ନୂଆଦିଲ୍ଲୀ : ରିଲାଏନ୍ସ ଇଣ୍ଡଷ୍ଟ୍ରିଜ୍ର ଚେୟାରମ୍ୟାନ ମୁକେଶ ଅମ୍ୱାନୀ ପୁଣି ଥିରେ ଫୋବର୍ସର ୨୦୨୪ର ଭାରତର ସବୁଠୁ ଧନୀ ବ୍ୟକ୍ତିଙ୍କ ତାଲିକାରେ ଶୀର୍ଷ ସ୍ଥାନ ହାସଲ କରିଛନ୍ତି। ଫୋବର୍ସ ଅନୁସାରେ , ଚଳିତ ବର୍ଷ ଏହା ଏକ ବଡ଼ ଉପଲବ୍ଧି ,କାରଣ ଭାରତର ସବୁଠୁ ଧନୀ ବ୍ୟକ୍ତିଙ୍କର ମୋଟ ସଂପତ୍ତି ପ୍ରଥମ ଥର ୧ଟ୍ରିଲିୟମ ଡଲାରର ଫିଗରକୁ ଅତିକ୍ରମ କରି ଯାଇଛି।
ନିକଟରେ ରିଲାଏନ୍ସର ଶେୟାରଧାରୀଙ୍କୁ ଦିପାବଳୀର ଉପହାର ଭାବେ ବୋନସ ସେୟାର ଦେବାର ଘୋଷଣା କରିଥିବା ଅମ୍ୱାନୀଙ୍କ ସଂପତ୍ତିରେ ଉଲ୍ଲେଖନୀୟ ବୃଦ୍ଧି ହୋଇଛି। ଗତ ବର୍ଷ ତାଙ୍କର ସଂପତ୍ତିରେ ୨୭.୫ ବିଲିୟନ ଡଲାରର ବୃଦ୍ଧି ହୋଇଛି। ଏହା ଭାରତୀୟ ଟଙ୍କାରେ ୨୩୦୮୮କୋଟି ଟଙ୍କାର ବରାବର ହେବ। ସଂପତ୍ତିରେ ଏହି ବୃଦ୍ଧି ସହ ତାଙ୍କର ମୋଟ ସଂପତ୍ତି ୧୦୮.୩ ବିଲିୟନ ଡଲାର ହୋଇ ଯାଇଛି। ଏଥିରେ ସେ ଦୁନିଆର ୧୩ତମ ସବୁଠୁ ଧନୀ ବ୍ୟକ୍ତି ହୋଇ ପାରିଛନ୍ତି। ଫୋବର୍ସ ଅନୁସାରେ , ସମୁଦାୟ ତାଙ୍କର ସଂପତ୍ତି ୧୧୯.୫ ବିଲିୟନ ଡଲାର ରହିଛି।
୨୦୨୪ ପାଇଁ ଭାରତର ଶୀର୍ଷ ୧୦ ସବୁଠୁ ଧନୀ ବ୍ୟକ୍ତିଙ୍କ ମଧ୍ୟରେ ମୁକେଶ ଅମ୍ୱାନୀ ସବୁଠୁ ଆଗରେ ରହିଛନ୍ତି, ଯାହାଙ୍କର ମୋଟ ସଂପତ୍ତି ୧୧୯.୫ ବିଲିୟନ ଡଲାର ରହିଛି। ତାଙ୍କ ପରେ ଗୌତମ ଆଦାନୀ ଅଛନ୍ତି , ଯାହାଙ୍କର ମୋଟ ସଂପତ୍ତି ୧୧୬ ବିଲିୟନ ଡଲାର ରହିଛି। ସାବିତ୍ରୀ ଜିନ୍ଦଲ ୪୩.୭ ବିଲିୟନ ଡଲାରର ସଂପତ୍ତି ସହ ୩ୟ ସ୍ଥାନରେ ରହିଛନ୍ତି। ଶିବ ନାଦର ୪୦.୩ ବିଲିୟନ ଡଲାର ସହ ୪ର୍ଥ ସ୍ଥାନରେ ଅଛନ୍ତି। ଦିଲ୍ଲୀପ ସାଂଘବୀ ୩୨.୪ ବିଲିୟନ ଡଲାରର ସଂପତ୍ତି ସହ ୫ମ ସ୍ଥାନରେ ଅଛନ୍ତି ,ରାଧାକିଶନ ଦମାନୀ ୩୧.୫ ବିଲିୟନ ଡଲାରର ସଂପତ୍ତି ସହ ୬ଷ୍ଠ ସ୍ଥାନରେ ରହିଛନ୍ତି। ସୁନିଲ ମିତ୍ତଲ ୩୦.୭ ବିଲିୟନ ଡଲାର ସହ ୭ମ ସ୍ଥାନରେ ଅଛନ୍ତି ଏବଂ କୁମାର ବିର୍ଲା ୨୪.୮ ବିଲିୟନ ଡଲାର ସହ ୮ମ ସ୍ଥାନରେ ରହିଛନ୍ତି। ୯ମ ସ୍ଥାନରେ ସାଇରସ ପୁନାୱାଲା, ତାଙ୍କ ସଂପତ୍ତି ୨୪.୫ ବିଲିୟନ ଡଲାର, ବଜାଜ ପରିବାର ୨୩.୪ ବିଲିୟନ ଡଲାର ସହ ଶୀର୍ଷ ୧୦ରେ ସାମିଲ ରହିଛନ୍ତି।