ଭୁବନେଶ୍ୱର,୦୯/୦୬: ଆସୁଛି ମୌସୁମୀ ବର୍ଷା । ମାଶାଙ୍କ ଉତ୍ପାତ ବଢ଼ିବ । ଲୋକେ ଡେଙ୍ଗୁ, ମ୍ୟାଲେରିଆ, ଜେଇ ଓ ଚିକେନ୍ଗୁନିଆରେ ଆକ୍ରାନ୍ତ ହେବା ଆଶଙ୍କା ଦେଖାଦେଇଛି । ଏହାକୁ ମୁକାବିଲା କରିବାକୁ ‘ମାଇକ୍ରୋ ପ୍ଲାନ୍’ ଆରମ୍ଭ କରିଛି ଜନସ୍ୱାସ୍ଥ୍ୟ ବିଭାଗ । ରାଜ୍ୟବ୍ୟାପୀ ମଶା ବଂଶ ବଢ଼ିବା ସାମ୍ଭାବ୍ୟ ସ୍ଥାନକୁ ଚିହ୍ନଟ କରାଯାଇଛି । ପୂର୍ବ ବର୍ଷ ଅଭିଜ୍ଞତା ଆଧାରରେ ଯୋଜନା ପ୍ରସ୍ତୁତି ହୋଇଛି । ଏହି ମାଇକ୍ରୋ ପ୍ଲାନ୍ ଅନୁଯାୟୀ ଟିମ୍ ଗଠନ ହୋଇଛି । ସେମାନେ ନିୟମିତ ମଶା ନିପାତ କାର୍ଯ୍ୟ ନେଇ ପଦକ୍ଷେପ ନେଉଛନ୍ତି ବୋଲି ଜନସ୍ୱାସ୍ଥ୍ୟ ବିଭାଗ ସୂଚନା ଦେଇଛି ।
ନ୍ୟାସନାଲ ଭେକ୍ଟର ବର୍ଣ୍ଣ ଡିଜିଜ୍ କଣ୍ଟ୍ରୋଲ ପ୍ରୋଗ୍ରାମ୍ର ଯୁଗ୍ମ ନିର୍ଦ୍ଦେଶକ ଡା. ସୁବାଶିଷ ମହାନ୍ତି କହିଛନ୍ତି, ରାଜ୍ୟର ଡେଙ୍ଗୁ ଓ ମ୍ୟାଲେରିଆ ପ୍ରବଣ ଜିଲ୍ଲାରେ ମଶା ନିପାତ କାର୍ଯ୍ୟକ୍ରମ ଜାରି ରହିଛି । ବର୍ଷା ଋତୁକୁ ନଜରରେ ରଖି ବର୍ତ୍ତମାନ ବିଭିନ୍ନ ଅଞ୍ଚଳକୁ ଚିହ୍ନଟ କରାଯାଇଛି । ସେଠାରେ ସ୍ୱତନ୍ତ୍ର ଭାବେ ଟିମ୍ ଗଠନ କରାଯାଇଛି । ଟିମ୍ ଛୋଟ ଛୋଟ ଅଞ୍ଚଳରେ ମାଇକ୍ରୋ ପ୍ଲାନ୍ ଅନୁଯାୟୀ ମଶା ବଂଶ ନିପାତ ପାଇଁ ପଦକ୍ଷେପ ନେବେ । ସେଥିପାଇଁ ଆକ୍ସନ୍ ପ୍ଲାନ ପ୍ରସ୍ତୁତ ହୋଇଛି । ନିୟମିତ ସ୍ଥିତି ଯାଞ୍ଚ କରାଯାଉଛି । ଜନସାଧାରଣ ବର୍ତ୍ତମାନଠାରୁ ସଚେତନ ହେବା ଆବଶ୍ୟକ । ପ୍ରଥମେ ନିଜ ଘରେ ମଶା ବଂଶ କିପରି ନଷ୍ଟ କରିବେ ସେଥିପ୍ରତି ଧ୍ୟାନ ଦେବା ଉଚିତ । ବହୁ ଦିନ ଧରି ପାଣି ଜମିରହୁଥିବା ସ୍ଥାନକୁ ପରିଷ୍କାର ରଖିବାକୁ ସେ ପରାମର୍ଶ ଦେଇଛନ୍ତି ।
ରାଜ୍ୟ ସରକାର କେନ୍ଦ୍ରକୁ ମାଗିଥିବା ୧ କୋଟି ୨୦ ଲକ୍ଷ ଲଙ୍ଗ୍ ଲାଷ୍ଟିଂ ଇନ୍ସେକ୍ଟିସାଇଡାଲ୍ ନେଟ୍ (ଏଲ୍ଏଲ୍ଆଇଏନ୍) ବା ଔଷଧୀୟ ମଶାରି ଆସିବାରେ ବିଳମ୍ବ ହେଉଥିବାରୁ ବର୍ଷା ଦିନେ ମ୍ୟାଲେରିଆ ବଢ଼ିବା ଆଶଙ୍କା ଉପୁଜିଛି ବୋଲି ବିଶେଷଜ୍ଞମାନେ କହିଛନ୍ତି । ସ୍ୱାସ୍ଥ୍ୟ ବିଭାଗ ଜଣେ ଅଧିକାରୀ କହିଛନ୍ତି, ଯଦି ବର୍ତ୍ତମାନଠାରୁ ଔଷଧୀୟ ମଶାରି ବଣ୍ଟନ ଆରମ୍ଭ କରାଯିବ ତେବେ ବର୍ଷା ଦିନରେ ମ୍ୟାଲେରିଆ ଓ ଡେଙ୍ଗୁକୁ ନିୟନ୍ତ୍ରଣ କରାଯାଇପାରିବ ।
ସୂଚନାଯୋଗ୍ୟ, ରାଜ୍ୟରେ ୧୯୧୬ରେ ୪ଲକ୍ଷ ୪୦ହଜାର ପାଖାପାଖି ମ୍ୟାଲେରିଆ ରୋଗୀ ଚିହ୍ନଟ ହୋଇଥିଲେ । ୨୦୨୨ ବେଳକୁ ଏହି ସଂଖ୍ୟା କମି ୭ ହଜାରରେ ପହଞ୍ଚିଥିଲା । ମଶାରି ବ୍ୟବହାର ଫଳରେ ରାଜ୍ୟରେ ମ୍ୟାଲେରିଆ ନିୟନ୍ତ୍ରଣକୁ ଆସିଛି । ବିଶେଷ କରି ମାଲକାନଗିରି, କୋରାପୁଟ୍, ରାୟଗଡ଼ା, କଳାହାଣ୍ଡି, ବୌଦ୍ଧ ଓ ଫୁଲବାଣୀ ମ୍ୟାଲେରିଆ ପ୍ରବଣ ଜିଲ୍ଲା ଭାବେ ପରିଗଣିତ ହେଉଛି ।