ନୂଆଦିଲ୍ଲୀ: ଲଗାତାର ପଞ୍ଚମ ବର୍ଷ ପାଇଁ କମ୍ପାନୀରୁ କୌଣସି ବେତନ ଗ୍ରହଣ କରିନାହାଁନ୍ତି ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (RIL)ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ମୁକେଶ ଅମ୍ବାନୀ। ବିଶ୍ୱର ସବୁଠାରୁ ଧନୀ ବ୍ୟକ୍ତି ମାନଙ୍କ ମଧ୍ୟରୁ ଜଣେ ହେଉଛନ୍ତି ମୁକେଶ ଅମ୍ବାନୀ। ଆର୍ଥିକ ବର୍ଷ ୨୦୨୦-୨୧ ପରଠାରୁ ଅମ୍ବାନୀ ନିଜ କମ୍ପାନୀରୁ କୌଣସି ଦରମା ଗ୍ରହଣ କରି ନାହାଁନ୍ତି । ପ୍ରକୃତରେ, କରୋନା ମହାମାରୀ ପରେ ସୃଷ୍ଟି ହୋଇଥିବା ଭୟଙ୍କର ଆର୍ଥିକ ପରିସ୍ଥିତି ଯୋଗୁଁ,ମୁକେଶ ଅମ୍ବାନୀ ସ୍ୱେଚ୍ଛାକୃତ ଭାବରେ ସମସ୍ତ ପ୍ରକାରର ଭତ୍ତା, ଅବସର ଲାଭ ଏବଂ ଯେକୌଣସି ପ୍ରକାରର କମିଶନ ସହିତ ତାଙ୍କର ସମ୍ପୂର୍ଣ୍ଣ ଦରମା ଛାଡିବାକୁ ନିଷ୍ପତ୍ତି ନେଇଥିଲେ।

କରୋନା ପୂର୍ବରୁ, ୨୦୦୮-୦୯ ଆର୍ଥିକ ବର୍ଷରୁ ୨୦୧୯-୨୦ ମଧ୍ୟରେ,୬୭ ବର୍ଷୀୟ ମୁକେଶ ଅମ୍ବାନୀ ତାଙ୍କର ବାର୍ଷିକ ପାରିଶ୍ରମିକ ୧୫ କୋଟି ଟଙ୍କାରେ ସୀମିତ ରଖିଥିଲେ। ଏହାର କାରଣ ଥିଲା, ପରିଚାଳନା ସ୍ତରରେ ଶିଳ୍ପ ଏବଂ କମ୍ପାନୀ ପାଇଁ ଏକ ବ୍ୟକ୍ତିଗତ ଉଦାହରଣ ସ୍ଥାପନ କରିବା। ଏହା ଉଲ୍ଲେଖନୀୟ ଯେ, ମାର୍ଚ୍ଚ ୨୦୨୦ରେ ଆସିଥିବା କୋଭିଡ୍ -19 ମହାମାରୀ ଦେଶର ସାମାଜିକ, ଅର୍ଥନୈତିକ ଏବଂ ଶିଳ୍ପ ପରିସ୍ଥିତି ସହିତ ସମଗ୍ର ବିଶ୍ୱ ଉପରେ ବହୁତ ଖରାପ ପ୍ରଭାବ ପକାଇଥିଲା। ଏହା ରିଲାଏନ୍ସର ବାର୍ଷିକ ରିପୋର୍ଟରେ ପ୍ରକାଶ ପାଇଛି।

ରିଲାଏନ୍ସର ବାର୍ଷିକ ରିପୋର୍ଟ ଅନୁଯାୟୀ,କମ୍ପାନୀର କାର୍ଯ୍ୟନିର୍ବାହୀ ନିର୍ଦ୍ଦେଶକ ନିଖିଲ ମେସୱାନି ବାର୍ଷିକ ମୋଟ ୨୫ କୋଟି ଟଙ୍କା ଦରମା ଏବଂ ଅନ୍ୟାନ୍ୟ ଜିନିଷ ପାଆନ୍ତି। ସେହି ସମୟରେ, ତାଙ୍କ ସାନ ଭାଇ ହିତଲ ମେସୱାନିଙ୍କ ଦରମା ମଧ୍ୟ ୨୫ କୋଟି ଟଙ୍କା। ରିଲାଏନ୍ସର ଅନ୍ୟ କାର୍ଯ୍ୟନିର୍ବାହୀ ନିର୍ଦ୍ଦେଶକ ପି.ଏମ୍.ଏସ୍. ପ୍ରସାଦ ପ୍ରାୟ ୨୦ କୋଟି ଟଙ୍କା ଦରମା ଏବଂ ଅନ୍ୟାନ୍ୟ ଜିନିଷ ପାଆନ୍ତି। ସୂଚନାଥାଉକି, ଆମେରିକିୟ ପତ୍ରିକା ଫୋବର୍ସର ଧନୀ ବ୍ୟକ୍ତିଙ୍କ ତାଲିକାରେ ମୁକେଶ ଅମ୍ବାନୀ ବିଶ୍ୱରେ ୧୮ ତମ ସ୍ଥାନରେ ଅଛନ୍ତି ।