ନୂଆଦିଲ୍ଲୀ: ନୂଆଦିଲ୍ଲୀରେ ପହଞ୍ଚିଲେ ମାଳଦ୍ୱୀପ ରାଷ୍ଟ୍ରପତି ମହମ୍ମଦ ମୁଇଜୁ । ସେ ଭାରତରେ ୫ ଦିନ ରହିବେ । ମୁଇଜୁଙ୍କ ସହ ମାଳଦ୍ୱୀପର ପ୍ରଥମ ମହିଳା ତଥା ତାଙ୍କ ପତ୍ନୀ ସାଜିଦା ମହମ୍ମଦ ମଧ୍ୟ ଉପସ୍ଥିତ ଅଛନ୍ତି। ଏହି ଗସ୍ତ ସମୟରେ ରାଷ୍ଟ୍ରପତି ମୁଇଜୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଅନ୍ୟ ବରିଷ୍ଠ ଅଧିକାରୀଙ୍କ ବ୍ୟତୀତ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ବୈଠକ କରିବେ ।
ଏହା ପରେ ସେ ମୁମ୍ବାଇ ଏବଂ ବେଙ୍ଗାଲୁରୁ ମଧ୍ୟ ଯିବେ, ଯେଉଁଠାରେ ସେ ବ୍ୟବସାୟିକ କାର୍ଯ୍ୟକ୍ରମରେ ଅଂଶଗ୍ରହଣ କରିବେ । ସୂଚନାଥାଉକି, ମାଲଦ୍ୱୀପ ହେଉଛି ଭାରତ ମହାସାଗର (IOR) ର ପ୍ରମୁଖ ସାମୁଦ୍ରିକ ପଡ଼ୋଶୀ । ଭାରତର 'ପଡୋଶୀ ପ୍ରଥମ ନୀତି' ପ୍ରଧାନମନ୍ତ୍ରୀଙ୍କ ଦୃଷ୍ଟିଭଙ୍ଗୀରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛି । ନିକଟରେ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କରଙ୍କ ମାଲଦ୍ୱୀପ ଗସ୍ତ ପରେ ରାଷ୍ଟ୍ରପତି ଡ ମୁଇଜୁଙ୍କ ଭାରତ ଗସ୍ତ ମାଲଦ୍ୱୀପ ସହ ସମ୍ପର୍କକୁ ଭାରତର ଗୁରୁତ୍ୱ ଦେଉଛି ଏବଂ ଏହା ଲୋକମାନଙ୍କ ସହଯୋଗକୁ ଆହୁରି ତ୍ୱରାନ୍ୱିତ କରିବ ବୋଲି ଆଶା କରାଯାଉଛି।
ଏ ହେଉଛନ୍ତି ସେହି ମୁଇଜୁ, ଯିଏକି ମାଲଦ୍ୱୀପରେ କ୍ଷମତାକୁ ଆସିବା ମାତ୍ରେ ଭାରତ ବିରୁଦ୍ଧରେ ବିଦ୍ରୋହର ବିଗୁଲ ବଜାଇଥିଲେ । କିନ୍ତୁ ବର୍ତ୍ତମାନ ରାଷ୍ଟ୍ରପତି ମହମ୍ମଦ ମୁଇଜୁଙ୍କ ମନୋଭାବରେ ପରିବର୍ତ୍ତନ ଆସିଛି। ଚୀନ୍ ପ୍ରେମୀ ମହମ୍ମଦ ମୁଇଜୁ ବର୍ତ୍ତମାନ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବା ପାଇଁ ତାଙ୍କର ପ୍ରଥମ ରାଜକୀୟ ଗସ୍ତରେ ନୂଆଦିଲ୍ଲୀ ଆସିଛନ୍ତି । ମୁଇଜୁ ୬ ରୁ ୧୦ ଅକ୍ଟୋବର ପର୍ଯ୍ୟନ୍ତ ଦିଲ୍ଲୀ ଗସ୍ତରେ ରହିବେ । ଏହା ପୂର୍ବରୁ ସେ ପିଏମ ମୋଦୀଙ୍କ ଶପଥ ଗ୍ରହଣ ସମାରୋହରେ ଯୋଗଦେବା ପାଇଁ ଜୁନ୍ ମାସରେ ନୂଆଦିଲ୍ଲୀ ଆସିଥିଲେ।