ଭୁବନେଶ୍ୱର,୦୩/୦୨: ବହୁଚର୍ଚ୍ଚିତ ଧୂର୍ତ୍ତ ଯୋଡ଼ି ହଂସିତା-ଅନୀଲ୍ଙ୍କୁ ଝାରପଡ଼ା ଜେଲ୍ରେ ଆୟକର ବିଭାଗ ଜେରା କରିବ । ସୋମବାର ସ୍ୱତନ୍ତ୍ର ୧୨ ଜଣିଆ ଆୟକର ସ୍କ୍ୱାଡ୍ ଜେଲ୍କୁ ଯାଇ ୨ ଜଣଙ୍କୁ ପଚରାଉଚରା କରିବ । ଠକେଇ ମାମଲାର ଖିଅ ଖୋଜିବ ।
ଦୁଇ ଧୂର୍ତ୍ତଙ୍କୁ ଜେଲ୍ରେ ଜେରା କରିବା ପାଇଁ ଆୟକର ବିଭାଗ ତରଫରୁ ସ୍ଥାନୀୟ ଅଦାଲତରେ ଆବେଦନ କରାଯାଇଥିଲା । ଏହି ଆବେଦନର ଶୁଣାଣି କରି ଆୟକର ବିଭାଗ ଉଭୟଙ୍କୁ ନିଜ ହେପାଜତକୁ ନେଇ ଜେରା କରିପାରିବ ନାହିଁ ବୋଲି ଅଦାଲତ ସ୍ପଷ୍ଟ କରିଥିଲେ। ଜେଲ ଭିତରେ ହିଁ ଗୋଟିଏ ଦିନ ଜେରା କରିବାକୁ ଅଦାଲତ ଅନୁମତି ଦେଇଥିଲେ । ଶନିବାର ଜେଲ୍ କର୍ତ୍ତୃପକ୍ଷଙ୍କ ନିକଟକୁ ଅଦାଲତ ପକ୍ଷରୁ ଏନେଇ ଅବଗତ କରାଯାଇଛି ।
ସୋମବାର ଜେରା ବେଳେ ଆୟକର ସ୍ୱତନ୍ତ୍ର ସ୍କ୍ୱାଡ୍କୁ ଜେଲ୍ କର୍ତ୍ତୃପକ୍ଷ ସମସ୍ତ ପ୍ରକାର ସହଯୋଗ କରିବେ । ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ପର୍ଯ୍ୟାୟକ୍ରମେ ଠକ ଯୋଡ଼ିଙ୍କୁ ଜେରା କରାଯିବ । ପ୍ରଥମେ ଉଭୟଙ୍କୁ ଅଲଗା ଅଲଗା ଓ ପରେ ମୁହାଁମୁହିଁ ଜେରା କରିବାକୁ ଆୟକର ସ୍କ୍ୱାଡ୍ ଯୋଜନା ରଖିଛି । କୋର୍ଟରୁ ଅନୁମତି ମିଳିବା ପରେ ଆୟକର ସ୍କ୍ୱାଡ୍ ସ୍ୱତନ୍ତ୍ର ପ୍ରଶ୍ନାବଳୀ ପ୍ରସ୍ତୁତ କରିଛି । ଏହି ହାଇପ୍ରୋଫାଇଲ୍ ଠକ ନାମୀଦାମୀ ଶିଳ୍ପପତି, ଶିକ୍ଷାନୁଷ୍ଠାନ ମାଲିକ ଓ ରାଜନେତାଙ୍କ କଳାଧନକୁ କେଉଁ ଉପାୟରେ ଧଳା କରୁଥିଲେ । ସିଏସ୍ଆର୍ ଫଣ୍ଡ୍ କେଳେଙ୍କାରୀରେ ଉଭୟଙ୍କ ଭୂମିକା କେତେ? ଉଭୟେ ଅଳ୍ପ ଦିନରେ କେମିତି କୋଟି କୋଟି ଟଙ୍କା କଳାଧନ ସଞ୍ଚିଲେ । ଉଭୟଙ୍କର ଆଉ କେଉଁଠି ବେନାମୀ ସମ୍ପତ୍ତି ରହିଛି । ଜେରା ବେଳେ ଏସବୁ ଦିଗକୁ ଗୁରୁତ୍ୱ ଦିଆଯିବ । ସେହିପରି ଜନ୍ମଦିନ ପାର୍ଟିରେ ୩୦ ଲକ୍ଷ ଟଙ୍କା ଉଡ଼ାଇଥିଲେ ଅନୀଲ । ଜନ୍ମଦିନରେ ଖର୍ଚ୍ଚ ପାଇଁ ସେ ଏତେ ପରିମାଣର ଟଙ୍କା କେଉଁଠୁ ପାଇଲେ? ସେନେଇ ମଧ୍ୟ ଖୋଳତାଡ଼ କରିବ ଆୟକର ବିଭାଗ ।
