ବୀରମିତ୍ରପୁର,୨୨/୧୧: ସୁନ୍ଦରଗଡ଼ ଜିଲ୍ଲା ବୀରମିତ୍ରପୁର ଅଞ୍ଚଳର ଶିକ୍ଷୟିତ୍ରୀ ଦେବଶ୍ରୀ କୁଣ୍ଡୁ (୩୨)ଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି । ସ୍କ୍ରବ୍ ଟାଇଫସ୍ ସଂକ୍ରମଣରେ ତାଙ୍କ ଜୀବନ ଯାଇଥିବା ପରିବାର ପକ୍ଷରୁ କୁହାଯାଇଛି । ହେଲେ ମେଡିକାଲ ରିପୋର୍ଟ ଆସି ନ ଥିବାରୁ ଏହା ସ୍କ୍ରବ୍ ଟାଇଫସ୍ କି ନୁହେଁ³ ତାହା ସ୍ପଷ୍ଟ ହୋଇପାରିନାହିଁ ।
ବୀରମିତ୍ରପୁର ପୌରାଞ୍ଚଳର ୱାର୍ଡ ନଂ.୫ ନିବାସୀ ସୁମିତ୍ କୁମାର ମାଝୀଙ୍କ ପତ୍ନୀ ଦେବଶ୍ରୀ ସ୍ଥାନୀୟ ସରସ୍ୱତୀ ଶିଶୁ ବିଦ୍ୟାମନ୍ଦିରରେ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଥିଲେ । ସୁମିତ୍ଙ୍କ କହିବା କଥା, ଗତ ୯ ତାରିଖ ସନ୍ଧ୍ୟାରେ ଦେବଶ୍ରୀ ୪ ବର୍ଷର ପୁଅକୁ ନେଇ ପୌରପାଳିକା ପକ୍ଷରୁ ନିର୍ମିତ ଗାନ୍ଧି ପାର୍କକୁ ବୁଲିବାକୁ ଯାଇଥିଲେ । ସେଠାରେ ଦେବଶ୍ରୀଙ୍କ ହାତକୁ ଏକ କୀଟ କାମୁଡ଼ି ଦେଇଥିଲେ । ୧୦ ତାରିଖରେ ତାଙ୍କୁ ପ୍ରବଳ ଜ୍ୱର ହୋଇଥିଲା । ଔଷଧ ଖାଇବା ପରେ ଜ୍ୱର କମି ଯାଇଥିଲେ । ହେଲେ ସେ ଦୁର୍ବଳ ଅନୁଭବ କରୁଥିଲେ ।
ଗତ ୧୯ ତାରିଖରେ ହଠାତ୍ ଅଚେତ ହୋଇପଡ଼ି ଯିବାରୁ ତାଙ୍କୁ ଇସ୍ପାତ ଜେନେରାଲ୍ ହସ୍ପିଟାଲ (ଆଇଜିଏଚ୍)ର ଆଇସିୟୁରେ ଭର୍ତ୍ତି କରାଯାଇଥିଲା । ଗୁରୁବାର ଭୋର୍ରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଥିଲା । ସ୍କ୍ରବ୍ ଟାଇଫସ୍ରେ ପତ୍ନୀଙ୍କ ମୃତ୍ୟୁ ଘଟିଥିବା ସୁମିତ୍ କହିଛନ୍ତି । ହେଲେ ଡାକ୍ତରଖାନା କର୍ତ୍ତୃପକ୍ଷ ଏହା ସ୍ପଷ୍ଟ କରିନାହାନ୍ତି । ଅପରପକ୍ଷେ ଘଟଣା ପରେ ଗାନ୍ଧି ପାର୍କକୁ ବନ୍ଦ କରି ଦିଆଯାଇଛି । ଶୁକ୍ରବାର ପାର୍କକୁ ସାନିଟାଇଜେସନ କରାଯିବ ଓ ଲୋକଙ୍କୁ ସଚେତନ କରାଯିବ ବୋଲି ପୌରପାଳିକା ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ୨୦୧୨ରୁ ଦେବଶ୍ରୀ ସରସ୍ୱତୀ ଶିଶୁ ବିଦ୍ୟାମନ୍ଦିରରେ ଶିକ୍ଷକତା କରୁଥିଲେ । ମୃତଦେହ ବାରୁପଡ଼ାରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଶିକ୍ଷୟିତ୍ରୀଙ୍କ ଅକାଳ ବିୟୋଗରେ ବିଦ୍ୟାଳୟ କର୍ତ୍ତୃପକ୍ଷ ସ୍କୁଲ ଛୁଟି କରିଥିଲେ । ବେଦବ୍ୟାସ ସ୍ୱର୍ଗଦ୍ୱାରରେ ତାଙ୍କର ଅନ୍ତିମ ସତ୍କାର ସମ୍ପନ୍ନ ହୋଇଛି
