ନୂଆଦିଲ୍ଲୀ,୨୨/୦୪: ୪ ଦିନିଆ ଭାରତ ଗସ୍ତରେ ଅଛନ୍ତି ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ । ଉପରାଷ୍ଟ୍ରପତି ଜେଡିଙ୍କ ସହ ଭାରତୀୟ ବଂଶୋଦ୍ଭବ ପତ୍ନୀ ଉଷା ଭାନ୍ସ ଏବଂ ସେମାନଙ୍କ ପିଲାମାନଙ୍କ ସହିତ ପ୍ରଥମ ଥର ପାଇଁ ଭାରତ ଗସ୍ତରେ ଆସିଛନ୍ତି । ପ୍ରଥମ ଦିନରେ ଭାନ୍ସ , ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ କରିଥିବା ବେଳେ ଗସ୍ତର ଦ୍ବିତୀୟ ଦିନର ସେ ଜୟପୁରରେ ପହଞ୍ଚିଛନ୍ତି। ଯେଉଁଠାରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ।
ସେ ଆଜି ରାଜସ୍ଥାନ ଅନ୍ତର୍ଜାତୀୟ କେନ୍ଦ୍ରରେ ଆୟୋଜିତ ଏକ କାର୍ଯ୍ୟକ୍ରମରେ ଆମେରିକା-ଭାରତ ସମ୍ପର୍କ ଉପରେ ଏକ ଭାଷଣ ମଧ୍ୟ ଦେବେ। ଜେଡି ଭାନ୍ସଙ୍କ ଜୟପୁର ଗସ୍ତ ପାଇଁ ପୋଲିସ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା କରିଛି। ଭାନ୍ସଙ୍କ ସୁରକ୍ଷା ପାଇଁ ୭ ଜଣ ଆଇପିଏସ୍ ଅଧିକାରୀ, ୨୦ ଜଣ ଅତିରିକ୍ତ ଡିସିପି, ୪୦ ଜଣ ଏସିପି, ୩୦୦ ଜଣ ଏଏସ୍ଆଇ, ଏସ୍ଆଇ ଏବଂ ସିଆଇଙ୍କୁ ନିୟୋଜିତ କରାଯାଇଛି। ଏହା ବ୍ୟତୀତ, ୨୧ଶହ କନଷ୍ଟେବଳଙ୍କୁ କ୍ଷେତ୍ରରେ ନିୟୋଜିତ କରାଯାଇଛି।
ଏନେଇ, ଅତିରିକ୍ତ ପୋଲିସ କମିଶନର ଆଇନ ଏବଂ ଶୃଙ୍ଖଳା ରାମେଶ୍ୱର ସିଂହ କହିଛନ୍ତି ଯେ ଆଗାମୀ ୪ ଦିନ ପାଇଁ ଜୟପୁରକୁ ହାଇ ଆଲର୍ଟରେ ରଖାଯାଇଛି। ବେନ୍ସଙ୍କ ଗସ୍ତକୁ ଦୃଷ୍ଟିରେ ରଖି ପୋଲିସ ବିକଳ୍ପ ରାସ୍ତା ମଧ୍ୟ ରଖିଛି।ତେବେ ଜେଡି ଭାନ୍ସ ଗତକାଲି ତାଙ୍କ ପତ୍ନୀ ଉଷା ଭାନ୍ସ ଏବଂ ତିନି ସନ୍ତାନ ଇଭାନ୍, ବିବେକ ଏବଂ ମାରିବେଲଙ୍କ ସହିତ ଅକ୍ଷରଧାମ ମନ୍ଦିର ପରିଦର୍ଶନ କରିଥିଲେ। ଏହା ପରେ ସେ ସନ୍ଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତାଙ୍କ ବାସଭବନ ୭ ଲୋକ କଲ୍ୟାଣ ମାର୍ଗରେ ଭେଟିଥିଲେ।
