ନୂଆଦିଲ୍ଲୀ, ୨୯/୦୪ : ବଢ଼ିବ ଆଇପିଏଲ କଳେବର । ମ୍ୟାଚ୍ ସଂଖ୍ୟା ୭୪ରୁ ବୃଦ୍ଧି ହୋଇ ୯୪ ହେବ । ଏ ବିଷୟରେ ସୂଚନା ଦେଇଛନ୍ତି ଆଇପିଏଲ ଅଧ୍ୟକ୍ଷ ଅରୁଣ ଧୂମାଲ । ବିସିସିଆଇ ଏ ବିଷୟରେ ଯୋଜନା କରୁଛି । ନୂଆ ଗଣମାଧ୍ୟମ ଅଧିକାର ଚକ୍ରରୁ ଏହା ଲାଗୁ ହେବ । ଅର୍ଥାତ ବର୍ତ୍ତମାନର ପ୍ରସାରଣ ଅଧିକାର ପାଇଥିବା ଡିଜନୀ ଷ୍ଟାର ଓ ଭାଏକମ-୧୮ର ଚୁକ୍ତି ୨୦୨୭ରେ ପୂରଣ ହେବ । ୨୦୨୮ରେ ନୂଆ ପ୍ରସାରଣ ଅଧିକାର ପାଇଁ ନିଲାମ ହେବ । ସେତେବେଳେ ମ୍ୟାଚ୍ ସଂଖ୍ୟା ୯୪କୁ ବୃଦ୍ଧି କରାଯିବ ।
ଆଇପିଏଲ୍ ଅଧ୍ୟକ୍ଷ ଧୂମାଲ କହିଛନ୍ତି, ‘ପୂର୍ବରୁ ମ୍ୟାଚ୍ ସଂଖ୍ୟା ବୃଦ୍ଧି କରାଯିବା ବିଷୟରେ ବିସିସିଆଇ ବୈଠକରେ ବହୁ ଥର ଆଲୋଚନା ହୋଇଛି । ୨୦୨୮ରୁ ୯୪ ମ୍ୟାଚ୍ ଖେଳାଯିବା ନେଇ ଯୋଜନା ହେଉଛି । ଏ ବିଷୟରେ ଆଇସିସି ସହ ମଧ୍ୟ କଥାବାର୍ତ୍ତା ଚାଲିଛି । ଫ୍ରାଞ୍ଚାଇଜ, ବିଜ୍ଞାପନଦାତା, ପ୍ରସାରଣ ଏବଂ ପ୍ରଶଂସକଙ୍କ ସ୍ୱାର୍ଥକୁ ଦୃଷ୍ଟିରେ ରଖି କାର୍ଯ୍ୟ କରାଯିବ । ଆଇସିସି ଇଭେଣ୍ଟ ଏବଂ ଦ୍ୱିପାକ୍ଷିକ ସିରିଜକୁ ଗୁରୁତ୍ୱ ଦେଇ ମ୍ୟାଚର ସଂଖ୍ୟା ବୃଦ୍ଧି ହେବ । ଚଳିତ ସଂସ୍କରଣରେ ୧୦ଟି ମ୍ୟାଚ୍ ବୃଦ୍ଧି କରାଯିବା ନେଇ ଯୋଜନା ଥିଲା । କିନ୍ତୁ ତାହା ସମ୍ଭବ ହୋଇପାରିଲା ନାହିଁ । ଯଦି ଟୁର୍ଣ୍ଣାମେଣ୍ଟରେ ୯୪ଟି ମ୍ୟାଚ୍ ଖେଳାଯାଉଛି ତେବେ ପ୍ରତ୍ୟେକ ଦଳ ଘରୋଇ ଭେନ୍ୟୁ ଓ ଘରୋଇ ଭେନ୍ୟୁ ବାହାରେ ସମାନ ଦଳ ବିପକ୍ଷରେ ଖେଳିବାର ସୁଯୋଗ ପାଇବେ ।’
ସେ ଆହୁରି ମଧ୍ୟ କହିଛନ୍ତି, ‘ଦଳ ସଂଖ୍ୟା ବୃଦ୍ଧି କରାଯିବାର କୌଣସି ଯୋଜନା ନାହିଁ । ଏବେ ଅନ୍ତର୍ଜାତୀୟ ସୂଚୀ ବେଶ ବ୍ୟସ୍ତବହୁଳ ରହିଛି । ତେଣୁ ସବୁଦିଗକୁ ଦୃଷ୍ଟି ଦେଇ ବିଚାର ବିମର୍ଶ ଚାଲିଛି । ବର୍ଷକୁ ବର୍ଷ ଆଇପିଏଲର ଲୋକପ୍ରିୟତା ବଢ଼ି ବଢ଼ି ଚାଲିଛି । ଇତିମଧ୍ୟରେ ୧୮ତମ ସଂସ୍କରଣ ଅଧା ହେବାକୁ ବସିଲାଣି । ଦର୍ଶକ ଓ ପ୍ରଶଂସକଙ୍କ ଆଗ୍ରହକୁ ଦେଖି ସବୁ କିଛି କରାଯାଉଛି ।’ ଯଦି ଆଇପିଏଲରେ ମ୍ୟାଚ୍ ସଂଖ୍ୟା ବଢ଼େ ତେବେ ଦିନ ସଂଖ୍ୟା ମଧ୍ୟ ବୃଦ୍ଧି ପାଇବ । ଯାହା ଆଶା କରାଯାଉଛି ଦିନ ବଢ଼ିଲେ ଟୁର୍ଣ୍ଣାମେଣ୍ଟ ମାର୍ଚ୍ଚ ମଧ୍ୟଭାଗରୁ ଆରମ୍ଭ ହୋଇ ମେ’ ଶେଷ ପର୍ଯ୍ୟନ୍ତ ଚାଲିବ । ୨୦୦୮ରେ ଆଇପିଏଲ ଆରମ୍ଭ ହୋଇଥିଲା । ୮ଟି ଦଳ ୫୯ ମ୍ୟାଚ୍ ୪୪ ଦିନରେ ଖେଳିଥିଲେ । ୧୫ଟି ଡବଲ ହେଡର ମ୍ୟାଚ୍ ଥିଲା । ୨୦୨୨ରୁ ଦଳ ସଂଖ୍ୟା ୧୦ ହେବା ପରେ ୭୪ଟି ମ୍ୟାଚ୍ ଖେଳାଯାଉଛି । ଦିନ ସଂଖ୍ୟା ୬୦ରୁ ୬୫ ଦିନ ମଧ୍ୟରେ ସୀମିତ ରହିଛି । ୨୦୨୨ରେ ଡିଜନୀ ଷ୍ଟାର ଏବଂ ଭାଏକମ-୧୮ ଟେଲିଭିଜନ ଓ ଡିଜିଟାଲ ପ୍ରସାରଣ ଅଧିକାର ଜିତିଥିଲେ । ୫ ବର୍ଷକୁ ସେମାନେ ୪୮, ୩୯୦ କୋଟି ଟଙ୍କା ପ୍ରଦାନ କରିବେ । ୨୦୨୭ରେ ସେମାନଙ୍କର ଚୁକ୍ତି ପୂରଣ ହେବ ।
ଏହି ଖବରଟିକୁ ପଢନ୍ତୁ-ସକାଳେ କଥା ହେଲେ ରାତିରେ ବିସ୍ଫୋରଣ, କୋଚ୍ଙ୍କ ସହ କଣ କଥା ହୋଇଥିଲେ ବିଧ୍ୱଂସୀ ବୈଭବ ?
