ଅହମ୍ମଦାବାଦ୍,୨୫/୩: ଚଳିତ ଆଇପିଏଲ୍ର ପଞ୍ଚମ ଲିଗ୍ ମ୍ୟାଚ୍ରେ ମଙ୍ଗଳବାର ଗୁଜରାଟ ଟାଇଟନ୍ସ ଘରୋଇ ଗ୍ରାଉଣ୍ଡ୍ରେ ପଞ୍ଜାବ କିଙ୍ଗ୍ସକୁ ଭେଟିବ । ଭାରତୀୟ ଟି-ଟ୍ୱେଣ୍ଟି ଦଳରୁ ବାଦ ପଡ଼ିଥିବା ଦୁଇ ଷ୍ଟାର ବ୍ୟାଟର ଶୁଭମନ ଗିଲ୍ ଓ ଶ୍ରେୟାସ ଆୟର ଉଭୟ ବ୍ୟାଟିଂ ଓ ନେତୃତ୍ୱରେ ଶ୍ରେଷ୍ଠ ପ୍ରଦର୍ଶନ କରି ବିଜୟ ସହ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି ।
ଆୟର ଆଇପିଏଲ୍ ବିଜୟୀ ଅଧିନାୟକ । ଗତ ସିଜନରେ କୋଲକାତା ନାଇଟ ରାଇଡର୍ସ ଆୟରଙ୍କ ନେତୃତ୍ୱରେ ଚାମ୍ପିଅନ୍ ହୋଇଥିଲା । ଏଥର ସେ ପଞ୍ଜାବ କିଙ୍ଗ୍ସ ଦଳର ନେତୃତ୍ୱ ନେବାକୁ ଯାଉଛନ୍ତି । ଗତ ସିଜନରେ ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ଇଣ୍ଡିଆନ୍ସ ଯିବା ପରଠୁ ଗିଲ୍ ଟାଇଟନ୍ସ ଦଳର ନେତୃତ୍ୱ ନେଉଛନ୍ତି ।
ଚଳିତ ଆଇପିଏଲ୍ରେ ପଞ୍ଜାବ କିଙ୍ଗ୍ସ ସବୁଠୁ ସନ୍ତୁଳିତ ଓ ଶକ୍ତିଶାଳୀ ଦଳ ମନେ ହେଉଛି । ସବୁ ବିଭାଗରେ ଅଭିଜ୍ଞତା ଓ ଯୁବ ଶକ୍ତି ଭରି ରହିଛି । ଏକାଦଶର ପ୍ରତ୍ୟେକ ସ୍ଥାନ ପାଇଁ ବିକଳ୍ପ ମହଜୁଦ ରହିଛି । ଏପରିକି କୌଣସି ଖେଳାଳି ଆହତ ହେଲେ ସେହି ସ୍ଥାନ ନେବା ପାଇଁ ଖେଳାଳି ପ୍ରସ୍ତୁତ ହୋଇ ରହିଛନ୍ତି । ଏହା ବ୍ୟତୀତ ଏକ ଟାଇଟଲ ବିଜୟୀ ଅଧିନାୟକ ଓ ଜଣେ ପ୍ରସିଦ୍ଧ କୋଚ୍ ମଧ୍ୟ ଦଳରେ ରହିଛନ୍ତି ।
ଅଧିନାୟକ-କୋଚ୍ ଯୋଡ଼ି ଆୟର ଓ ପଣ୍ଟିଂ ପୂର୍ବରୁ ଏକତ୍ର ଦିଲ୍ଲୀ କ୍ୟାପିଟାଲ୍ସ ଦଳରେ କାର୍ଯ୍ୟ କରିସାରିଛନ୍ତି । ତେଣୁ ଦଳ ଓ ରଣନୀତି ପ୍ରସ୍ତୁତ କରିବାରେ ମତ ପ୍ରାର୍ଥକ୍ୟ ହେବା ଅସମ୍ଭବ । କେବଳ ଏକାଦଶ ଓ ଇମ୍ପାକ୍ଟ ପ୍ଲେୟାର ଚୟନ ବାକି ରହିଛି । ତଥାପି ୪ବିଦେଶୀ ଖେଳାଳିଙ୍କୁ ନେଇ ଡ୍ରେସିଂ ରୁମ୍ରେ ଜୋରଦାର ଆଲୋଚନା ହେବ । ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ୍ ଓ ମାର୍କୋ ଜାନସେନ ଏକାଦଶରେ ସ୍ଥାନ ପାଇବା ନିଶ୍ଚିତ । ଚତୁର୍ଥ ବିଦେଶୀ ଖେଳାଳି ସ୍ଥାନ ପାଇଁ ଲୋକି ଫର୍ଗୁସନ, ଅଜମତୁଲ୍ଲା ଓମାରଜାଇ ଓ ଜୋସ ଇଂଲିଶଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ । ଓମାରଜାଇ କିମ୍ବା ଫର୍ଗୁସନଙ୍କ ମଧ୍ୟରୁ ଜଣେ ଏକାଦଶରେ ସ୍ଥାନ ପାଇଲେ ଜୋସ ଇଂଲିଶ ଏକାଦଶରୁ ବାଦ ପଡ଼ିଯିବେ । ତାଙ୍କ ସ୍ଥାନରେ ଯୁବ ଘରୋଇ ଓପନର ପ୍ରିୟାଂଶ ଆର୍ଯ୍ୟ ପଦାର୍ପଣ କରିବେ ।
ଟାଇଟନ୍ସ ଦଳ ୩ବର୍ଷ ମଧ୍ୟରେ ଥରେ ଚାମ୍ପିଅନ୍ ଓ ଥରେ ରନର୍ସ ଅପ୍ ହୋଇ ସାରିଛି । ଏଥର ପୂର୍ବ ପ୍ରଦର୍ଶନକୁ ଦୋହରାଇବାକୁ ଗିଲ୍ ବାହିନୀ ପ୍ରୟାସ କରିବ । ଗତ ୩ଟି ସିଜନ ତୁଳନାରେ ଏଥର ଓପନିଂ ଓ ପେସ୍ ବୋଲିଂ ବିଭାଗ ସୁଦୃଢ ମନେ ହେଉଛି । ମାତ୍ର ମଧ୍ୟ ଭାଗ ପୂର୍ବଭଳି ଦୁର୍ବଳ ରହିଛି । ଏଥର ଡେଭିଡ୍ ମିଲର ନାହାନ୍ତି । କିନ୍ତୁ ଦକ୍ଷ ଓପନର ଭାବେ ଜୋସ ବଟଲର ଦଳକୁ ଆସିଛନ୍ତି । ତେଣୁ ଦଳର ବ୍ୟାଟିଂ ବିଭାଗ ମୁଖ୍ୟତଃ ଗିଲ୍ ଓ ବଟଲରଙ୍କ ପ୍ରଦର୍ଶନ ଉପରେ ନିର୍ଭର କରିବ । ଟାଇଟନ୍ସର ପେସ୍ ବୋଲିଂ ବିଭାଗ ଶକ୍ତିଶାଳୀ । କାଗିସୋ ରାବାଡ଼ା, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା ପେସ୍ ବିଭାଗ ଓ ରସିଦ ଖାନ ସ୍ପିନ ବିଭାଗ ସମ୍ଭାଳିବେ ।
ଅହମ୍ମଦାବାଦ ପିଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ତଥାପି ସମ୍ପୂର୍ଣ୍ଣ ମ୍ୟାଚ୍ ଫ୍ଲଡ ଲାଇଟ୍ ତଳେ ଖେଳାଯାଉଥିବାରୁ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ଗୁଜରାଟ ଟାଇଟନ୍ସ: ଶୁଭମନ ଗିଲ୍ (ଅଧିନାୟକ), ଜୋସ ବଟଲର, ସାଇ ସୁଦର୍ଶନ, ଗ୍ଲେନ ଫିଲିପ୍ସ, ଶାହରୁଖ ଖାନ, ୱାସିଂଟନ ସୁନ୍ଦର, ରାହୁଲ ତେୱାତିଆ, ରସିଦ ଖାନ, ଆର ସାଇ କିଶୋର, କାଗିସୋ ରାବାଡା, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା ।
ପଞ୍ଜାବ କିଙ୍ଗ୍ସ: ପ୍ରଭସିମରନ ସିଂହ, ଜୋସ ଇଂଲିଶ/ପ୍ରିୟାଂଶ ଆର୍ଯ୍ୟ, ଶ୍ରେୟାସ ଆୟର (ଅଧିନାୟକ), ଗ୍ଲେନ ମ୍ୟାକ୍ସୱେଲ୍, ନେହାଲ ୱଧେରା, ମାର୍କସ ଷ୍ଟଇନିସ୍, ଶଶାଙ୍କ ସିଂହ, ମାର୍କୋ ଜାନସେନ, ହରପ୍ରୀତ ବ୍ରାର, ବିଜୟକୁମାର ବୈଶାଖ, ଅର୍ଶଦୀପ ସିଂହ, ୟୁଝବେନ୍ଦ୍ର ଚହଲ ।
