ବେଙ୍ଗାଲୁରୁ: କର୍ଣ୍ଣାଟକରେ ଭୟଙ୍କର ଅଘଟଣ। ଦୀର୍ଘ ୧୮ ବର୍ଷର ପ୍ରତିକ୍ଷା ପରେ ଆଇପିଏଲରେ ଆରସିବି ଜିତିବା ପରେ କର୍ଣ୍ଣାଟକ ସରକାରଙ୍କ ଦ୍ୱାରା ବୁଧବାର ଆୟୋଜିତ ଗ୍ରାଣ୍ଡ ଭିକ୍ଟୋରି ସେରିମନିରେ ଦଳାଚକଟା। ଚିନ୍ନାସ୍ୱାମୀ ଷ୍ଟାଡିୟମରେ ହବାକୁ ଥିବା ଏହି ଉତ୍ସବରେ ଦଳାଚକଟା ଯୋଗୁ ଭୟଙ୍କର ସ୍ଥିତି ଉପୁଯିଛି। ଯେଉଁଥିରେ ୧୧ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ଏକାଧିକ ଲୋକ ଆହତ ହୋଇଛନ୍ତି।
ସୂଚନା ମୁତାବକ, ଚଳିତ ଆଇପିଏଲ ସିଜନରେ ଦୀର୍ଘ ୧୮ ବର୍ଷ ପରେ ଆରସିବି ଟ୍ରଫି ଜିତିଥିବାରୁ କର୍ଣ୍ଣାଟକ କ୍ରିକେଟ ବୋର୍ଡ ପ୍ରଶଂସକ ମାନଙ୍କ ପାଇଁ ବୁଧବାର ଏକ ଉତ୍ସବର ଆୟୋଜନ କରିଥିଲେ। ଏହି ଉତ୍ସବରେ ଯୋଗ ଦେବା ପାଇଁ ଲୋକମାନଙ୍କୁ ଟିକେଟ ଓ ପାସ୍ ମଧ୍ୟ ବଣ୍ଟାଯାଇଥିଲା। ହେଲେ ଅନେକ ପ୍ରଶଂସକଙ୍କ ପାଖରେ ଏହି ବିକଳ୍ପ ଉପଲବ୍ଧ ନଥିବାରୁ ସେମାନେ ନିଜ ପସନ୍ଦର ଦଳ ଓ କ୍ରିକେଟରମାନଙ୍କ ଏକ ଝଲକ ପାଇବା ପାଇଁ ଷ୍ଟାଡିୟମ ଭିତରକୁ ଧସେଇ ପସିବାକୁ ଚେଷ୍ଟା କରିଥିଲେ। ଆଉ ଏହିଠାରୁ ହିଁ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା।
ସରକାର ଜାରି କରିଥିବା ପ୍ରାରମ୍ଭିକ ରିପୋର୍ଟ ମୁତାବକ ଷ୍ଟାଡିୟମ ବାହାରେ ହୋଇଥିବା ଏକ ଅସ୍ଥାୟି ସ୍ଲାବ ଉପରେ ଫ୍ୟାନମାନେ ଅହେତୁକ ଭିଡ ଜମାଇଥିଲେ। ହେଲେ ଲୋକସଂଖ୍ୟା ବେଶି ହୋଇଯିବାରୁ ଏହା ଓଜନ ସମ୍ଭାଳି ନପାରି ହଠାତ ଧସିଯାଇଥିଲା। ଯାହାପରେ ସେଠାରେ ଉପସ୍ଥିତ ଥିବା ଲୋକମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା ଓ ଲୋକମାନେ ଏଣେତେଣେ ଦୌଡାଦୈଡି ଆରମ୍ଭ କରିଦେଇଥିଲେ। ଯେଉଁଥିପାଇଁ ଦଳାଚକଟା ସ୍ଥିତି ଉପୁଜି ଥିଲା ବୋଲି ସୂଚନା ରହିଛି।
ଏହି ଦୁର୍ଘଟଣା ସାମ୍ନାକୁ ଆସିବା ପରେ କର୍ଣ୍ଣାଟକ ଉପ-ମୁଖ୍ୟମନ୍ତ୍ରୀ ଡିକେ ଶିବକୁମାର “ଏହି ଦୁର୍ଘଟଣାରେ ମୁଁ ଅତ୍ୟନ୍ତ ମର୍ମାହାତ” ବୋଲି ପ୍ରତିକ୍ରିୟା ଦେଇଛନ୍ତି। ତେବେ ଏହି ଦୁର୍ଘଟଣା ସମୟର ଜାରି ହୋଇଥିବା ଭିଡିଓରେ ପୋଲିସ ଭିଡକୁ ସମ୍ଭାଳିବାରେ ବିଫଳ ହୋଇଥିବା ଦେଖିବାକୁ ମିଳିଛି। ତେବେ ଆହତ ଓ ଗୁରୁତର ଆହତ ଲୋକମାନଙ୍କୁ ଚିକିତ୍ସାଳୟରେ ଭର୍ତ୍ତି କରାଯାଇଥିବା ଜଣାପଡିଛି।
