ବାଲିଗୁଡ଼ା,୧୫/୧୨: ଭାସମାନ ଅବସ୍ଥାରେ ମହିଳାଙ୍କ ମୃତ ଦେହ ଠାବ ହୋଇଛି । ବାଲିଗୁଡା ଥାନା କଟପଡି ନିକଟସ୍ଥ ବିଲ ମାଳର ଏକ କୂଅରୁ ମହିଳାଙ୍କ ମୃତଦେହ ଭାସୁଥିବା ଅବସ୍ଥାରେ ଉଦ୍ଧାର କରାଯାଇଛି । ମୃତ ମହିଳା ଜଣକ କଟପଡିର ଶାନ୍ତିଲତା ମଳିକ ବୋଲି ଜଣାପଡ଼ିଛି । କନ୍ଧମାଳ ଜିଲ୍ଲା ବାଲିଗୁଡା ଥାନା ଅନ୍ତର୍ଗତ କଟପଡି ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କଟପଡିର ବୀରେନ୍ଦ୍ର ମଳିକଙ୍କ ସ୍ତ୍ରୀ ଗତ ତିନି ତଳେ ନିଜ ବାପ ଘରକୁ ଯିବେ ବୋଲି କହି ଘରୁ ବାହାରିଥିଲେ । କିନ୍ତୁ ଗତ ତିନି ଦିନ ଧରି ମହିଳା ଘରକୁ ଫେରି ନଥିବା ବେଳେ ପରିବାର ଲୋକ ଗାଁରେ ଥିବା ଭାବି ଚୁପ ରହିଥିଲେ । କିନ୍ତୁ ରବିବାର ସକାଳେ କିଛି ଲୋକ କୂଅକୁ ଗାଧୋଇବାକୁ ଯିବା ସମୟରେ ପାଣିରେ ଏକ ମୃତଦେହ ଭାସୁଥିବା ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଏବଂ ବାଲିଗୁଡା ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିଛି । ବାଲିଗୁଡା ପୋଲିସ ଶବ ବ୍ୟବଚ୍ଛେଦ ପାଇଁ ବାଲିଗୁଡା ମେଡିକାଲକୁ ପଠାଇବା ସହ ଘଟଣାର ଅଧିକ ତଦନ୍ତ ଜାରି ରଖିଛି ।
