ଫୁଲବାଣୀ,୨୭ା୧୨: ଫୁଲବାଣୀ ସ୍ଥାନୀୟ ସର୍କିଟ ହାଉସ ପରିସରରେ ଦୁଇଟି ଗାଡ଼ିରେ ନିଆଁ ଲଗାଇ ଦେଇଛନ୍ତି ଦୁର୍ବୃତ୍ତ । ଫଳରେ ଗୋଟିଏ ସ୍କୁଟି ଏବଂ ଗୋଟିଏ ବାଇକ ପୋଡି ପାଉଁଶ ହୋଇ ଯାଇଛି । ପାଖରେ ଥିବା ବିଧାୟକଙ୍କ କାରରେ ମଧ୍ୟ ନିଆଁ ଲାଗି କ୍ଷତିଗ୍ରସ୍ତ ହୋଇଛି । ଘଟଣାର ପ୍ରକୃତ କାରଣ ଜଣା ପଡିନାହିଁ । କିଏ ଏବଂ କେଉଁ ପରିସ୍ଥିତିରେ ଏପରି କଲା ପୋଲିିସ ତାହାର ତନାଘନା କରୁଛି । ଏସ୍ପି ହରିଶ.ବିସି ଘଟଣା ସ୍ଥଳକୁ ଯାଇ ଛାନଭିନ ଆରମ୍ଭ କରିଛନ୍ତି ।
ମିଳିଥିବା ସୁଚନା ଅନୁସାରେ, ଫୁଲବାଣୀ ବିଧାୟକ ଉମାଚରଣ ମଲ୍ଲିକ କୌଣସି କାମରେ ଆସି ଗୁରୁବାର ରାତିରେ ସର୍କିଟ ହାଉସରେ ରାତ୍ରି ଯାପନ କରିଥିଲେ । ସେଠାରେ ଜଣେ ହାଇକୋର୍ଟ ଜଜ୍ ମଧ୍ୟ ଅନ୍ୟ କୋଠରୀରେ ଥିଲେ । ରାତି ପ୍ରାୟ ଗୋଟାଏ ବେଳେ ଜଜ୍ଙ୍କ ସୁରକ୍ଷା ଦାୟିତ୍ୱରେ ଥିବା ହୋମଗାର୍ଡ ବିଧାୟକଙ୍କ ଗାଡି ସମେତ ଦୁଇଟି ବାଇକରେ ନିଆଁ ଲାଗିଥିବା ଦେଖି କର୍ମଚାରୀମାନଙ୍କୁ ଡାକିଥିଲେ । ସଙ୍ଗେ ସଙ୍ଗେ ପୋଲିସ, ଅଗ୍ନିଶମ ବାହିନୀକୁ ଖବର ଦିଆ ଯାଇଥିଲା । ବିଦ୍ୟୁତ୍ ବିଭାଗ କର୍ମଚାରୀ ମଧ୍ୟ ଆସି ପହଞ୍ଚିଥିଲେ । ଅଗ୍ନିଶମ ବାହିନୀ ନିଆଁକୁ ଆୟତ କରିବା ପରେ ପୋଲିସ ଯାଞ୍ଚ ଆରମ୍ଭ କରିଥିଲା । ତେବେ ଏହି ଅଗ୍ନିକାଣ୍ଡରେ ବିଧାୟକଙ୍କ ପିଏସ୍ଓଙ୍କ ବାଇକ୍ ଏବଂ ସର୍କିଟ ହାଉସର ଜଣେ କର୍ମଚାରୀଙ୍କ ସ୍କୁଟି ସମ୍ପୂର୍ଣ୍ଣ ପୋଡି ଯାଇଛି । ବିଧାୟକଙ୍କ ଗାଡି ଆଂଶିକ ପୋଡିଛି । ଏ ପର୍ଯ୍ୟନ୍ତ କିପରି ନିଆଁ ଲାଗିଲା ତାହା ସ୍ପଷ୍ଟ ହୋଇନାହିଁ । ଏହି ଘଟଣାରେ ସବୁ ଦିଗରୁ ଯାଞ୍ଚ କରାଯାଉଛି ବୋଲି ଏସପି କହିଛନ୍ତି ।
