ମାଲକାନଗିରି, ୩୧/୧୦: ଜମି ବିବାଦ ଏବଂ ଭାଗ ବଣ୍ଟାକୁ ନେଇ ମହାଭାରତ । ସାବଳରେ ପିଟି ପିଟି ଦାଦା ଭୀମା ମାଡି ହତ୍ୟା କଲା ପୁତୁରା ଲାଛା ମାଡି । ଏହି ଘଟଣାରେ ଅଭିଯୁକ୍ତ ଲାଛା ମାଡିକୁ ଗିରଫ କରି କୋର୍ଟ ଚାଲାଣ କରାଯାଇଛି । ମାଲକାନଗିରି ଜିଲ୍ଲା ମୋଟୁ ଥାନାର କତାବାଞ୍ଜିଗୁଡ଼ା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି ।
ସୂଚନା ମୁତାବକ, ଦାଦା ପୁତୁରା ଭିତର ଜମି ଜମାକୁ ନେଇ ବହୁ ଦିନ ହେଲା ବିବାଦ ଲାଗି ରହିଥିଲା । ଏହାକୁ ନେଇ ପୁଣି ଥରେ ବୁଧବାର ରାତିରେ ବିବାଦ ସୃଷ୍ଟି ହୋଇଥିଲା । ଏହି ବିବାଦ ଏତେ ଭୟଙ୍କର ଥିଲା ଯେ, ତାହା ହତ୍ୟାକାଣ୍ଡର ରୂପ ନେଇଥିଲା । ଗତ ବୁଧବାର ରାତିରେ ଦାଦା ଭୀମା ମାଡି ଜମି ଲାଡ଼ିରୁ ଫେରି ଘରେ ପହଞ୍ଚିବା ପରେ ପୁତୁରା ଲାଛା ମାଡ଼ି ତାଙ୍କୁ କହିଥିଲା, ସେ ଜମି କୁ ତୁମେ କାହିଁକି ଯାଇଥିଲ । ଏହାକୁ ନେଇ ଉଭୟ ଦୁଇ ଜଣଙ୍କ ଭିତରେ ଝଗଡା ହୋଇଥିଲା । ଖଗଡା ପରେ ପୁତୁରା ଲାଛା ମାଡି ରାଗି ଯାଇ ଘର କୋଣରେ ଥିବା ଏକ ଶାବଳ ଆଣି ଆକ୍ରମଣ କରି ଦାଦା ଭୀମା ମାଡିଙ୍କର ମୁଣ୍ଡକୁ ବାଡେଇ ଫଟେଇ ଦେଇ ଥିଲା । ରକ୍ତାକ୍ତ ଅବସ୍ଥାରେ ତଳେ ପଡି ଛଟପଟ ହୋଇ ସେଠାରେ ହିଁ ଭୀମା ମାଡ଼ିର ମୃତ୍ୟୁ ହୋଇଥିଲା । ଏହା ଦେଖି ଗ୍ରାମବାସୀ ଓ ଭୀମା ମାଡ଼ିଙ୍କ ସ୍ତ୍ରୀ ମୋଟୁ ଥାନାରେ ଏସମ୍ପର୍କରେ ଗୁରୁବାର ଦିନ ଅଭିଯୋଗ କରିବା ପରେ ମୋଟୁ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମୃତ ଶରୀର ଜବତ କରି ଶବ ବ୍ୟବଚ୍ଛେଦ ନିମନ୍ତେ ପଠାଇ ତଦନ୍ତ ଆରମ୍ଭ କରିଥିଲେ । ଶବ ବ୍ୟବଚ୍ଛେଦ ପରେ ଗୁରୁବାର ଦିନ ପରିବାରଙ୍କୁ ମୃତ ଶରୀର ହସ୍ତାନ୍ତର କରିଛନ୍ତି । ଗୁରୁବାର ସନ୍ଧ୍ୟାରେ ଅଭିଯୁକ୍ତ ଲଛା ମାଡ଼ିକୁ ଗିରଫ କରା ଯାଇଛି । ଗିରଫ ଲଛା ମାଡିକୁ ଶୁକ୍ରବାର କୋର୍ଟ ଚାଲାଣ କରାଯାଇଥିବାର ମୋଟୁ ଥାନା ଅଧିକାରୀ ସୁନୀଲ ସୋରେନ ସୂଚନା ଦେଇଛନ୍ତି ।
