ଯୋଧପୁର,୨୧/୦୯ (ସୁକେଶ ବେହେରା): ଶେଷ ବଲ୍ ଯାଏ ରୋମାଞ୍ଚକର ଥିଲା ଲିଜେଣ୍ଡସ୍ ଲିଗ୍ କ୍ରିକେଟର (ଏଲ୍ସିସି) ଉଦ୍ଘାଟନୀ ମ୍ୟାଚ୍ । ୬ ବଲ୍ରୁ ମଣିପାଲ ଟାଇଗର୍ସକୁ ଆବଶ୍ୟକ ଥିଲା ୧୩ ରନ୍ । ପ୍ରଥମ ବଲ୍ରେ ୱାଇଡ୍, ପରବର୍ତ୍ତୀ ବଲ୍ରେ ବିଶାଳ ଛକା ଖାଇବା ପରେ ନିରାଶ ହୋଇନଥିଲେ କୋଣାର୍କ ସୂର୍ଯ୍ୟସ୍ ଓଡ଼ିଶା ଅଧିନାୟକ ଇରଫାନ୍ ପଠାନ୍ । ୫ ବଲ୍ରୁ ସହଜ ୬ ରନ୍କୁ ନିଜ ବୋଲିଂ ଯାଦୁକରୀରେ ଅଟକାଇ ଦେଇଥିଲେ ସେ । ଡିଫେଣ୍ଡିଂ ଚାମ୍ପିଅନ୍ ମଣିପାଲ୍ ଟାଇଗର୍ସକୁ ୨ ରନ୍ରେ ହରାଇ ଆଜି ଏଲ୍ସିସିରେ ବିଜୟ ଅଭିଯାନ ଆରମ୍ଭ କରିଛି ଓଡ଼ିଶା ।
ଓଡ଼ିଶା ଠାରୁ ପାଖା ପାଖି ୧୭୦୦ କିଲୋମିଟର ଦୂରରେ ବୀର ଯୋଧପୁର ମାଟିରେ ଚମକିଛନ୍ତି କୋଣାର୍କ ସୂର୍ଯ୍ୟସ୍ର ଖେଳାଳି । ପ୍ରଥମେ ବ୍ୟାଟିଂ କରି ଓଡ଼ିଶା ୯ ୱିକେଟରେ ୧୦୪ରନ୍ କରିଥିଲା । ଜବାବରେ ମଣିପାଲ୍ ଟାଇଗର୍ସ ୮ ୱିକେଟ୍ ହରାଇ ୧୦୨ ରନ୍ରେ ଅଟକିଥିଲା । ବିଜୟୀ ଦଳର ବିନୟ କୁମାର ଲିଜେଣ୍ଡ ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
ମଣିପାଲ ଅଧିନାୟକ ହରଭଜନ ସିଂ ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେବା ପରେ ଓଡ଼ିଶା ପକ୍ଷରୁ ରିଚାର୍ଡ ଲେଭି ଓ ଅମ୍ବାତି ରାୟୁଡୁ ଓପନ୍ କରିଥିଲେ । ଦ୍ୱିତୀୟ ଓଭରରେ କୋଣାର୍କ ସୂର୍ଯ୍ୟସ୍କୁ ଲାଗିଥିଲା ଝଟ୍କା । ଅମ୍ବାତି ରାୟୁଡୁଙ୍କୁ ଶିକାର କରିଥିଲେ ଅନୁରିତ ସିଂହ । ସେ ୮ରନ୍ କରିଥିଲେ । ତାଙ୍କ ସ୍ଥାନରେ ଆୟର୍ଲାଣ୍ଡର ପୂର୍ବତନ ବ୍ୟାଟର୍ କେଭିନ୍ ଓବ୍ରିଏନ୍ ବ୍ୟାଟିଂ ଆସି ପ୍ରଥମ ବଲ୍ରେ ଏକ ବିଶାଳ ଛକା ମାରି ନିଜର ଶକ୍ତି ପ୍ରଦର୍ଶନ କରିଥିଲେ । କିନ୍ତୁ ସେ ୫ ବଲ୍ରୁ ୬ ରନ୍ କରି ଆଉଟ୍ ହୋଇଥିଲେ ।
ଦିଲସାନ ମୁନାଓି୍ୱରା ମଧ୍ୟ ଦଳର ସ୍ଥିତି ସୁଧାରି ପାରିନଥିଲେ । ୧୬ବଲରୁ ୧୧ ରନ୍ କରି ରବିନ୍ ଉଥ୍ପ୍ପାଙ୍କ ଦ୍ୱାରା ଷ୍ଟମ୍ ହୋଇଥିଲେ । ଭରସାଯୋଗ୍ୟ ବ୍ୟାଟର୍ ରସ୍ ଟେଲର୍ ଓ ଅଧିନାୟକ ଇରଫାନ୍ ପଠାନଙ୍କ ଉପରେ ଦଳ ନିର୍ଭର କରିଥିଲା । ଅଧିନାୟକ ଇରଫାନ୍ ଦୁଇଟି ଆକର୍ଷଣୀୟ ଚୌକା ମାରିଥିଲେ । ୨୩ ବଲ୍ରୁ ୧୮ରନ୍ (୨ଚୌକା) କରି ଖେଳୁଥିବା ବେଳେ ହରଭଜନ ସିଂହଙ୍କ ଗୁଗ୍ଲି ଆଗରେ ଉପାୟଶୂନ୍ୟ ହୋଇପଡ଼ି ୱିକେଟ୍ ହରାଇଥିଲେ ।
ନିୟମିତ ବ୍ୟବଧାନରେ ୱିକେଟ୍ ହରାଇ କୋଣାର୍କ ସୂର୍ଯ୍ୟସ୍ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ମାତ୍ର ୫୪ ରନ୍ରେ ଦଳ ୫ ୱିକେଟ ହରାଇ ବସିଥିଲା । ଇରଫାନ୍ଙ୍କ ସ୍ଥାନ ପୂରଣ କରିଥିଲେ ବଡ଼ ଭାଇ ୟୁସୁଫ୍ । କିନ୍ତୁ ସେ (୩) ସହଳ ପାଭିଲିୟନ ଫେରିଥିଲେ । ଟେଲର ପ୍ରାୟ ୧୯ ଓଭର ଯାଏ ପିଚ୍ରେ ଥାଇ ମଧ୍ୟ କିଛି କମାଲ୍ କରିପାରିନଥିଲେ । ସେ ୨୮ବଲ୍ରୁ ଗୋଟିଏ ଚୌକା ସହାୟତାରେ ୧୪ରନ୍ କରିଥିଲେ । ନିମ୍ନକ୍ରମରେ ନବୀନ୍ ଷ୍ଟିୱାର୍ଟ ୧୨ ବଲ୍ରୁ ଦ୍ରୁତ ୧୭ ରନ୍ର ପାଳି ଖେଳି ଦଳର ସ୍କୋରକୁ ଶହେ ରନ୍ ପାର୍ କରିଥିଲେ । ଶେଷରେ ଦଳ ନିର୍ଦ୍ଧାରିତ ୨୦ ଓଭରରେ ୯ ୱିକେଟ ହରାଇ ୧୦୪ରନ୍ କରିଥିଲା । ମଣିପାଲ୍ ଟାଇଗର୍ସ ପକ୍ଷରୁ ଅନୁରିତ ସିଂହ, ଓବୁସ ପାଏନାର୍ଙ୍କୁ ଦୁଇଟି ଲେଖାଏଁ ୱିକେଟ୍ ପାଇଥିଲେ ।
ବିଜୟ ଲକ୍ଷ୍ୟ ୧୦୫ ରନ୍କୁ ପିଛା କରି ବ୍ୟାଟିଂକୁ ଓହ୍ଲାଇଥିଲା ମଣିପାଲ ଟାଇଗର୍ସ ପ୍ରାରମ୍ଭରରୁ ବିପର୍ଯ୍ୟର ସମ୍ମୁଖୀନ ହୋଇଥିଲେ ବି ଡାନ୍ କ୍ରିଷ୍ଟିଆନ (୩୦) ଏବଂ ଓବୁସ୍ ପାଏନାର (୩୪ ଅପରାଜିତ) ଦଳକୁ ଜିତାଇବା ନେଇ ପ୍ରୟାସ କରିଥିଲେ । ମାତ୍ର ସଫଳ ହୋଇପାରି ନଥିଲେ । ଶେଷ ଓଭରରେ ଦଳ ମାତ୍ର ୨ ରନ୍ରୁ ବିଜୟରୁ ବଞ୍ଚିତ ହୋଇଥିଲା । ସୌରଭ ତିୱାରୀ ୫, ଆଞ୍ଜେଲୋ ପେରେରା ୫, ଆସେଲା ଗୁଣରତ୍ନେ ୧୩ ଓ ଅନୁରିତ ସିଂ ୯ (ଅପରାଜିତ) କରିଥିଲେ । ଓଡ଼ିଶା ପକ୍ଷରୁ ସାହାବାଜ ନଦୀମ, ବିନୟ କୁମାର, ଦିଲସାନ ମୁନାବୀରା ୨ଟି ଲେଖାଏଁ ୱିକେଟ୍ ନେଇଥିଲେ ।
