନ ଟ୍ରଷ୍ଟ ନାମରେ ଏକ ସଂଗଠନ ଗଢିଥିଲେ । କୃଷି ଓ କୃଷକର ଉନ୍ନତିରେ ଦେଶର ପ୍ରଗତି ସମ୍ଭବ ହୋଇଥାଏ । ସେମାନଙ୍କ ଝାଳବୁହା ପରିଶ୍ରମର ପରିଣାମ ଲୋକଙ୍କୁ ଖାଦ୍ୟଶସ୍ୟ ମିଳିଥାଏ । ତେଣୁ କୃଷକଙ୍କୁ ସମ୍ମାନ ଦେବା ଆବଶ୍ୟକ ବୋଲି ଦେଶବାସୀଙ୍କୁ ବୁଝାଇବାକୁ ଚାହୁଁଥିଲେ ଚୌଧୁରୀ ଚରଣ ସିଂହ । ଦେଶର କୃଷକଙ୍କୁ ସମ୍ମାନ ଜଣାଇବା ସହ କୃଷକ ନେତା ଚୌଧୁରୀ ଚରଣ ସିଂହଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ ପୂର୍ବକ ୨୦୦୧ ମସିହାରୁ କୃଷକ ଦିବସ ପାଳନ ହୋଇ ଆସୁଛି ।
#WATCH | Delhi: Vice President Jagdeep Dhankhar says "On the occasion of Kisan Diwas, I salute all the farmers of India. In 2001, the right decision was taken and Kisan Diwas was started in the name of such a great man who dedicated his life to the nation's development along with… https://t.co/zK2N54eIRG pic.twitter.com/Lwf4WRQUWq
— ANI (@ANI) December 23, 2024
କୃଷକ ନେତାଙ୍କୁ ଶ୍ରଦ୍ଧାଞ୍ଜଳି- କୃଷକ ଦିବସ ଅବସରରେ କୃଷକ ନେତା ତଥା ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂହଙ୍କୁ ଦିଲ୍ଲୀ ଶ୍ରଦ୍ଧାଞ୍ଜଳି ଦେଇଛନ୍ତି ପ୍ରମୁଖ ବ୍ୟକ୍ତି ବିଶେଷ । ଦିଲ୍ଲୀ କିସାନ ଘାଟରେ ଉପରାଷ୍ଟ୍ରପତି ଜଗଦୀପ ଧନଖର, ଆଏଲଡି ମୁଖ୍ୟ ତଥା ଚରଣ ସିଂହଙ୍କ ନାତି ଜୟନ୍ତ ଚୌଧୁରୀ ପ୍ରମୁଖ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ମହାନ ବ୍ୟକ୍ତିତ୍ବ ଯିଏକି ତାଙ୍କ ଜୀବନକୁ ଦେଶର ଉନ୍ନତି ପାଇଁ ଉତ୍ସର୍ଗ କରିଥିଲେ । ତାଙ୍କ ଚିନ୍ତାଧାର ଆମ ପାଇଁ ଉଦାହରଣ । ଆସନ୍ତାବର୍ଷ କୃଷକ ଦିବସ ୨୫ ବର୍ଷ ପୂରଣ କରିବ । କୃଷକଙ୍କୁ ଅନ୍ନଦାତା ତଥା ଭାରତ ବିଧାତାର ପରିଚୟ ମିଳିବ ବୋଲି କହିଛନ୍ତି ଉପରାଷ୍ଟ୍ରପତି ।
