ସୋର, ୨୭/୧୦: ବାତ୍ୟା ପରେ ଲଗାତାର ବର୍ଷା ବଢାଉଛି ଦୁଃଖ । ଲଗାଣ ବର୍ଷାରେ ବିପଦ ସଙ୍କେତ ଟପିଲା କାଂଶବାଂଶ ନଦୀ । କୁରୁମାବାଙ୍କ ଗ୍ରାମର ୨୫ ପରିବାର ପାଣି ଘେରରେ । ସେମାନଙ୍କ ମଧ୍ୟରୁ ୧୦ ପରିବାର ଘରୁ ବାହାରିବା ସମ୍ଭବ ହେଉନାହିଁ । ଫଳରେ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି ।
କାଂଶବାଂଶ ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଥିବା ନେଇ ଖବର ପାଇ ସାଜନପୁର ଓ କେଦାରପୁର ପଞ୍ଚାୟତ ପରିଦର୍ଶନ କଲେ ପ୍ରଶାସନ ବିଧାୟକ ମାଧବ ଧଡା, ବିଡିଓ ସତ୍ୟନାଥ ନାୟକ, ତହସିଲଦାର ସେକ ସଗୀର । ସେମାନଙ୍କ ସହ ଜଳସମ୍ପଦ ଏସଡିଓ ଅଜିତ ବେହେରା, କନିଷ୍ଠ ଯନ୍ତ୍ରୀ ପ୍ରଦୀପ ବେହେରା ଓ ସୁଚାରୁ କୁମାର ଜେନା, ଜିଲ୍ଲା ପରିଷଦ ଜୟରାମ ଦାସ, ସମିତି ସଭ୍ୟ ଅଶୋକ ନାୟକ ମଧ୍ୟ ଏହି ଦୁଇଟି ପଞ୍ଚାୟତ ପରିଦର୍ଶନ କରିଥିଲେ । ଏହି ଶମୟରେ ଜଳବନ୍ଦୀ ହୋଇ ରହିଥିବା ଲୋକଙ୍କ ସମସ୍ୟା ପଚାରି ବୁଝିଥଲେ । ପରିଦର୍ଶନ ପରେ ଦୁର୍ବଳ ଥିବା ବନ୍ଧରେ ବାଲିବସ୍ତା ପକାଇବା ପାଇଁ ବ୍ୟବସ୍ଥା ହୋଇଥିବା ଜଳସମ୍ପଦ ଏସଡିଓ କହିଥିଲେ ।
