ନୂଆଦିଲ୍ଲୀ: ପାକିସ୍ତାନ ସହ ସୀମାରେ ଅସ୍ତ୍ରବିରତି ପରେ, ଆଜି ଅର୍ଥାତ୍ ବୁଧବାର ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ କ୍ୟାବିନେଟ ଏବଂ ସୁରକ୍ଷା ସମ୍ପର୍କିତ କ୍ୟାବିନେଟ କମିଟି (CCS) ର ଏକ ବୈଠକ ଅନୁଷ୍ଠିତ ହେବ। କ୍ୟାବିନେଟ ବୈଠକ ସକାଳ ୧୧ଟାରେ ଅନୁଷ୍ଠିତ ହେବ, ତା’ପରେ CCS ବୈଠକ ହେବ। ସୂଚନାଥାଉକି ଯେ, ପହଲଗାମ ଆକ୍ରମଣ ପରେ, CCS ର ଦୁଇଟି ବୈଠକ ହୋଇସାରିଛି। ଆଜି ହେବାକୁ ଥିବା ବୈଠକରେ 'ଅପରେସନ୍ ସିନ୍ଦୂର' ପରେ ରଣନୀତି, ପହଲଗାମ୍ ଆତଙ୍କବାଦୀ ଆକ୍ରମଣର ତଦନ୍ତ ଏବଂ ଅସ୍ତ୍ରବିରତି ପରବର୍ତ୍ତୀ ପରିସ୍ଥିତି ଉପରେ ଆଲୋଚନା ହୋଇପାରେ ବୋଲି ବିଶ୍ୱାସ କରାଯାଉଛି।

କ୍ୟାବିନେଟ ବୈଠକରେ ସମସ୍ତ କ୍ୟାବିନେଟ ମନ୍ତ୍ରୀ ଯୋଗଦେବେ। ଅନ୍ୟ ପକ୍ଷରେ ସିସିଏସ୍ ବୈଠକରେ ପ୍ରଧାନମନ୍ତ୍ରୀ ମୋଦୀଙ୍କ ସହିତ ପ୍ରତିରକ୍ଷା ମନ୍ତ୍ରୀ, ଗୃହମନ୍ତ୍ରୀ, ଅର୍ଥମନ୍ତ୍ରୀ ଏବଂ ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ) ଅଜିତ ଡୋଭାଲ ଯୋଗଦେବେ। ସୂତ୍ର ଅନୁସାରେ, ପ୍ରତିରକ୍ଷା ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ ଏବଂ ବୈଦେଶିକ ମନ୍ତ୍ରଣାଳୟର ଉଚ୍ଚ ଅଧିକାରୀଙ୍କ ରିପୋର୍ଟ ଏବଂ ଗୁଇନ୍ଦା ସୂଚନା ଆଧାରରେ ବୈଠକରେ ଏକ ବଡ଼ ନିଷ୍ପତ୍ତି ନିଆଯାଇପାରେ।

ସୂଚନାଥାଉକି, ପହଲଗାମରେ ହୋଇଥିବା ବର୍ବର ଆତଙ୍କବାଦୀ ଆକ୍ରମଣ ପରେ, CCS ପୂର୍ବରୁ ଦୁଇଥର ବୈଠକ କରିସାରିଛି। ୨୩ ଏପ୍ରିଲରେ ଅନୁଷ୍ଠିତ ପ୍ରଥମ ବୈଠକରେ ଆକ୍ରମଣର ଦୋଷୀମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ନିଆଯାଇଥିଲା। ଏହା ପରେ, ଏପ୍ରିଲ ୩୦ ତାରିଖରେ ପ୍ରଧାନମନ୍ତ୍ରୀ ବାସଭବନରେ ଦ୍ୱିତୀୟ ବୈଠକ ଅନୁଷ୍ଠିତ ହୋଇଥିଲା,ଯେଉଁଥିରେ ଜମ୍ମୁ-କାଶ୍ମୀରର ସୁରକ୍ଷା ପରିସ୍ଥିତି ସମୀକ୍ଷା କରାଯାଇଥିଲା ଏବଂ ଆତଙ୍କବାଦୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେନାକୁ ସ୍ୱାଧୀନତା ଦିଆଯାଇଥିଲା। ଏହାପରେ ତିନି ବାହିନୀ ମିଶି 'ଅପରେସନ୍ ସିନ୍ଦୂର' ଆରମ୍ଭ କରିଥିଲେ ଏବଂ ଆତଙ୍କବାଦୀଙ୍କ ସହିତ ପାକିସ୍ତାନକୁ ମଧ୍ୟ ଶିକ୍ଷା ଦେଇଥିଲେ।