ନୂଆଦିଲ୍ଲୀ,୭।୮: କର୍ଣ୍ଣାଟକରେ ଭୋଟର ତାଲିକାରେ ଅନିୟମିତତା ନେଇ ରାହୁଲ ଗାନ୍ଧୀଙ୍କ ଅଭିଯୋଗ ଉପରେ ନିର୍ବାଚନ କମିଶନ କଠୋର ଆଭିମୁଖ୍ୟ।  ନିର୍ବାଚନ କମିଶନ (ଇସି) କଂଗ୍ରେସ ସାଂସଦ ଏବଂ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଏକ ଚିଠି ଲେଖିଛନ୍ତି। ଚିଠିରେ ଇସି କହିଛନ୍ତି, ଯଦି ସେ ଭୋଟରଙ୍କ ନାମ, ଠିକଣା ଏବଂ ପରିଚୟରେ ଜାଲିଆତି ଅଭିଯୋଗ ଆଣିଛନ୍ତି, ତେବେ ସେ ପ୍ରମାଣ ସହିତ ଆନୁଷ୍ଠାନିକ ଭାବରେ ଏକ ଘୋଷଣାପତ୍ର  ସ୍ୱାକ୍ଷର କରନ୍ତୁ। ନଚେତ୍, ସେ ତାଙ୍କର ମନ୍ତବ୍ୟ ପ୍ରତ୍ୟାହାର କରିବା ଉଚିତ ଏବଂ ଜନସାଧାରଣଙ୍କୁ ଭ୍ରମିତ କରିବା ବନ୍ଦ କରନ୍ତୁ।

ଏହାର ଉତ୍ତରରେ ରାହୁଲ ଗାନ୍ଧୀ କହିଛନ୍ତି ଯେ ସେ ଜଣେ ନେତା ଏବଂ ସେ ସାର୍ବଜନୀନ ଭାବରେ ଯାହା କହୁଛନ୍ତି, ଏହାକୁ ହିଁ  ଘୋଷଣାପତ୍ର ମନେକରାଯାଉ।  ଉଲ୍ଲେଖନୀୟ ଯେ, କର୍ଣ୍ଣାଟକର ମୁଖ୍ୟ ନିର୍ବାଚନ ଅଧିକାରୀ (ସିଇଓ)ଙ୍କ ଦ୍ୱାରା ଜାରି କରାଯାଇଥିବା ଏହି ଚିଠିରେ, ୮ ଅଗଷ୍ଟ ୨୦୨୫ ମଧ୍ୟାହ୍ନ ୧ଟାରୁ ୩ଟା ମଧ୍ୟରେ ରାହୁଲ ଗାନ୍ଧୀଙ୍କୁ ଭେଟିବା ପାଇଁ ଅନୁମତି ଦିଆଯାଇଛି। ଚିଠିରେ ସ୍ପଷ୍ଟ କରାଯାଇଛି ଯେ SSR ୨୦୨୫ର ଡ୍ରାଫ୍ଟ ଏବଂ ଚୂଡ଼ାନ୍ତ ଭୋଟର ତାଲିକା ଯଥାକ୍ରମେ ନଭେମ୍ବର ୨୦୨୪ ଏବଂ ଜାନୁଆରୀ ୨୦୨୫ରେ କଂଗ୍ରେସକୁ ଦିଆଯାଇଥିଲା। ଏହା ସତ୍ତ୍ୱେ, କଂଗ୍ରେସ ପକ୍ଷରୁ ପ୍ରଥମ କିମ୍ବା ଦ୍ୱିତୀୟ ସ୍ତରୀୟ ଆପତ୍ତି କିମ୍ବା ଆବେଦନ ଦାଖଲ କରାଯାଇ ନାହିଁ।

ଉଲ୍ଲେଖନୀୟ ଯେ, ଆଜି ଏକ ସାମ୍ବାଦିକ ସମ୍ମିଳନୀରେ କର୍ଣ୍ଣାଟକ ବିଧାନସଭା ନିର୍ବାଚନରେ ନକଲି ଭୋଟିଂର ଅଭିଯୋଗ କରିଥିଲେ ରାହୁଲ। ଏହା ସହ ରାହୁଲ କିଛି ପ୍ରମାଣ ମଧ୍ୟ ଦେଖାଇଥିଲେ। ସେ କହିଥିଲେ,ଭୋଟର ଲିଷ୍ଟରେ ହାଉସ ନମ୍ବର ‘୦’ ଲେଖା ଅଛି। ସେଭଳି ବାପାଙ୍କ ନାଁ ମଧ୍ୟ ନକଲି। ତେଣୁ ଜନସାଧାରଣ ଭୋଟର ତାଲିକା ଉପରେ ବିଶ୍ୱାସ କରୁ ନାହାନ୍ତି । ନିର୍ବାଚନ କମିଶନଙ୍କ ଦ୍ବାରା ଜାରି ଘୋଷଣାପତ୍ରରେ ରାହୁଲଙ୍କୁ ଏହା ସ୍ପଷ୍ଟ କରିବାକୁ ହେବ ସେ କେଉଁ ନାଁକୁ ନକଲି ମାନନ୍ତି ? ତାଙ୍କର ପାର୍ଟ ନମ୍ବର ଓ ସିରିୟଲ ନମ୍ବର କ’ଣ ?  ଏହି ବୟାନ ସେ ବ୍ୟକ୍ତିଗତ ସୂଚନା ଆଧାରରେ ଦେଉଛନ୍ତି। କମିଶନ୍ କହିଛନ୍ତି, ଯଦି ରାହୁଲ ମିଛ ସୂଚନା ଦେଉଛନ୍ତି ତେବେ ତାଙ୍କ ଉପରେ ଆରପି ଆକ୍ଟ ୧୯୫୦ର  ଧାରା ୩୧ ଓ ଭାରତୀୟ ନ୍ୟାୟ ସଂହିତା ୨୦୨୩ ର ଧାରା ୨୨୭ ଅନୁସାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ।