ନାକଟିଦେଉଳ,୧୯/୧୧: ପୁଣି ଶିକାରୀଙ୍କ ବିଦ୍ୟୁତ୍ ଫାଶରେ ପଡ଼ିଛନ୍ତି ହାତୀ । ଗୋଟିଏ କି ଦୁଇଟି ନୁହେଁ, ଥରକରେ ଯାଇଛି ୩ ହାତୀଙ୍କ ଜୀବନ । ତନ୍ମଧ୍ୟରେ ଦୁଇଟି ମାଈ ହାତୀ ଓ ଗୋଟିଏ ଛୁଆ । ସମ୍ବଲପୁର ଜିଲ୍ଲା ନାକଟିଦେଉଳ ବନାଞ୍ଚଳରେ ଘଟିଥିବା ଏହି ଘଟଣା ରାଜ୍ୟବ୍ୟାପୀ ଆଲୋଡ଼ନ ସୃଷ୍ଟି କରିଛି । ଏହି ଘଟଣାରେ ସମ୍ପୃକ୍ତ ୪ ଶିକାରୀଙ୍କୁ ଗିରଫ କରାଯାଇଛି ।
ବିଭାଗୀୟ କର୍ମଚାରୀଙ୍କ ଅବହେଳାରୁ ଏଭଳି ଅଘଟଣ ଘଟିଥିବା ପିସିସିଏଫ୍ ସୁଶାନ୍ତ ନନ୍ଦ ସ୍ପଷ୍ଟ କରିବା ସହ ଗଭୀର ଉଦ୍ବେଗ ବ୍ୟକ୍ତ କରିଛନ୍ତି । ବିଦ୍ୟୁତ ବିଭାଗ ସହ ବନ ବିଭାଗ ପାଟ୍ରୋଲିଂ ଠିକ୍ ଭାବେ କରିନି । ପାଟ୍ରୋଲିଂ କରି ବିଛାଯାଇଥିବା ବିଦ୍ୟୁତ୍ ତାରକୁ ହଟାଇବାର ଥିଲା । ସିସିଏଫ୍ ଓ ଆର୍ସିସିଏଫ୍ଙ୍କୁ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି । ବନ୍ୟପ୍ରାଣୀ ମୁଖ୍ୟାଳୟର ଜଣେ ସିସିଏଫ୍ଙ୍କୁ ତଦନ୍ତ ଦାୟିତ୍ୱ ଦିଆଯାଇଛି । ବନ ବିଭାଗ ଏନେଇ ତ୍ୱରିତ କାର୍ଯ୍ୟାନୁଷ୍ଠାନ ନେଇଛି । ୨ ଜଣ ଫରେଷ୍ଟରଙ୍କ ସମେତ ୩ଜଣ କ୍ଷେତ୍ର କର୍ମଚାରୀଙ୍କୁ ନିଲମ୍ବିତ କରାଯାଇଛି । ସେହିପରି ରେଢ଼ାଖୋଲ ଡିଏଫ୍ଓ ଏବଂ ନାକଟିଦେଉଳ ରେଞ୍ଜରଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁପାରିସ କରାଯାଇଛି ।
ସମସ୍ତ ବନାଞ୍ଚଳରେ ହାତୀ ସୁରକ୍ଷାକୁ ସୁନିଶ୍ଚିତ କରିବା ଓ ହାତୀମୃତ୍ୟୁ ଏଡ଼ାଇବା ଲାଗି ଆବଶ୍ୟକ ପଦକ୍ଷେପ ନେବାକୁ ସେ ସମସ୍ତ ଆର୍ସିସିଏଫ୍ଙ୍କୁ ଚିଠି ଲେଖିଛନ୍ତି । ସର୍କିଟ୍ ବ୍ରେକର ସହ ଅଟୋ-ରିକ୍ଲୋଜ ସୁବିଧାକୁ ବାଧ୍ୟତାମୂଳକ କରିବାକୁ ପରାମର୍ଶ ଦେଇଛନ୍ତି । ଜଙ୍ଗଲରେ ୧୧ କେଭି ତାର ଲାଇନ୍ ଯାଇଥିଲେ, ଭୂମିଠୁ ଅତିକମ୍ରେ ୫.୫ ମିଟର ଦୂରତା ବଜାୟ ରଖିବାକୁ କୁହାଯାଇଛି ।
ନାକଟିଦେଉଳ ରେଞ୍ଜ ଘୋଷରାମାଳ ସେକ୍ସନର ଶିବ ମନ୍ଦିର ନିକଟ ବୁରାମାଳ ଗାଁ ରାସ୍ତାଠାରୁ ଅଳ୍ପ ଦୂରରେ ୩ଟି ହାତୀ ମରି ପଡ଼ିଥିବା ସୋମବାର ଭୋର୍ରୁ ଜଣାପଡ଼ିଥିଲା । ମୃତ ଦୁଇ ମାଈ ହାତୀଙ୍କ ଆନୁମାନିକ ବୟସ ୩୦ରୁ ୩୫ ବର୍ଷ ମଧ୍ୟରେ ହେବ । ସେହିପରି ଛୁଆଟି ପ୍ରାୟ ୨ ବର୍ଷର ବୋଲି ଅନୁମାନ କରାଯାଉଛି । ସମସ୍ତଙ୍କ ଗୋଡ଼ରେ ବିଦ୍ୟୁତ୍ ତାର ଗୁଡ଼େଇ ହୋଇ ରହିଥିଲା । ବାର୍ହା ଶିକାର ପାଇଁ ୧୧ କେଭିରୁ ବିଛା ଯାଇଥିବା ବିଦ୍ୟୁତ୍ ତାରରେ ଛନ୍ଦି ହୋଇ ଏମାନଙ୍କ ମୃତ୍ୟୁ ଘଟିଥିବା ରେଢ଼ାଖୋଲ ଡିଏଫ୍ଓ ଅରବିନ୍ଦ ମହାନ୍ତି ସ୍ପଷ୍ଟ କରିଛନ୍ତି । ହାତୀମୃତ୍ୟୁ ସମ୍ପର୍କରେ ସୂଚନା ପାଇ ବନ ବିଭାଗ ଅଧିକାରୀ ପହଞ୍ଚି ଅନୁଧ୍ୟାନ କରିଛନ୍ତି । ମୃତଦେହ ବ୍ୟବଚ୍ଛେଦ ପରେ ପୋତି ଦିଆଯାଇଛି ।
ଅନ୍ୟପଟେ ଘଟଣାକୁ ବନ ବିଭାଗ ଗମ୍ଭୀରତାର ସହ ନେଇଥିବା କହିଛନ୍ତି ଆରସିସିଏଫ୍ ଟି.ଅଶୋକ କୁମାର । ଶ୍ରୀ କୁମାର କହିଛନ୍ତି, ଏକ ପଲରେ ୧୧ ହାତୀ ରେଢ଼ାଖୋଲ ରେଞ୍ଜରୁ ନାକଟିଦେଉଳ ରେଞ୍ଜକୁ ଆସୁଥିବା ସମୟରେ ଏହି ଅଘଟଣ ଘଟିଛି । ହାତୀମୃତ୍ୟୁ ପଛରେ ଗ୍ରାମବାସୀଙ୍କ ସମ୍ପୃକ୍ତି ଥିବା ତଦନ୍ତରୁ ଜଣାପଡ଼ିଛି । ଆଖପାଖ ଗାଁରୁ ୪ ଜଣଙ୍କୁ ଗିରଫ କରାଯାଇଛି । ସେମାନଙ୍କୁ ଭୁବନେଶ୍ୱରରୁ ଆସିଥିବା ଟିମ୍ ଜେରା କରିଛନ୍ତି । ବିଦ୍ୟୁତ୍ ବିଭାଗ ତ୍ରୁଟିକୁ ମଧ୍ୟ ଦେଖାଯାଉଛି । ସେମାନଙ୍କର ଯଦି କୌଣସି ତ୍ରୁଟି ଥିବ ତେବେ କାର୍ଯ୍ୟାନୁଷ୍ଠାନ ନିଆଯିବ ।
ସୂଚନାଯୋଗ୍ୟ, ରେଢ଼ାଖୋଲ ବନଖଣ୍ଡ ନାକଟିଦେଉଳ ରେଞ୍ଜ ପାଲଟିଛି ହାତୀଙ୍କ ମୃତ୍ୟୁ ଯନ୍ତା । ଗତ ଅଗଷ୍ଟ ୧୭ରେ ଏହି ଘୋଷରାମାଳ ସେକ୍ସନର ଚହଟାପଦାରେ ବିଦ୍ୟୁତ୍ ତାର ସଂସ୍ପର୍ଶରେ ଆସି ଏକ ଦନ୍ତାର ମୃତ୍ୟୁ ଘଟିଥିଲା ।
