ଫିରିଙ୍ଗିଆ,୨୬।୬  : କାମ ଧାମ କରି ପରିବାର ପରିପୋଷଣ କରିବା ବୟସରେ ଘରର ରୋଜଗାରିଆ ପୁଅ ଏବେ ଶଯ୍ୟାଶାୟୀ I ଦୀର୍ଘ ଆଠବର୍ଷ ହେବ ଏକ ଅଜଣା ରୋଗରେ ଆକ୍ରାନ୍ତ ହୋଇ ଶଯ୍ୟା ଶାୟୀ ହୋଇପଡିଛି I ସେପଟେ ମୂଳ ଲାଗି ପରିବାର ପରିପୋଷଣ କରି ଆସୁଥିବା ବାପା ମା’ ବର୍ତ୍ତମାନ ପୁଅର ଚିକିତ୍ସା କରାଇବା ପାଇଁ ଅସମର୍ଥ । କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ରତଙ୍ଗ ପଂଚାୟତ ଅଧୀନରେ ଥିବା ପୋଡାପଡା ଗାଁ ରେ ଏହା ଦେଖିବାକୁ ମିଳିଚି I

ପୋଡାପଡା ଗାଁର କାଶୀନାଥ ଭୁକ୍ତା ଓ ମା’ ଜପ ଭୁକ୍ତା ଙ୍କ ପରିବାର ବସବାସ କରନ୍ତି I ପରିବାରରେ ସମୁଦାୟ ଛଅ ଜଣ । କିନ୍ତୁ ଗତ ଆଠ ବର୍ଷ ହେଲା କାଶୀନାଥ ଭୁକ୍ତା ଙ୍କ ଦ୍ଵିତୀୟ ପୁଅ ପଚିଶ ବର୍ଷୀୟ ଆରତ ଭୁକ୍ତା ଅଜଣା ରୋଗରେ ଆକ୍ରାନ୍ତ।  ଆରତ ଭୁକ୍ତା ଙ୍କୁ ସତର ବର୍ଷ ହେଉଥିବା ବେଳେ ତାଙ୍କର ଗୋଡ଼ ହାତ ବିନ୍ଧିବା ସହ ଆଖିକୁ ଦେଖା ଯାଉନଥିଲା I ପରେ ପରିବାର ଲୋକେ ତାଙ୍କୁ ଚିକିତ୍ସା ପାଇଁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟ ଠାରୁ ଆରମ୍ଭ କରି ବ୍ରହ୍ମପୁର, କଟକ, ଭୁବନେଶ୍ୱର ଚିକିତ୍ସା କରାଇ ଥିଲେ I ଶେଷରେ ପୁଅର ଚିକିତ୍ସା ପାଇଁ ଜମିବାଡ଼ି ସବୁ ବିକ୍ରି ମଧ୍ୟ୍ୟ କରିବାକୁ ପଡିଥିଲା I ବର୍ତ୍ତମାନ ପୁଅର ଚିକିତ୍ସା ପାଇଁ ବାପା ମା’ ଅସହାୟ ହୋଇପଡିଥିବା ବେଳେ ଘରେ ଯେତିକି ଅର୍ଥ ଥିଲା ସବୁତକ ଖର୍ଚ୍ଚ ହୋଇସାରିଛି I ଏବେ ଅର୍ଥ ଅଭାବରୁ ପୁଅର ଚିକିତ୍ସା କରିବା ସମ୍ଭବ ହୋଇପାରୁନାହିଁ I ଯାହାପାଇଁ ବର୍ତ୍ତମାନ ନିଜ ଭାଗ୍ୟକୁ ଆଦରି ସରକାରୀ ସହାୟତା କୁ ଅପେକ୍ଷା କରି ଅସହାୟ ଅବସ୍ଥାରେ ପଡ଼ିରହିଛି ପୁଅ I ସେପଟେ ଭାଇର ଚିକିତ୍ସା ପାଇଁ ବଡ଼ଭାଇ ଦାଦନ ଖଟିବା ପାଇଁ ବାହାର ରାଜ୍ୟକୁ ଯାଇଛି।  ପୁଅର ଚିକିତ୍ସା ପାଇଁ ଆକୁଳ ନିବେଦନ କରିଛନ୍ତି ଆରତ ଙ୍କ ପରିବାର ସଦସ୍ୟ ।

ଆହୁରି ପଢନ୍ତୁ : ଭୁବନେଶ୍ବରରେ ପ୍ରବଳ ବର୍ଷା, ଜାତୀୟ ରାଜପଥରେ ଟ୍ରାଫିକ ଜାମ