ମାଲକାନଗିରି, ୨୨/୧୧ :  ସୀମାନ୍ତ ସୁକୁମା ଜିଲ୍ଲାରେ ମାଓବାଦୀ ଯବାନ ଗୁଳି ବିନିମୟ ଘଟି ୧୦ଜଣ ମାଓବାଦୀ ନିହତ ହେବା ସହ ବହୁ ପରିମାଣର ବନ୍ଧୁକ ଗୋଳାବାରୁଦ ଜବତ କରିଥିବାରୁ ଖୁସିରେ ବନ୍ଧୁକ ଧରି ନାଚି ବିଜୟ ଉତ୍ସବ ପାଳିଛନ୍ତି ଯବାନମାନେ । ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ରେ ସୁରକ୍ଷାକର୍ମୀଙ୍କ ଲଗାତାର ଅପରେସନ ଯୋଗୁଁ ଧିରେଧିରେ ମାଓ ଦୁର୍ଗ ଭୁଶୁଡିବା ସହ ଟଳୁଛନ୍ତି ଜଣକ ପରେ ଜଣେ ନକ୍ସଲ ଗତକାଲି ମାଲକାନଗିରିରେ ଅପରେସନ ପରେ ଆଜି ଛତିଶଗଡ଼ରେ ଲାଲ୍ ବାହିନୀ ଉପରେ ହୋଇଛି ଜୋରଦାର ଏନକାଉଣ୍ଟର । ଛତିଶଗଡ଼ର ସୁକମା ଜିଲ୍ଲାରେ ହୋଇଥିବା ଏନକାଉଣ୍ଟରରେ ଆଜି ୧୦ନକ୍ସଲଙ୍କର ମୃତ୍ୟ ଘଟିଛି । ଛତିଶଗଡ଼ର ସୁକମା ଜିଲ୍ଲାର ଭେଜିଥାନା ଅଞ୍ଚଳର ଘଞ୍ଚ ଜଙ୍ଗଲରେ ନକ୍ସଲଙ୍କ ଗୁପ୍ତ ଶିବିର ଚାଲିଥିବା ବିଶ୍ୱସ୍ତ ସୂତ୍ରରୁ ପୁଲିସକୁ ସୂଚନା ମିଳିଥିଲା I 

ଏହାପରେ ବସ୍ତର ଆଇଜିଙ୍କ ନିର୍ଦ୍ଦେଶକ୍ରମେ ସୁକମା ଏସ୍‌ପିଙ୍କ ନେତୃତ୍ୱରେ ଆଜି ସକାଳେ କୁମ୍ବିଂ ଅପରେସନ ଓ ସର୍ଚ୍ଚ ଅପରେସେନ ଉକ୍ତ ଜଙ୍ଗଲରେ ଆରମ୍ଭ ହୋଇଥିଲା । ଏହି ଅପରେସନରେ ପ୍ରାୟ ଶହେରୁ ଅଧିକ ସିଆର୍‌ଏଫ୍ ଯବାନ ଓ ସ୍ଥାନୀୟ ପୁଲିସ ସାମିଲ ହୋଇଥିଲେ I ଜଙ୍ଗଲ ମଧ୍ୟରେ ସୁରକ୍ଷା କର୍ମୀ ଓ ନକ୍ସଲଙ୍କ ମଧ୍ୟରେ ତୁହାକୁ ତୁହା ଗୁଳି ବିନିମୟ ହୋଇଥିଲା । ଯବାନଙ୍କ ଗୁଳିରେ ୧୦ନକ୍ସଲ ନିହତ ହୋଇଛନ୍ତି, ଏବେ ସୁଦ୍ଧା ୧୦ନକ୍ସଲଙ୍କ ମୃତଦେହକୁ ଜବତ କରାଯାଇଥିବାବେଳେ ଘଟଣାସ୍ଥଳରୁ ଇନସାସ୍, ଏକେ- ୪୭, ଓ ଅନ୍ୟ ଅସ୍ତ୍ରଶସ୍ତ୍ର ବହୁ ପରିମାଣ ଗୋଳାବାରୁଦ ଜବତ ହୋଇଛି । 

ଅଧିକ ମୃତ ଆହତ ହୋଇଥିବା ସନ୍ଦେହରେ ଜଙ୍ଗଲରେ ଏବେ ବି ଯବାନଙ୍କ ପକ୍ଷରୁ ସର୍ଚ୍ଚ ଅପରେସନ ଜାରିଥିବା  ବସ୍ତର ଆଇଜି ପି. ସୁନ୍ଦରରାଜ ସୂଚନା ଦେଇଛନ୍ତି I ବୁଧବାର ରାତ୍ରରେ ମାଲକାନଗିରି ଜିଲ୍ଲା ଏମଭି ୭୯ ଥାନା ସ୍ଥ ଜିନେଲିଗୁଡା ମେଟାଗୁଡା ଜଙ୍ଗଲରେ ଗୁଳି ବିନିମୟ ପରେ ଗତରାତିରେ ଓଡ଼ିଶା - ଛତିଶଗଡ଼ ସୀମା ଗରିଆବନ୍ଧ ଜିଲ୍ଲା ଯୁଗାଡ ଥାନା ଅମାଡ଼ ଜଙ୍ଗଲରେ ମଧ୍ୟ କୁମ୍ବିଂ ଅପରେସନ୍ ହୋଇଥିଲା, ଏହି ଅପରେସନବେଳେ ନକ୍ସଲ କ୍ୟାମ୍ପରୁ ବନ୍ଧୁକ ସମେତ ଅନ୍ୟ ସାମଗ୍ରୀ ବି ଜବତ ହୋଇଛି । ଗୋଟିଏ ଦିନରେ ଏନକାଉଣ୍ଟରରେ ୧୦ ମାଓବାଦୀଙ୍କ ମୃତ୍ୟୁ ହେବା ଘଟଣାରେ ଅରେସନ ପରେ ଖୁସିରେ ଯବାନମାନେ ବିଜୟ ଉତ୍ସବ ପାଳନ କରି ନାଚ ଗୀତ କରିଥିଲେ।