ଭୁବନେଶ୍ବର,୨୭/୧୧: ରାଜଧାନୀରେ ଲୁଟ୍ ପାଇଁ ମହିଳାଙ୍କୁ ହତ୍ୟା ଘଟଣାରେ ନଭେମ୍ୱର ୨୫ ତାରିଖରେ ଜଣେ ଅଭିଯୁକ୍ତକୁ ଝାଡଖଣ୍ଡରୁ ଗିରଫ କରାଯାଇଥିଲା । ଏହି ଘଟଣାରେ ମୁଖ୍ୟ ଅଭିଯୁକ୍ତକୁ ବଡ଼ବିଲ ଅଞ୍ଚଳରୁ ଗିରଫ କରିଛି ଏୟାରଫିଲଡ଼ ଥାନା ପୋଲିସ ।

ସୂଚନା ମୁତାବକ, ଫେରାର ଥିବା ମୁଖ୍ୟ ଅଭିଯୁକ୍ତକୁ ଧରିବା ପାଇଁ କମିସନରେଟ ପୋଲିସ ବିଭିନ୍ନ ଅଞ୍ଚଳରେ ଖୋଜାଖୋଜି ଆରମ୍ଭ କରିଥିଲା। ଶେଷରେ ବୁଧବାର ଫେରାର ଥିବା ମୋଷ୍ଟ ୱାଣ୍ଟେଡ୍‌କୁ ଧରିବାରେ ସଫଳ ହୋଇଛି ପୋଲିସ । ଯୁବକ ଜଣକ ପ୍ରଥମେ ଝାଡ଼ଖଣ୍ଡ ଏବଂ ପରେ ବଡ଼ବିଲରେ ଲୁଚି ରହିଥିଲା। ଦୀର୍ଘ ୧୬ ଦିନ ପରେ ଏହି ଘଟଣାର ମୁଖ୍ୟ ଅଭିଯୁକ୍ତକୁ ଧରିବାରେ ସଫଳ ହୋଇଛି ଏୟାରଫିଲ୍ଡ ଥାନା ପୋଲିସ ।
ନଭେମ୍ୱର ୧୧ ତାରିଖରେ ସ୍ୱାମୀ ବିଷ୍ଣୁ ପାତ୍ରଙ୍କ ସହ ମହିଳା ଜଣକ ବାଇକ୍‌ରେ ମନ୍ଦିର ଯାଉଥିଲେ । ଏହି ସମୟରେ ଦୁଇ ଜଣ ଲୁଟେରା ମହିଳାଙ୍କ ଠାରୁ ଲୁଟ୍‌ କରିବାକୁ ଉଦ୍ୟମ କରିଥିଲେ । ଲୁଟ୍‌ ବେଳେ ମହିଳା ଜଣକ ଗାଡ଼ିରୁ ପଡ଼ି ଯାଇ ପ୍ରାଣ ହରାଇଥିଲେ । ଏନେଇ ତାଙ୍କ ସ୍ୱାମୀ ଏୟାରଫିଲଡ଼ ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା ।