ଜି ଉଦୟଗିରି,୧୮/୧୨: ଭାରସାମ୍ୟ ହରାଇ ବାଇକ୍ ସହ ଗଣ୍ଡିସ ନଦୀରେ ପଡ଼ିଗଲେ ତିନି ଜଣ ଯୁବକ । ପାଣିରେ ବୁଡ଼ି ଜଣେ ପ୍ରାଣ ହରାଇଥିବା ବେଳେ ଆଉ ଦୁଇ ଜଣ ଗୁରୁତର ହୋଇଛନ୍ତି । ମୃତ ଯୁବକ ଜଣକ ପବିତ୍ର ଦିଗାଲ ଏବଂ ଗୁରୁତର ଦୁଇ ଜଣ ବିଜୁ ନାୟକ, ଅଶ୍ଵିନୀ ନାୟକ ବୋଲି ଜଣାପଡ଼ିଛି । କନ୍ଧମାଳ ଜିଲ୍ଲା ଜି ଉଦୟଗିରି ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ବିଳମ୍ବିତ ରାତିରେ ବାଇକ୍ରେ ତିନି ଜଣ ଯୁବକ ନିଜ ଗାଁ ମାଧିକିଆକୁ ଫେରୁଥିଲେ । ଏହି ସମୟରେ ଭାରସାମ୍ୟ ହରାଇ ଗଣ୍ଡିସ ନଦୀରେ ବାଇକ୍ ସହ ପଡି ଯାଇଥିଲେ । ନଦୀ ପାଣିରେ ବୁଡ଼ି ଜଣେ ପ୍ରାଣ ହରାଇଥିବା ବେଳେ ଆଉ ଦୁଇଜଣ ଗୁରୁତର ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ଉଭୟ ପହଞ୍ଚି ସମସ୍ତଙ୍କୁ ଉଦ୍ଧାର କରିଥିଲେ । ପରେ ପୋଲିସ ଗୁରୁତରଙ୍କୁ ଆମ୍ବୁଲାନ୍ସ ଯୋଗେ ରାଇକିଆ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଛି । ଏହା ସହ ଯୁବକଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ।
