ନୂଆଦିଲ୍ଲୀ: ପାକିସ୍ତାନ-ଅଧିକୃତ ଗିଲଗିଟ-ବାଲ୍ଟିସ୍ତାନରେ ହଜାର ହଜାର ଲୋକ ଶେହବାଜ ଶରିଫ ସରକାରଙ୍କ ବାଣିଜ୍ୟ ନୀତିକୁ ବିରୋଧ କରି ଚୀନ-ପାକିସ୍ତାନ ଅର୍ଥନୈତିକ କରିଡର (CPEC) ର ପ୍ରମୁଖ ସଂଯୋଗ ପଥ କରାକୋରମ ହାଇୱେକୁ ତିନି ଦିନ ଧରି ଅବରୋଧ କରି ରଖିଛନ୍ତି। ଏହି ବିକ୍ଷୋଭ ଗୁଲମାଟ ନଗରରେ ଚାଲିଛି। ଯେଉଁଠାରେ ବ୍ୟବସାୟୀ ଓ ବିଭିନ୍ନ ରାଜନୈତିକ ଦଳଙ୍କ ସମେତ ଖୋଦ ଶାସକ ଦଳ ପିଏମଏଲ(ଏନ)ର ନେତାମାନେ ସରକାରଙ୍କ ନୀତିକୁ "ଶୋଷଣକାରୀ" ଓ "ଆର୍ଥିକ ହତ୍ୟା" ବୋଲି ଅଭିଯୋଗ କରି ରାସ୍ତାକୁ ଓହ୍ଲାଇଛନ୍ତି।

ବ୍ୟବସାୟୀ ଓ ସ୍ଥାନୀୟ ନେତାମାନେ ଅଭିଯୋଗ କରିଛନ୍ତି ଯେ ଫେଡେରାଲ ଟ୍ୟାକ୍ସ ବୋର୍ଡ (FBR) ସେମାନେ ଦେଇ ସାରିଥିବା ୨୫୦ଟି ଟିକସ ଚାଲାଣର କ୍ଲିୟାରାନ୍ସ ଦେଉନାହିଁ। ଯାହା ଦ୍ୱାରା ସ୍ଥାନୀୟ ବ୍ୟବସାୟୀଙ୍କୁ ଆର୍ଥିକ କ୍ଷତି ସହିବାକୁ ପଡୁଛି। ଶାସକ ଦଳର ଜଣେ ନେତା ଜାଭେଦ ହୁସେନ କହିଛନ୍ତି, "ସରକାର ଆତଙ୍କବାଦୀଙ୍କ ସହ ଆଲୋଚନା କରୁଛନ୍ତି, କିନ୍ତୁ ବ୍ୟବସାୟୀଙ୍କ ସମସ୍ୟା ପ୍ରତି ଧ୍ୟାନ ଦେଉନାହାନ୍ତି।" ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ ଗିଲଗିଟ-ବାଲ୍ଟିସ୍ତାନ ପାର୍ଲାମେଣ୍ଟରେ ପ୍ରତିନିଧିତ୍ୱର ଅଭାବ ହେତୁ ମଧ୍ୟ ଭେଦଭାବର ଶିକାର ହେଉଛି। ପାକିସ୍ତାନ ସରକାର ପଞ୍ଜାବ ପ୍ରତି ସମ୍ପୂର୍ଣ୍ଣ ଧ୍ୟାନ ଦେଉଥିଲା ବେଳେ ଆମକୁ ସମ୍ପୂର୍ଣ୍ଣ ଅଣଦେଖା କରୁଛନ୍ତି।

ଏହି ଅବରୋଧ ଯୋଗୁଁ କରାକୋରମ ହାଇୱେରେ ଯାନବାହାନ ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଯାହା ଚୀନ ଓ ପାକିସ୍ତାନ ମଧ୍ୟରେ ବାଣିଜ୍ୟ ପାଇଁ ଏକ ଗୁରୁତ୍ୱପୂର୍ଣ୍ଣ ମାର୍ଗ ଭାବେ ପରିଗଣିତ ହୋଇଥାଏ। ବିକ୍ଷୋଭକାରୀମାନେ ସରକାର ସେମାନଙ୍କ ଦାବି ପୂରଣ ନକରିବା ପର୍ଯ୍ୟନ୍ତ ଏହି ଅବରୋଧ ଜାରି ରଖିବେ ବୋଲି ଦାବି କରିଛନ୍ତି।

ଏହା ପୂର୍ବରୁ ଗିଲଗିଟ-ବାଲ୍ଟିସ୍ତାନରେ ଭୂମି ଓ ଖଣିଜ ଦଖଲ ଏବଂ ଦୀର୍ଘ ସମୟ ବିଦ୍ୟୁତ ବିଚ୍ଛେଦ ନେଇ ମଧ୍ୟ ବିକ୍ଷୋଭ ହୋଇଥିଲା। ଗତ ମାସରେ ଏକ ପ୍ରସ୍ତାବିତ ବିଲ୍ ବିରୁଦ୍ଧରେ ଲୋକେ ରାସ୍ତାକୁ ଓହ୍ଲାଇଥିଲେ। ଯାହାକୁ ସେମାନେ ଭୂମି ଓ ଖଣିଜ ହଡପ କରିବାର ଉଦ୍ୟମ ବୋଲି ଦାବି କରିଥିଲେ। ସେହିପରି ୨୦୨୩ ଅକ୍ଟୋବରରେ ସ୍କାରଦୁ ଜିଲ୍ଲାରେ ମଧ୍ୟ ଭାରତର କାର୍ଗିଲ ସେକ୍ଟର ଅଞ୍ଚଳକୁ ରାସ୍ତା ଖୋଲିବା ସମର୍ଥନରେ ପ୍ରତିବାଦ ହୋଇଥିଲା।

ଗିଲଗିଟ-ବାଲ୍ଟିସ୍ତାନର ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସହାୟକ ମହମ୍ମଦ ଅଲି କ୍ୱାଇଦ ଏନେଇ କହିଛନ୍ତି ଯେ ସେମି-ପ୍ରାଦେଶିକ ସରକାରଙ୍କ ପାଖରେ ବିକ୍ଷୋଭକାରୀଙ୍କ ଦାବି ପୂରଣ କରିବାର କ୍ଷମତା ନାହିଁ। ଏନେଇ ସମସ୍ତ ଦାୟିତ୍ୱ କେବେଳ ଫେଡେରାଲ(କେନ୍ଦ୍ର) ସରକାରଙ୍କ ପାଖରେ ରହିଛି।

ଏହି ବିକ୍ଷୋଭ ପାକିସ୍ତାନ ସରକାରଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ଯାହା କେବଳ ସ୍ଥାନୀୟ ଅସନ୍ତୋଷକୁ ହିଁ ନୁହେଁ, ବରଂ ସିପିଇସି ପରି ଏକ ରଣନୀତିକ ପ୍ରୋଜେକ୍ଟରେ ମଧ୍ୟ ଗୁରୁତର ପ୍ରଭାବ ପକାଇଛି। ଏହି ଆନ୍ଦୋଳନ ପାଇଁ ଚୀନ ପାକିସ୍ତାନ ଉପରେ ଖପ୍ପା ହୋଇଯାଇଛି। ତେମୁ ପାକିସ୍ତାନ ସରକାର କୌଣସି ବି ଉପାୟରେ ଏହି ଆନ୍ଦୋଳନକୁ ବନ୍ଦ କରିବାକୁ ଉଦ୍ୟମ ଚଳାଇଛନ୍ତି।