ମୁମ୍ବାଇ, ୧୩/୪ : ୟୁପିର ମଉରୁ ଏକ ଛାତି ଥରେଇଲା ଭଳି ଘଟଣା ସାମ୍ନାକୁ ଆସିଛି । ୧୩୫ଦିନ ପୂର୍ବରୁ କବରରେ ଥିବା ଜନୈକ ମହିଳାଙ୍କ ମୃତଦେହକୁ ପୁଣି ଥରେ କବରରୁ ବାହାର କରିବାକୁ ନିର୍ଦେଶ ଦେଇଛନ୍ତି କୋର୍ଟ । ଯାହାକୁ ନେଇ ମଉର ଘୋସି ଥାନା ଅଞ୍ଚଳରେ ଏକ ଗାଁରେ ଚାଞ୍ଚଲ୍ୟ ଖେଳିଯାଇଛି ।
ନିର୍ଦେଶରେ କୁହାଯାଇଛି ଯେ ୧୩ଏପ୍ରିଲରେ ମାଜିଷ୍ଟ୍ରେଟ ଏବଂ ପରିବାର ସଦସ୍ୟଙ୍କ ଉପସ୍ଥିତିରେ ମୃତଦେହକୁ କବରରୁ ବାହାର କରାଯାଇ ପୋଷ୍ଟମର୍ଟମ ଲାଗି ପଠାଯିବ । କୋର୍ଟ ଏଭଳି ନିର୍ଦେଶ ଦେବାର କାରଣ ଏହି କି ଯେ ଏଭଳି ହେଲେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ । ସୂଚନା ଅନୁସାରେ , ଏହି ଘଟଣା ୩୦ନଭେମ୍ବର ୨୦୨୩ର ଅଟେ । ସେତେବେଳେ ମହିଳାଙ୍କ ରହସ୍ୟମୟ ପରିସ୍ଥିତିରେ ମୃତ୍ୟୁ ହୋଇଥିଲା । ଆରମ୍ଭରୁ ଏହାକୁ ସାମାନ୍ୟ ମୃତ୍ୟୁ ଭାବି ପରିବାର ଲୋକେ ଅନ୍ତିମ ସଂସ୍କାର କରିଦେଇଥିଲେ । କିନ୍ତୁ ମୃତ୍ୟୁର କିଛିଦିନ ପରେ ମୃତକଙ୍କ ସାନ ଭଉଣୀ ତାଙ୍କ ଭିଣୋଇଙ୍କ ବିରୋଧରେ ବଳାତ୍କାର ଏବଂ ହତ୍ୟାର ଗମ୍ଭୀର ଅଭିଯୋଗ ଲଗାଇଥିଲେ । ଫଳରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି ।
ମୃତକଙ୍କ ଭଉଣୀଙ୍କ କହିବା ଅନୁସାରେ ସେ ତାଙ୍କ ବଡ଼ ଭଉଣୀଙ୍କ ପ୍ରସବ ପରେ ଦେଖା ରଖା ପାଇଁ ତାଙ୍କ ଘରକୁ ଯାଇଥିଲେ । ସେଠାରେ ଭିଣୋଇ ତାଙ୍କ ସହ ଦୁଷ୍କର୍ମ କରିଥିଲେ । ଯେତେବେଳେ ତାଙ୍କ ବଡ଼ ଭଉଣୀ ଦେଖିଥିଲେ ଏହାକୁ ବିରୋଧ କରିଥିଲେ । ସେତେବେଳେ ଭିଣୋଇ ଦିଦିର ହତ୍ୟା କରି ମୃତଦେହକୁ ପୋତିଦେଇଥିଲେ । ପରେ ପୀଡ଼ିତା ନ୍ୟାୟ ପାଇଁ ନିବେଦନ କରି ଚାଲିଥିଲେ ଏବଂ ଶେଷରେ ତାଙ୍କ ଭଉଣୀର ମୃତଦେହକୁ କବରରୁ ବାହାର କରି ପୋଷ୍ଟମର୍ଟମ୍ କରିବାକୁ ଦାବି କରି କୋର୍ଟରେ ଏକ ଆବେଦନ ଦାଖଲ କରିଥିଲେ । ତଥ୍ୟକୁ ଗମ୍ଭୀରତାର ସହ ନେଇ କୋର୍ଟ ଆବେଦନକୁ ଗ୍ରହଣ କରିଛନ୍ତି ।
୧୩ଏପ୍ରିଲରେ ମୃତଦେହକୁ କବରରୁ ବାହାର କରାଯାଇ ଫରେନସିକ୍ ପରୀକ୍ଷା ପାଇଁ ପଠାଯାଇଛି । ଏବେ ପୋଷ୍ଟ ମର୍ଟମ ରିପୋର୍ଟ ପରେ ହିଁ ସ୍ପଷ୍ଟ ହେବ ଯେ ମହିଳାଙ୍କ ମୃତ୍ୟୁ ସ୍ବଭାବିକ ଥିଲା ନା କୌଣସି ଷଡ଼ଯନ୍ତ୍ରର ଶିକାର ହୋଇଥିଲେ । ଯଦି ରିପୋର୍ଟ ହତ୍ୟାକୁ ନିଶ୍ଚିତ କରେ, ତେବେ ହତ୍ୟା ଏବଂ ଦୁଷ୍କର୍ମ ଅନୁଯାୟୀ ଭିଣୋଇଙ୍କ ବିପକ୍ଷରେ କଡ଼ା କାର୍ଯ୍ୟାନୁଷ୍ଠାନ ନିଆଯାଇପାରେ ।
