କାଲିମେଳା, ୩୧/୧୦: ଜମି ବିବାଦକୁ କେନ୍ଦ୍ର କରି ବିଭତ୍ସ ହତ୍ୟା । ସାବଳରେ ପିଟି ପିଟି ଦାଦା ଭିମା ମାଡି ହତ୍ୟା କଲା ପୁତୁରା ଲାଛା ମାଡି । ଘଟଣାକୁ ନେଇ ଥାନାରେ ଏତଲା ଦେଲେ ଭିମା ମାଡିଙ୍କ ସ୍ତ୍ରୀ ଗାଙ୍ଗୀ ମାଡ଼ି । ମାଲକାନଗିରି ଜିଲ୍ଲା ମୋଟୁ ଥାନାର କତାବାଞ୍ଜିଗୁଡ଼ା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । 

ସୂଚନା ମୁତାବକ, ବୁଧବାର ସନ୍ଧ୍ୟାରେ ଜମିରୁ ଫେରିବା ପରେ ଦାଦା ଭିମା ମାଡି ଏବଂ ତାଙ୍କ ପୁତୁରା ଲାଛା ମାଡିଙ୍କ ମଧ୍ୟରେ ଝଗଡ଼ା ହୋଇଥିଲା । ପୂର୍ବରୁ ଅନେକ ଥର ଏହି ବାବଦରେ ଉଭୟଙ୍କ ମଧ୍ୟରେ କଳହ ସୃଷ୍ଟି ହୋଇଥିଲା । ହେଲେ ବୁଧବାର ଏହି ଝଗଡ଼ା ସମସ୍ତ ସୀମା ଡେଇଁ ଯାଇଥିଲା । କ୍ରୋଧରେ ଆସି ନିଜ ଦାଦାଙ୍କୁ ସାବଳରେ ପିଟି ପିଟି ହତ୍ୟା କଲା ପୁତୁରା । ଆକ୍ରମଣର ଶିକାର ହୋଇ ଯନ୍ତ୍ରଣାରେ ଚିତ୍କାର କରି ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ ଭିମା ମାଡି । ଏହା ଶୁଣି ଭିମା ମାଡିଙ୍କ ସ୍ତ୍ରୀ ଗାଙ୍ଗୀ ମାଡ଼ି ଘର ଭିତରୁ ଦୌଡ଼ି ଆସି ଦେଖିଥିଲେ ।  ସ୍ୱାମୀ ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡ଼ିଥିବାର ଦେଖି ତୁରନ୍ତ ପୋଲିସକୁ ଏହି ଘଟଣା ସମ୍ୱନ୍ଧରେ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ମୋଟୁ ପୋଲିସ ପହଞ୍ଚି ଉଭୟଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ । କୋରାପୁଟରୁ ଏକ ସାଇଣ୍ଟିଫିକ ଟିମ ଆସି ତଦନ୍ତ କରିବା ପରେ ପ୍ରକୃତ ଘଟଣା ଜଣାପଡିବ ବୋଲି ସୂଚନା ଦେଇଛନ୍ତି ମୋଟୁ ଥାନା ଭାରପ୍ରାପ୍ତ ଅଧିକାରୀ  ।