ମାଲକାନଗିରି,୨୯/୧୨(ଆପ୍ର ) : ନ୍ୟାୟିକ ବ୍ୟବସ୍ଥାରେ ଆଇନଜୀବୀଙ୍କ ସ୍ଥାନ ଗୁରୁତ୍ବପୂର୍ଣ । ନ୍ୟାୟ ମାଗୁଥିବା ଏବଂ ନ୍ୟାୟ ପ୍ରଦାନକାରୀଙ୍କ ମଧ୍ୟରେ ସେମାନେ ସେତୁ ଭାବେ କାମ କରନ୍ତି । ତେଣୁ ଆଇନଜୀବୀଙ୍କ ଦକ୍ଷତା ଉପରେ ଆମର ନ୍ୟାୟ ପ୍ରଦାନକାରୀ ବ୍ୟବସ୍ଥା ନିର୍ଭରଶୀଳ ବୋଲି ମାଲକାନଗିରି ଜିଲ୍ଲାରେ ପ୍ରଥମ ଥର କରି ଆୟୋଜିତ ଅଲ୍ ଓଡ଼ିଶା ଲୟର୍ସ ଆସୋସିଏସନର ୫୩ତମ ବାର୍ଷିକ ସମ୍ମିଳନୀ ରେ ଉପସ୍ଥିତ ଅତିଥି ମାନେ କହିଛନ୍ତି। ଏହା ବ୍ୟତିତ ଓକିଲ ମାନଙ୍କୁ ସ୍ୱାସ୍ଥ୍ୟ ବୀମା, ପିଲାଙ୍କ ପାଠପଡା, ପେନସନ ଭଲି ଅନେକ ଦାବି ଏହି ସମ୍ମିଳନୀ ଉପସ୍ଥାପନ କରା ଯାଇଥିଲା।
ମାଲକାନଗିରି ଜିଲ୍ଲା ସଦର ମହକୁମା ଦଣ୍ଡକାରଣ୍ୟ ମୈଦାନ ଠାରେ ଦୁଇଦିନିଆ ଅଲ୍ ଓଡ଼ିଶା ଲୟର୍ସ ଆସୋସିଏ ସନର ୫୩ତମ ବାର୍ଷିକ ସମ୍ମିଳନୀ ରେ ମୁଖ୍ୟ ଅତିଥି ଭାବେ ହାଇକୋର୍ଟ ର ବରିଷ୍ଠ ଜଷ୍ଟିସ ଶିବ ଶଙ୍କର ମିଶ୍ର ମୂଖ୍ୟ ଵକ୍ତା ଭାବେ ସୁପ୍ରିମକୋର୍ଟ ର ଅବସରପ୍ରାପ୍ତ ବରିଷ୍ଠ ଜଷ୍ଟିସ ଭି ଗୋପାଲ ଗୌଡ଼ା ଯୋଗ ଦେଇ ପ୍ରଥମ ଦିନର ଅଧିବେଶନକୁ ଉଦଘାଟନ କରିଥିଲେ। ଏହି ଅବସରରେ ହାଇକୋର୍ଟ ର ବରିଷ୍ଟ ଆଇନ ଜୀବୀ ଓ ଓଡ଼ିଶା ବାର କାଉନସିଲ ସଦସ୍ୟ ବିଭୂପ୍ରସାଦ ତ୍ରିପାଠୀ, ବାର କାଉନସିଲ ସଦସ୍ୟ ପି ରମେଶ କୁମାର ପାତ୍ର,ହାଇକୋର୍ଟ ବାର ଆସୋସିଏସନ ସଭାପତି ବି.କେ ଦାଶ,ବାର କାଉନସିଲ ଉପସଭାପତି ଆର କେ. ମହାନ୍ତି, ଓଡିଶା ବାରକାଉନ ସିଲ ଚେୟାରମ୍ୟାନ ଏସ ଏମ ଦ୍ବିବେଦୀ ଯୋଗ ଦେଇ ରାଜ୍ୟ ର ସମସ୍ତ ଆଇନଜୀବୀ ଙ୍କ ପାଇଁ ସୁବିଧା ସୁଯୋଗ ଯୋଗାଇବା ସହିତ ସେମାନଙ୍କ ସୁରକ୍ଷା, ପେନସନ, ସ୍ୱାସ୍ଥ୍ୟ ବୀମା ଓ ଅନ୍ୟାନ ଦାବି ପ୍ରତି ଗୁରୁତ୍ୱ ଦେଇଥିଲେ।
ଅଲ ଓଡ଼ିଶା ଲୟର୍ସ ଆସୋସିଏସନର ରାଜ୍ୟ ଅଧ୍ୟକ୍ଷ ବରିଷ୍ଠ ଆଇନଜୀଵୀ ଜ୍ଞାନ ରଞ୍ଜନ ମହାନ୍ତି ଓ ଆଇନଜୀବୀ ଏନ ଏନ ଶତପଥି ପ୍ରାରମ୍ଭିକ ସୂଚନା ଓ ଅତିଥି ମାନଙ୍କ ପରିଚୟ ଦେଇଥିଲେ। ମାଲକାନଗିରି ଜିଲ୍ଲା ଲୟର୍ସ ଆସୋସିଏସନର ସଭାପତି ନୃସିଂହ ଚରଣ ମହାନ୍ତି ସମ୍ମିଳନୀ ର ଆଭିମୁଖ୍ୟ ସମ୍ପର୍କରେ କହିଥିଲେ। ଏହି ଅବସରରେ ସଂଘର ଏକ ସ୍ମରଣୀକାକୁ ଅତିଥିମାନେ ଲୋକାର୍ପଣ କରିଥିଲେ। ଅଲ ଓଡ଼ିଶା ଲୟର୍ସ ଆସୋସିଏସନର ରାଜ୍ୟ ସାଧାରଣ ସମ୍ପାଦକ ସଂଜିତ କୁମାର ପାଣିଗ୍ରାହୀ ଧନ୍ୟବାଦ ଅର୍ପଣ କରିଥିଲେ। ଏହି ଅଧିବେଶନରେ ରାଜ୍ୟ ର ୩୦ଟି ଜିଲ୍ଲା ର ପ୍ରାୟ ୧୩୦୦ ରୁ ଉର୍ଦ୍ଧ ବରିଷ୍ଠ ଆଇନଜୀବୀମାନେ ଉପସ୍ଥିତ ଥିଲେ। ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଆସନ୍ତା କାଲି ଉଦଯାପନୀ ସଭାରେ ମନ୍ତ୍ରୀ ସୁରେଶ ଚନ୍ଦ୍ର ପୂଜାରୀ ଓ ବରିଷ୍ଟ ଆଇନଜ୍ଞ ସହିତ ଅନ୍ୟାନ ଅତିଥି ମାନେ ଉପସ୍ଥିତ ରହିବାର କାର୍ଯ୍ୟ କ୍ରମ ରହିଛି।
